Ya Biblia kʼoatso kixi nga je Niná kisinda je chjota kʼoa kao ngayeje xi tjíokon, a jolani je cho̱ kʼoa kao jñá (Génesis 1:12, 21, 25, 27; Apocalipsis 4:11). Ya Biblia kʼoatso nga ntje̱le Adán kao Eva kitjenñá xi chjota (Génesis 3:20; 4:1). Alikui kʼoatso Biblia tsa kʼoasʼin kisinda Niná nga tobijbi kʼoantjaiya jmeni xi tjín sonʼnde. Tonga kʼoati tsín kjántʼa jmeni xi tso Biblia kao jmeni xi sʼa kjimajinle je chjota científico nga nkjín koya cho̱ tjín kʼoa kao naxó ninga tikuini ntje̱le.

•  Jósʼin makjain kʼale chjota

•  A mangóson jme xi tso Biblia kao jme xi tso chjota científico xi tʼatsʼe evolución

•  A kui xi tsonile nga evolución kinroani nga kjaʼaí makjoan kʼa je cho̱ kʼoa kao naxó ninga tikuini ntje̱le

 Je chjota kʼoasʼin makjainle nga toxá kʼoasʼin kisindani je Niná nga tobijbi kʼoantjaiya jmeni xi tjín. Je Encyclopædia Britannica kʼoatso nga toxá kʼoasʼin kisindani je Niná nga tobijbi bʼantjaiya jmeni xi tjín.

 Josasʼin makjainle chjota:

•   Ngayeje jmeni xi tjín ndʼaibi tsen tjínle jñani kinroani ngasʼa.

•   Tjínkʼa xi ñaki kjaʼaí makjoan kʼianga bʼantjaiya. Kʼoa macroevolución tsole je chjota.

•   Jé Niná xosíkao nga bʼantjaiya jmeni xi tjín sonʼnde.

 Tsa kʼoalani ma nga to bijbi bʼantjaiya jmeni xi tjín sonʼnde, alikuijinni kʼoatjín jotso libro xi tsʼe Génesis. Tonga je Jesús kʼoakitso nga ñaki kʼoatjín jmeni xi tso libro jebi (Génesis 1:26, 27; 2:18-24; Mateo 19:4-6). Ya Biblia kʼoatso nga je Jesús yaa tíjnakao nʼaile ya ngʼajmi nga kjesa faʼaijin i̱ Sonʼnde, kʼoa jé tsakasenkao nga kisinda ngayeje jmeni xi tjín (Juan 1:3). Ya Biblia alikui kʼoatso tsa evolución kisichjén je Niná nga kisinda ngatsʼi xi tjíokon, tojosʼin makjain kʼale je chjota.

 Ya Biblia alikui kʼoatso jókji nkjín koya tjín jngo ntje̱ kʼoa jokji bʼantjaiya. Tonga kʼoati tsín kjántʼa nga kʼoatso je Biblia nga je Niná toxá kʼoasʼin kisindani jmeni xi tjín nga mankjínya kʼoa nga nkjín koya jomakjoan nga jngó jngó ntje̱. Tjínkʼa xi evolución tsole jebi, tonga nga kʼoama ali tsa ñaki kjaʼaíjin xi mʼóya nga̱ tikuini ntje̱le.