Kjoaʼmiya 1

Jókoanni jchai jme xi síjé Niná

Jmé énni xi nʼio chjíle bakóya Biblia (1)

ʼYátsʼe én xi nroatʼa Biblia (2)

Ánni nga tjínnesínili chotʼayai Biblia (3)

1. Je Biblia jngo kjoatjaole Niná xi nʼio chjíle. Kʼoasʼin joni tsa jngo xonle jngo nʼai xi síkasénle xtile nga tsjoake. Kui bakóyaná xi ñaki kʼoatjín xi tʼatsʼe Niná: ʼyáni jé kʼoa jótjín kjoatéxomale. Bakóya jósʼin kʼoéndajian jngo kjoa kʼoa jósʼin nga tsjoa sʼe tokoan. Toya Biblia kʼoatsoná jme xi sʼian nga nda kuijna xi kao Niná (Isaías 48:17, 18; Apocalipsis 1:3).

2. Tsʼato jngojmibasen nó nga kjesa faʼaijin Jesús i̱ Sonʼnde kʼia kisʼetsʼiakao nga kichji Biblia. Ñachan chjota kiski kʼoa xjaʼaonjngo siento nó koanjngoni. Jánkan kaoni jaon libro tjínle. Niná xo kitsole chjota xi kiski jotsakʼé, xi tsonile, tsʼe Niná kjoafaʼaitsjen xi kiski. Kuinga je én xi nroatʼa Biblia li tsʼejin chjota Sonʼnde, tsʼe Niná xi tíjna ngʼajmi (2 Timoteo 3:16, 17; 2 Pedro 1:20, 21).

3. Niná xi kʼoasʼin koanmele nga kʼoakjoan kisʼe Biblia kʼianga je kichjitʼa xi kjaʼai xon kʼoa nga tsín tíchangi. Tokui Biblia xi ngisa nʼio nkjín tíbitjo tikʼoajinni xi kjaʼai xon. Likui tosasénle ngatsʼi chjota nga Biblia chotʼayai, tonga li bʼaiʼndejin nga ʼya xi kʼoechjoali. Kʼianga kuijnachuin ngantsjai tjínneli chotʼayai ánni nga jchasíni Niná kʼoa kʼoasʼiansíni josʼin mele tsanda ʼya xi koaitjenngikeli (Mateo 5:10-12; Juan 17:3).