Kjoaʼmiya 4

ʼYáni Na̱i

Jñá jaʼaini Satanás jé Na̱i (1, 2)

Jósʼin bʼanachale chjota (3-7)

Ánni nga taja kuijnasínilai Na̱i (7)

1. Jé Na̱i nʼio síchjén énndiso nga síkiʼaon xi kjaʼai. «Satanás» ʼmi kaonile, kʼoa kui tsoyanile jngo xi bʼejnachjoa. Én jebi nʼio bakinle jé Na̱i, nga jé Na̱i nʼio jtike Niná. Ngasʼa koannda ñaki ánkje tsjení kʼoa ya ngʼajmi tsakʼejnakao Niná, tonga xijekoan nʼio ngʼakon koan kʼoa kui koanmele nga jé kʼoaile kjoaʼyaxkón xi Niná bakinle (Mateo 4:8-10).

2. Jé Na̱i, ánkje jebi, jngo ye̱ kisichjén nga tsakjakao Eva, kʼoa kao kjoandisole kitjoenile, nga tsín ti Niná kisitjosonnile. Nga kʼoakisʼin jé Na̱i, kui tsakʼejnachjoale nga tojé Niná xi tiʼndele koatéxomaná. Kʼoa kʼoakitso nga likui nda tíbatéxoma Niná kʼoa nga tsín mele nga nda koatio chjotale. Jé Na̱i kʼoati kitso nga nijngojin chjota xi kixi koaitʼale Niná. Nga kʼoakisʼin, contra tsakʼejnale Niná. Kuinga Na̱i kʼoa Satanás tsakʼinsíni (Génesis 3:1-5; Job 1:8-11; Apocalipsis 12:9).

3. Satanás basjaile josʼin bʼanachale chjota nga jé katabʼetsʼoale (2 Corintios 11:3, 14). Jngo xi síchjén kui religión ndiso. Tsa jngo religión xi kjoandiso tsoya xi tʼatsʼe Niná kuini tísítjoson josʼin mele Satanás (Juan 8:44). Tsakui nichxin ñaki kʼoasʼin makjainle chjota xi religión ndiso tjíojin nga Niná xi kixi tjíobʼetsʼoale, tonga xi tjíosíxá kjoaixinile jé Satanás, nga ndʼaibi jé «niná xi tsʼe sonʼnde» (2 Corintios 4:4).

4. Xi ijngosa síchjén Satanás nga bánentsja chjota kui kjoabʼenda. Tsakui nichxin tjínkʼa chjota xi espíritu síjéle nganʼio nga sikuinda, nga sikaotaon xínkjín, nga skoe jme xi koan kʼoa kʼoasʼin xá xi tomaxkónná. Ngayeje kjoabʼenda jé Satanás síxákao. Tsa mená nga nda kuijna xi kao Niná, likuikoan nga ya kuinojian yaoná tʼatsʼe kjoabʼenda (Deuteronomio 18:10-12; Hechos 19:18, 19).

5. Josʼinsa bʼanachale Satanás chjota, kuinga bʼasjengi xi kjaʼai sʼin tsen yaole kao xi xín ʼndele kʼoa nga bʼasjengʼa chjota político. Tjínkʼa chjota xi kʼoasʼin makjainle nga ngisa ngʼa tíjna naxinandále kʼoa josʼin tsen yaole  kʼoa jme én xi nchja tikʼoajinni xi ngikʼa. Tonga likui kʼoatjín (Hechos 10:34, 35). Kʼoa tjínkʼa xi je koyale chjota político nga jé kʼoendajin kjoa xi tjínle chjota sonʼnde. Kʼoa kʼoasʼin tjíobʼasjengi Rey xi kiskoejin Niná, xi tojé kjoan xi koanle kʼoendajin kjoa xi tjínná (Apocalipsis 11:15).

6. Josʼinsa bʼanacha Satanás, kuinga síkʼiejnabasenná xi jée tjenkao. Jeobá kʼoatsoná nga tsín kui kʼoasʼian xi jée tjenkao nga be nga sikiʼaonná (Gálatas 6:7, 8). Tsakui nichxin tjínkʼa chjota xi kʼoakuitsoli nga kʼoatisʼiain josʼín jé. Tonga tikjaʼaitsjain nga jé Satanás xi mele nga kui kʼoasʼiain xi jée tjenkao (1 Corintios 6:9, 10; 15:33).

7. Satanás koanle sichjén chjota nga koaitjenngikeli kʼoa nga koatiochjoali tojoni nga sikʼiejnai Jeobá. Tsakui nichxin nʼio koanjti kʼale xíngi kʼianga Biblia tichotʼayai kʼoatsa maije tjínkʼa xi kuijnokeli. Tonga, ʼyá tʼatsʼeni nga tijnachuin. Satanás kui xi mele nga kuinyaxkónli nga tsín ti chotʼayani tʼatsʼe Jeobá. Tonga li bʼaiʼndejin nga jé sikinjeli (Mateo 10:34-39; 1 Pedro 5:8, 9). Nga taja kuijnalai Na̱i, kjoayatsjoani nimale Jeobá kʼoa koakóni nga tibʼai nganʼiolai nga tojé xi tiʼndele koatéxoma (Proverbios 27:11).

[Én xi ya faʼaitʼakao sén xi faʼaitʼa ya pájina 9]

Xi bʼanachale chjota kui religión ndiso, kjoabʼenda kao nga bitjongʼa naxinandá

[Én xi ya faʼaitʼakao sén xi faʼaitʼa ya pájina 9]

Taja tijnalai Satanás nga tosi tonda chotʼayai tʼatsʼe Jeobá