Kjoaʼmiya 13

Jósʼin koansjaili religión xi ñaki kjoakixi

A sasénle Niná ngatsʼi religión xi tjín a xo tojngo (1)

Ánni kʼoasikji religión tjínsíni xi chjota tjenngile Cristo tsole yaole (2)

Jósʼin jchai jé xi ñaki chjota tjenngile Cristo ma (3-7)

1. Tojngo koya religión xi kjoakixi tsakʼejnabasen Jesucristo. Kuinga ndʼai tojngo jtín tjínnesínile sʼe xi ñaki kʼoakjoansʼin bexkón Jeobá Niná josʼin mele (Juan 4:23, 24; Efesios 4:4, 5). Je Biblia tsoya nga tochoa mani xi ya tjíofiya ndia nrʼoeya xi kjoabijnachon fichokaoná (Mateo 7:13, 14).

2. Je Biblia tongini kʼoakitso kʼianga je kuiyá ngatsʼi apóstol tobijbi kjoaʼasʼenjin kjoaʼmiya ndiso ya jinjtín xi tsʼe Cristo kʼoa kui kʼoasʼin chjota jmeni xi tsín jé tsakakóya. Sʼe chjota xi skenʼndobʼakja xi je makjainle kʼoa sikinyatʼaxin nga tsín ti Cristo koaitjennginile (Mateo 7:15, 21-23; Hechos 20:29, 30). Kuinga kʼoasikji koya religión tjínsíni xi chjota tjenngile Cristo tsole yaole. Jókoanni jcha xi ñaki chjota tjenngile Cristo ma.

3. Xi nʼio ʼyale xi ñaki chjota tjenngile Cristo kuinga tjínle xi ñaki kjoatsjoacha xi kao xínkjín (Juan 13:34, 35). A likui kʼoasʼin ʼmiyale nga kʼoasjengi chjota xi kjaʼai sʼin tsen yaole. Ni kʼoajinla sʼin ʼmiyale nga katamajtike chjota xi xín naxinandále (Hechos 10:34, 35). Kuinga tsín kjoajchán fíjinsíni. Xi ñaki chjota tjenngile Cristo ma jondsʼe kʼoa jondichja sʼin bekon xínkjín (1 Juan 4:20, 21).

4. Xi ijngosa josʼin ʼyale religión xi ñaki kjoakixi kuinga jé chjotale ñaki kao nimale bexkón Biblia. Énle Niná sʼin bekon kʼoa makjainle jotso (Juan 17:17; 2 Timoteo 3:16, 17). Je religión xi kjoakixi ngisa chjí bekon Énle Niná tikʼoajinni josʼin síkjaʼaitsjen chjota kʼoa kao costumbre xi tjínle (Mateo 15:1-3, 7-9). Nga nyaon nyaon bʼenele yaole nga kʼoasʼín jotso Biblia. Likui kjaʼaitso nga tsoyason, kʼoa kjaʼainisʼin jña xín (Tito 1:15, 16).

 5. Jé xi ya tjíojin religión xi kjoakixi kʼoati tjínnele skoexkón jaʼainle Niná (Mateo 6:9). Jesús kisikʼejnatsen jaʼainle Niná nga Jeobá ʼmi, kʼoa xi chjota tjenngile Cristo ma kʼoati tjínnele kʼoasʼin (Juan 17:6, 26; Romanos 10:13, 14). Ya jñani tsi̱ ʼyáni xi nchjani jaʼainle Niná.

6. Xi ñaki chjota tjenngile Cristo tjínnele kuitsoyason josʼin koatéxoma Rey xi kiskoejin Niná. Jesús kʼoakisʼin, kui tsakakóya ntsjai tʼatsʼe jebi (Lucas 8:1). Kʼoati tsakʼenele chjota tjenngile nga kʼoati kui én kuitsoyason jngo tjíjtsa Sonʼnde (Mateo 24:14; 28:19, 20). Xi ñaki chjota tjenngile Cristo kʼoasʼin makjainle nga tojé Rey xi kiskoejin Niná xi koanle kjoaʼaikao kjoanyʼan nga tsín tijme kjoajkon sʼeni i̱ Sonʼnde (Salmo 146:3-5).

7. Jé chjota tjenngile Jesús likui ya tsjonjin yaole jmeni xi chon i̱ sonʼnde (Juan 17:16). Likui ya tsjonjin yaole kjoa política kʼoa kao kjoabixkantʼa xi sʼe i̱ sonʼnde. Kʼoa faʼaxinle yaole jmeni xi chʼaotjín kʼoasʼín chjota, kʼoa jmeni xi chʼaotjín síkjaʼaitsjen (Santiago 1:27; 4:4). Jñani tsi̱ a ʼyaxkonní jngo religión xi tjíosítjoson jebi, xi bakó nga ñaki chjota tjenngile Cristo ma.

[Én xi ya faʼaitʼakao sén xi faʼaitʼa ya pájina 26, 27]

Chjota tjenngile Cristo tsjoake xínkjín, bexkón Biblia kʼoa tsoyason tʼatsʼe Rey xi kiskoejin Niná