Kjoaʼmiya 14

Jósʼin tjíojtín nga tjíosíxá jé testigole Jeobá

Kʼiáni kinroatsʼiani xá xi sʼín jé testigole Jeobá xi tjín ndʼai (1)

Jósʼín nga batío kjoajtín jé testigole Jeobá (2)

Jñá fichʼa taon xi machjén (3)

ʼYáni xi nya títjon nga jngó jngó jtín (4)

Jñásanile kjoajtín xi nʼio yʼai batío nga xki nó (5)

Jmé xá xima ya oficinale xi tíjna títjon kʼoa kao xi tjío jña xín naxinandá (6)

1. Je xá xi sʼín jé testigole Jeobá xi tjín ndʼaibi kʼia kinroatsʼiani nga nó 1870. Xi Kotʼayason Biblia tsakʼin nga títjon, kʼoa nga nó 1931 kʼia kiskoe jaʼain xi ya faʼaitʼa Biblia: testigole Jeobá (Isaías 43:10). Ninga tochoa mani nga kinroatsʼiakao jtín jebi, kjimankjínyaní, kʼoa je miyón mani testigole Jeobá xi tsʼato jaosiento kao kanté naxinandáyʼai tjíotsoyason.

2. Me ngatsʼi jtín xi tjín xi tsʼe testigole Jeobá nga jánkʼa maña nga xki xomana. Koan kʼuin tojñanile kjoajtín jebi (Hebreos 10:24, 25). Ngayeje xi ʼmiyaná ya, ya Biblia bʼangini. Nga fitsʼia kjoajtín jebi títjon kjoabʼetsʼoa sʼejna, kʼoa kʼoati kui sʼejna nga fetʼani. Kʼoa satío kjoajnda xi «chʼasjejeyani Niná» (Efesios 5:18, 19). Likui machjí nga bitjasʼen kʼoa likui taon sʼeña (Mateo 10:8).

3. Me ngatsʼi jtín xi tsʼe testigole Jeobá nga tjínle ndʼia jñani batío kjoajtínle. Ndʼia jebi likui síxkón kjoan kʼoa tijé bʼendani testigole Jeobá. Likui kro kʼoa likui xkóson nya yandʼia kʼoatsa jmesani. Je taon xi machjén kui xi batío chjota jotjín nroajinni nimale. ʼYani xi mele tsjoá ya bʼetsaoya kaxa xi kui xá tjíoni (2 Corintios 9:7).

 4. Nga jngó jngó jtín tjío xi síkuinda naxinandále Niná kʼoa jé nya títjon nga tsoya, kʼoa chjota jchínga ʼmile (1 Timoteo 3:1-7; 5:17). Kʼoa xi binyakao ya jinjtín choʼnda xi sísin ʼmile (1 Timoteo 3:8-10, 12, 13). Ya jinjtín nijngojinla xi ngisa ngʼa bʼejnale xi ngikʼa (2 Corintios 1:24). Likui jngo jaʼain bʼaile xi ngʼa síkatío (Mateo 23:8-10). Likui kjaʼai kjoan najño bʼakjá. Kʼoati likui machjíle nga sítjoson xále Niná. Xi chjota jchínga sʼin tjío kao kjoatsjoa síkuinda nga sítaja kjoamakjainle je jtín. Tsjoále kjoanʼiotokon kʼoa bandiale tsa jngo xi kjoa tifaʼatojin (Santiago 5:14-16; 1 Pedro 5:2, 3).

5. Jé testigole Jeobá kʼoati batío kjoajtíntse nga xki nó. Nʼio nkjín jtín jebi maña nga fichonrʼoé jotso Énle Niná. Je xima ngantsjai nga satío kjoajtíntse jebi kuinga fisʼennginda xi mele chjota tjenngile Cristo koan (Mateo 3:13-17; 28:19, 20).

6. Ya Nueva York tíjna je oficina xi tíjna títjon xi tsʼe Testigole Jeobá. Kʼoa ya tíjna Jtín xi Bandia, tochoa mani chjota jchínga jebi, ngisa tjínle kjoafaʼaitsjen kʼoa jé kotsensonle jtín xi tsʼe testigole Jeobá xi tjín jngo tjíjtsa sonʼnde. Xi ijngosani, tsʼato jngosiento mani oficina xi tjíole jngo tjíjtsa sonʼnde. Jé xi tjíotsjoá nganʼio ya kui tjíosínda xon xi Énle Niná nroatʼa kʼoa xijema síkasén ngakjijnda. Kʼoati ya tísʼendajinni josʼin tíʼmiyason Énle Niná. Tsa tsjoá bʼendajin nga ʼmichotsain oficina xi tsʼe Testigole Jeobá xi chrian koanli.