Kjoaʼmiya 2

ʼYáni Niná

ʼYáni Niná xi kixi, kʼoa jóʼmi (1, 2)

Jmé yao xi yʼa Niná (3)

Jmé xi nʼio bakó Niná jokjoan (4)

A koan nga sén kʼoa nga xkóson sichjén nga kʼoetsʼoale Niná (5)

Jméni xi jao koya bakóyaná tʼatsʼe Niná (6)

1. Nkjín koya jmeni xi bʼetsʼoale chjota. Tonga ya Biblia kʼoatso nga tojngo mani Niná xi KIXI. Jé kisinda ngayeje xi tjín ngʼajmi kao Sonʼnde, kʼoa nga jé kitsjoaná kjoabijnachon, tojé xi bakinle nga kʼoetsʼoale (1 Corintios 8:5, 6; Apocalipsis 4:11).

2. Ninga nʼiolani nkjín koya josʼin ʼmile Niná, tojngo mani jaʼainle: JEOBÁ ʼmi. Nʼio nkjín Biblia xi kitjoʼaxinle jaʼainle Niná kʼoa kui kisationgajaonile xi Señor kʼoa Niná tso. Tonga kʼianga kichji Biblia, me ñatojmikʼa jaʼaitʼa jaʼainle Jeobá (Éxodo 3:15; Salmo 83:18).

3. Jeobá kʼoati tjín jngole yao, tonga likui kʼoakji jokjoan tsan. «Niná Espírituní», tso Biblia (Juan 4:24). Jngo espíritu jngo kjoabijnachon xi  ngisa nʼio ngʼa tíjna tikʼoajinni tsan. Nisajngojinla chjota be jokji Niná. Ninga yalani ngʼajmi tíjna Jeobá, tíbe ngayeje (Juan 1:18; Hebreos 4:13). Kʼoa jméni xi espíritu santo ʼmi. Kui nganʼio xi síchjén Niná, a litsa ninájín (Salmo 104:30).

4. Je Biblia kʼoatsoná jokjoan Jeobá. Kʼoatso nga xi nʼio bakó jokjoan kui kjoatsjoacha, kjoatéxomakixi, kjoachjine kʼoa kao nganʼio (Isaías 40:26; Romanos 11:33, 34; 1 Juan 4:8; Apocalipsis 15:3). Kʼoatitso nga tjínle kjoamatokon, kjoanda, kjoanichatʼa, nga tsjoá xi machjénná kʼoa nga tsejta. Joni tsa xti xi sítjoson, tjínnená nga chjénngile jokjoan (Efesios 5:1, 2).

5. A koan kuinyaxkonnyʼintʼale kʼoa kʼoetsʼoale sén kao xkóson. Mai (Hechos 17:24, 25, 29). Jeobá kʼoatso nga tojé kjoan xi tjínnená kʼoetsʼoale, kʼoa likui ʼya xi tsjoále kjoajeya xi tjínle. Kʼoa je sén kao xkóson tsínle nganʼio nga koasenkaoná (Isaías 42:8; Apocalipsis 9:20).

6. Jósʼin nga ndasa jcha Niná. Xi títjon, kʼia tsa chotsenle jme xi kisinda kʼoa nda sikjaʼaitsjen jme xi bakóyaná jebi xi tʼatsʼe Jeobá. Xi kisinda Niná kui bakóná nga nʼio tjínle nganʼio kao kjoachjine. Ngayeje xi kisinda, ya ʼyañá kjoatsjoachale (Salmo 19:1-6; Romanos 1:20). Xi majaoni, josʼin nga jchasa tʼatsʼe Niná kʼia nga chotʼaya Biblia. Ya kʼoatsosaná Niná jokjoan jé. Kʼoati bajinkonná jme xi tjínndajinle kʼoa jme xi mele nga sʼian (Amós 3:7; 2 Timoteo 3:16, 17).

[Én xi ya faʼaitʼakao sén xi faʼaitʼa ya pájina 5]

Jme xi koannda kʼoa kao Biblia ya bakóyaná tʼatsʼe Niná