Ya Biblia faʼaitʼa choa̱ xi bakó nga tíjna kjoaixi je Niná. Xi ijngosani, kʼoati tsoyaná nga tjínnele si̱chjén kjoafaʼaitsjenná tsa mena nga koa̱nkjainná nga tíjna Niná kʼoa nga tsín tokui kjuinñá josʼin makjainle religión (1 Juan 5:20; Romanos 12:1). Kataʼyala kʼa choa̱ xi faʼaitʼa Biblia xi bakó nga tíjna kjoaixi Niná.

•   Nga tjín kjoabijnachon kʼoa nga tjío chʼin chʼin jmeni xi tjín ya ngʼajmi kao i̱ Sonʼnde kui bakó nga tjín xi kisinda. Ya Biblia itso: “Ngayije ndʼia tjín jngo xi bʼénda, tonga je xi tsakʼénda ngayije, jé Niná” (Hebreos 3:4). Ningalani tsín nʼio ñʼai sʼin tíjna choa̱ jebi, tonga ninga je chjota xi nʼio tjínle kjoachjine makjainle nga kʼoatjín. a

•   Ngatsʼiaa xi chjota kui xi mená nga jchaa jmé xá tiyoñá i̱ Sonʼnde. Alikui sʼe̱jngo tokoán tsa tsín jchaa jme xá tiyoñá i̱ Sonʼnde. Kʼianga jchaa jme xá tiyoñá ali tsa tokuijin xi machjén nga jchaa jmeni xi machjénná nichxin nganyaon, kʼoati machjén nga jchaa nga kʼoati machjénná xi tʼatsʼe Niná tínroani, jolani nga mamená ʼyaa xi tʼatsʼe Niná kʼoa nga ʼyaxkoán (Mateo 5:3; Apocalipsis 4:11) Nga ʼyaa nga machjénná xi tʼatsʼe kui bakó nga tíjna jngo Niná xi nʼio tsjoakená xi xá kʼoasʼin kisindaniná nga kʼoakatasatío tokoán nga koa̱nmená jchaa xi tʼatsʼe kʼoa nga tsjoa sa̱tío tokoán (Mateo 4:4).

•   Je én xi tongini kinokjoa xi faʼaitʼa ya Biblia ñaki kʼoakjoán sʼin kitjoson ninga jenkjín nó jaʼato nga kichji. Nga ñaki kʼoakjoan sʼin kitjoson jmeni xi tso kui bakó nga tsín tsa to chjotajin xi kʼoakitso (2 Pedro 1:21).

•   Je chjota xi kiski Biblia ngisaa tse jmeni xi koanjinle tikʼoajinni je chjota científico xi kʼia tsakatío nga kui nichxin. Tobʼelañá, tjínkʼa xi kʼoasʼin koankjainle nga tjín xi yʼangi Sonʼnde, jolani elefante, chi̱nga̱jñá, nra̱ja̱ kʼoa tsa kjaʼaísa cho̱. Tonga ya Biblia kʼoatso nga je Niná “totíjnajinsénle je sonʼnde” (Job 26:7). Ya Biblia kʼoati tso nga “tji” kji je sonʼnde (Isaías 40:22). Nkjín chjota xi kʼoatso nga je Niná tsakasenkao je chjota xi kiski Biblia nga koanjinle jokji je Sonʼnde.

•   Ya Biblia tsoya jmeni xi sakʼoa kjonangile yaole je chjota xi tsín makjainle tʼatsʼe Niná. Tobʼelañá, a nda chjota je Niná, a nʼio tse nganʼio tjínle, ánni nga kʼoasikji kjoatsʼen kao kjoañʼai tjínni kʼoa ánni nga kʼoasikji kjoa bajngini je religión (Tito 1:16). Jmeni xi tso je Biblia koasenkaoli nga koa̱nkjainli xi tʼatsʼe Niná.