Kjoaʼmiya 3

ʼYáni Jesucristo

Ánni nga «ʼNdítjonle» Niná ʼmisíni Jesús (1)

Ánni nga «Én» ʼmisínile (1)

Ánni nga i̱ Sonʼnde jaʼaisíni Jesús (2-4)

Ánni nga kʼoakisʼinsíni Jesús jmeni xi tomaxkónná (5)

Jméni xi sʼin Jesús nichxin xi machrianle (6)

1. Kʼianga kjesa faʼaijin Jesús i̱ Sonʼnde, espírituní kʼoa ya tsakʼejna ngʼajmi. Jé títjon koannda, kuinga «ʼNdítjonle» Niná ʼmisíni (Colosenses 1:15; Apocalipsis 3:14). Jésoa Niná kisinda Jesús, je ʼNdíle, liʼya xi kisichjén nga kisinda. Nga kjesa faʼaijin Jesús i̱ Sonʼnde kʼoasʼin kisichjén Jeobá joni jngo chjota xi nʼio nda male síxá nga kisinda ngayeje xi tjín ngʼajmi kao Sonʼnde (Proverbios 8:22-31; Colosenses 1:16, 17). Jé xi ngisa kisichjén Niná nga kisikʼatoya énle. Kuinga «Én» ʼmisínile Jesús (Juan 1:14; Apocalipsis 19:13).

2. Niná kisikasén ʼNdíle i̱ Sonʼnde nga ya kisikʼejnaya kjoabijnachonle yatsʼoa̱ María nga ya koanjcháya. Jesús likui nʼai sonʼnde kisʼele, kuinga tsín jée kisʼesínile. Ján koya xá kisikasénni Niná je Jesús i̱ Sonʼnde: xi títjon, nga tsakakóyaná xi kixi tjín tʼatsʼe Niná (Juan 18:37), xi majaoni, nga ñaki kixi koan xi kao Niná kʼoa kʼoasʼin tsakʼejnaná choa̱ xi chjénngia (1 Pedro 2:21) kʼoa xi majánni, nga kitsjoantjai kjoabijnachonle kʼianga kisikationdainá xi tʼatsʼe jée kao kjoabiya. Ánni nga nʼio koanchjénsíni jebi (Mateo 20:28).

3. Kʼianga je jaʼatone kjoatéxomale Niná jé chjota xi títjon tsakʼejna, xi Adán tsakʼin, kuikjoa tsakajngi xi «jée» tsole Biblia. Kjoañʼai xi kisokole kjoabiyaní jokjoan kitsole Niná (Génesis 3:17-19). Kʼoa nga tsín ti kʼoasʼin kisitjosonni kjoatéxomale Niná, kisicha xi ndatjín. Tobijbi koanjchínga, kʼoa xijekoan kʼien. Adán kisikakinle jée ngatsʼi xtile. Kuinga kʼoati majchíngasíñá, sʼesíniná chʼin kʼoa mʼesíñá. Jókoanni kuitjontjai chjota sonʼnde (Romanos 3:23; 5:12).

 4. Jesús jngo chjota xi tsje koan joni tsa Adán. Tonga xi tsín koanngoson xi kao Adán kuinga Jesús ñaki kisitjosonle Niná ninga tse kjoañʼai tsakjaʼá. Kuinga koan kitsjoantjaisíni kjoabijnachon tsjele, nga tsakʼechji jée xi tsakajngi Adán. Jebi «kjoabʼechjintjai» tsole Biblia. Kao kui jebi koan koationdaini xtile Adán xi tʼatsʼe kjoabiya. Ngatsʼi xi sʼele kjoamakjain tʼatsʼe Jesús koan jchatʼale jéele kʼoa kʼoaile kjoabijnachon xi tsínkʼia fetʼa (1 Timoteo 2:5, 6; Juan 3:16; Romanos 5:18, 19).

5. Kʼianga tsakʼejna i̱ Sonʼnde, Jesús kisindaya xi tjíomʼe, kisikjen chjota xi kjinrá tjíofaʼá kʼoa kisikʼejnajyo ntjao ya sonndáchikon. Saʼnda kisikjaʼáyale kʼien. Ánni nga kʼoakisʼinsíni Jesús. Xi títjon, kuinga koanmake chjota xi kjoañʼai tjíofaʼá kʼoa koanmele nga tsakasenkao. Xi majaoni, kui tsakakó nga ʼNdíle Niná ma. Kʼoa xi majánni, kui tsakakó kjoanda xi tsjoále chjota xi sítjosonle nga koatéxoma i̱ Sonʼnde nga je Rey sʼin kʼoejna (Mateo 14:14; Marcos 2:10-12; Juan 5:28, 29).

6. Jesús kʼien, espíritu sʼin kisikjaʼáya ijngokʼanile Niná kʼoa xijekoan kini ngʼajmi (1 Corintios 15:45). Xi je koanskanni jé Niná Rey sʼin kisikʼejna. Jesús jeme kjoaʼaxin ngayeje xi chʼaotjín kao kjoachjaʼatokon xi tjín i̱ Sonʼnde (Salmo 37:9-11; Proverbios 2:21, 22).

[Én xi ya faʼaitʼakao sén xi faʼaitʼa ya pájina 7]

Kʼianga kisixá i̱ Sonʼnde, Jesús tsakakóya, tsakakó kjoa xi tomaxkónná, kʼoa saʼnda kitsjoantjai kjoabijnachonle xi totʼatsan