Kjoaʼmiya 6

Jósʼin batéxoma Rey xi kiskoejin Niná

Jñáʼnda batéxomani Rey xi kiskoejin Niná (1)

ʼYáni Rey je (2)

A tjínsa chjota xi koatéxomakao Rey je Kʼia tsajaon, jótjín mani (3)

Jmé xi bakóná nga nichxin fetʼa tiyoa (4)

Jmé kjoanichikontʼain sʼele chjota nichxin xi nroaján kʼianga koatéxoma Rey xi kiskoejin Niná (5-7)

1. Kʼianga tsakʼejna i̱ Sonʼnde Jesús, kitsoyale kjoabʼetsʼoa chjota tjenngile josʼin sijé nga jé katabatéxoma Rey xi kiskoejin Niná. Josʼin batéxoma Rey jebi likui mangoson kao chjotaxá sonʼnde. Rey jebi ya tíjna ngʼajmi kʼoa jé koatéxomason Sonʼnde. Kʼianga koatéxoma jchaxkón jaʼainle Niná. Kʼoa kʼoakoan josʼin mele Niná i̱ Sonʼnde joni ya ngʼajmi (Mateo 6:9, 10).

2. Niná tongini kʼoakitso nga Jesús xi Rey kʼoejna (Lucas 1:30-33). Kʼianga tsakʼejna i̱ Sonʼnde, Jesús tsakakó nga nda koatéxoma, nga kixi koan kʼoa nda chjota koan. Kʼianga kicho ya ngʼajmi, likui tokjoan Rey kinikʼejna (Hebreos 10:12, 13). Kʼia nga nó 1914 kitsjoale xá xi kitsole Jeobá nga jé koatéxoma. Saʼndakʼia, Jesús je Rey tíjna ngʼajmi nga tíbatéxoma (Apocalipsis 11:15).

3. Jeobá kʼoati kiskoejin kʼa i̱ Sonʼnde chjota xi kixi, xi xʼin kao xi yánchjín nga ya koai ngʼajmi. Chjota jebi rey koan, juez koan kʼoa naʼmi koan, nga ya koatéxomakao Jesús, kʼoa jé kuitsoyale kʼoa kuinyakao chjota sonʼnde (Lucas 22:28-30; Apocalipsis 5:9, 10). Xi koatéxomakao Jesús isʼin kitsole «jon xi tochoa mani xi tiyojtíon». Kʼoa jngosiento kao ñachanñojmi mani (Lucas 12:32; Apocalipsis 14:1-3).

4. Kʼianga je Rey koan Jesús ya ngʼajmi tsakjaʼaxin jé Na̱i kao ánkje xi ya tsakajta kʼoa i̱ kisikʼatsaojenngi i̱ Sonʼnde. Kuinga kʼoasikji kjoa tjínsíni saʼnda nó 1914 (Apocalipsis 12:9,12). Kjoajchán, kjinrá, chʼintoan kʼoa nga kjimankjínya kjoatsʼen..., ngayeje jebi jngo «choa̱» xi bakóná nga je tíbatéxoma Jesús kʼoa nga toje  tífikjetʼa jme xi chon sonʼnde (Mateo 24:3, 7, 8, 12; Lucas 21:10, 11; 2 Timoteo 3:1-5).

5. Jesús jeme kʼoendajinle chjota kʼoa xínxín sikatíole xínkjín josʼín jngo xi koʼnda cho̱ nga xín síkatíole xínkjín barré kao tindso. «Barré» sʼin skoekon ʼyani xi sitjoson kʼoa koakó nga mele jé koatéxomale, kʼoa kjoabijnachon xi tsínkʼia fetʼa tsjoále i̱ Sonʼnde. «Tindso» sʼin skoekon ʼyani xi tsín mele nga jé koatéxomale Rey xi kiskoejin Niná (Mateo 25:31-34, 46). Nichxin xi machrianle, Jesús sikjeson ngatsʼi chjota xi tindso sʼin skoekon (2 Tesalonicenses 1:6-9). Tsa meli nga «barréle» Jesús koain, tjínneli nga kuinoʼyalai én xi tíbʼabison tʼatsʼe Rey xi kiskoejin Niná kʼoa sitjosuin jmeni xi kjimajinli (Mateo 24:14).

6. Nʼio nkjín naxinandá tjín i̱ Sonʼnde kʼoa tsen tjínle chjotaxá nga jngó jngó, kʼoa tijé kjantʼani. Tonga ngatsʼi chjotaxá jebi tjoʼaxínní kʼoa jé kʼoejna ngajaonile Rey xi kiskoejin Niná. Tojé koatéxoma jngo tjíjtsa Sonʼnde (Daniel 2:44). Kʼoa likui tisʼeni kjoajchán kao kjoatsʼen. Ngatsʼi chjota sʼele kjoanyʼan kʼoa jtín koatio (Miqueas 4:3, 4).

7. Xi jngojmi nó koatéxoma Jesús, jé chjota xi kixi chjota tsje koan, kʼoa jngo tjíjtsa Sonʼnde ʼndenaxó koan. Kʼianga kjoetʼa xi jngojmi nó Jesús je kitjosonle ngayeje xi kitsole Niná nga kʼoasʼin. Xijekoan tsjoá ijngokʼanile Nʼaile xá xi tsakánele, ánni nga tojé Nʼaile koatéxomasíni (1 Corintios 15:24). Ánni nga tsín ʼmiyasínilai miyoli kao xíngi jmeni xi sʼin Rey xi kiskoejin Niná.

[Én xi ya faʼaitʼakao sén xi faʼaitʼa ya pájina 13]

Kʼianga koatéxoma Jesús, likui tisʼeni kjoajticha kao kjoachjaʼajin