Kʼianga 23 sá marzo tejaola miyón chjota tichoyalee nga kuicho kʼianga kjoaʼaítsjenya Kjoabiyale Cristo. Je ndsʼee xi kuinchja̱yajin kui kuitsoya je kjoatjao xi kitsjoa je Jeobá kʼianga tsakʼasjentjai je chjota kʼoa josʼin koasenkaoná kjoabʼechjíntjai jebi (Isa 11:6-9; 35:5, 6; 65:21-23; Jn 3:16). Tonga ali tsa tojejin ndsʼee xi kuinchja̱yajin xi kʼoasʼin koajna én nga kui nichxin. Kʼoati koa̱n nda chjoéyaa tsanda ñá je chjota xi kuicho (Ro 15:7). Kataʼyala kʼaa jmeni xi koa̱n sʼiaan.

• ʼNdele nga to kuiyola kʼoa chóyalaa saʼnda nga koaitsʼia je programa, tosa nda chjoéyaa je chjota xi kuicho kʼoa kao xíngiaa xi jetsín titsoyasonni. Nda si̱koaa kʼoa chja̱kaonajmiá.

• Nʼio kuenta tʼiain je chjota xi ji xotsakʼinlai, tonga kʼoati kuenta tʼiain jokjoansa chjota xi kuicho xi kʼoati tsakʼaile xo̱n xi tsʼabíson. Kʼoatʼinlai nga ya katabʼejnatʼali kʼoa takolai je Biblia kʼoa kao je xo̱n xi jndaa.

• Kʼianga jekjoetʼa je kjoanokjoaya xi sʼe̱jna, kuenta tʼain tsa jme xi mele skónangi. Kʼoa tsa ya jtín jña ʼmi ijngosa jtín kjoaʼasʼen nga jekoanni, kʼoatʼinlai je chjota jebi nga kjaʼaí nichxin cho̱banajmío kʼoa tʼendajion kʼiani. Koaan i̱ kʼuínlai: “Jósʼin kasasénli jmeni xi kafaʼa. Jósʼin koa̱n jtsaojin ijngokʼá xíngiaa”.