Kjoaʼmiya 12

Jchaxkoán kjoabijnachon kao je jnjín

Jósʼin tjínnele jchatokoan je kjoabijnachon (1)

Jósʼin tjínnele jchatokoan nga sʼetsaojen chjiʼndé ʼndíle (1)

Jósʼin bakó chjota tjenngile Cristo nga nda síkuinda kjoabijnachonle (2)

A chʼaotjín nga cho̱ nikʼien (3)

Jósʼin bakoá nga tsín ʼyaxkoán je kjoabijnachonná (4)

Jótso kjoatéxomale Niná xi tʼatsʼe jnjín (5)

Kʼoa a chʼaotjín nga jnjín xinyáná (6)

1. Tʼatsʼe Jeobá tínroani kjoabijnachon. Tojmeni xi kjoabijnachon tjínle tʼatsʼe Niná nga tjíokon (Salmo 36:9; Hechos 17:24, 25). Je kjoabijnachon nʼio chjíle ngixkon Niná. Saʼnda kjoabijnachonle jngo ʼndí xi kje tsinjin xi sʼa tíjnaya tsʼoa̱ nale nʼio chjí be Jeobá. Ngixkon Niná likui ndatjín nga toxá sikʼienni ʼndí xi sʼa kjimajcháya tsʼoa̱ nale (Éxodo 21:22, 23; Salmo 127:3).

2. Chjota tjenngile Cristo nda síkuinda kjoabijnachonle. Kotʼa carrole kʼoa kʼoati síkuinda ndʼiale nga tsín tsa kjoaxkón katasokóle (Deuteronomio 22:8). Jé choʼndale Niná likui toxkia sʼín jmeni xi xkón sikʼejna kjoabijnachonle xi tokao kjoatsjoa. Kuinga tsín tsjoakesíni kjoaniska xi síkiʼaon xínkjín chjota. Bʼechjoale yaole kjoasʼetsaojin xi kjoatsʼen tjenkao (Salmo 11:5; Juan 13:35).

3. Niná kʼoati chjí bekon kjoabijnachonle cho̱. Chjota tjenngile  Cristo koan sikʼien cho̱ tsa skine yaole kʼoatsa koanchjénle chxjoale; kʼoati koan sikʼien cho̱ xi xkón kʼoa xi tsjoáchʼinná (Génesis 3:21; 9:3; Éxodo 21:28). Tonga likui ndatjín tsa tokao kjoatsjoa kʼoa kao kjoaniska sikʼienñá cho̱ kʼoatsa totaon jcha (Proverbios 12:10).

4. Xi chjota tjenngile Cristo likui najno kjien, likui xitjo kjine, kʼoa ni drogajinla síchjén. Likui ndatjín jebi nga xi títjon, tokui ngisa tsjentʼale chjota, xi majaoni, síkiʼaonní kʼoa xi majánni, jndí tíjna ngixkon Niná (Romanos 6:19; 12:1; 2 Corintios 7:1). Tsakui nichxin ñʼai koanná nga sikʼiejna jebi tonga tsa mená nga nda kuijna xi kao Jeobá tjínnele nga sikʼiejna.

5. Je jnjín kʼoati nʼio chjíle ngixkon Niná. Jé kʼoatso kʼianga kjoabijnachon ya tíjnajin je jnjín. Kuinga likui ndatjínsíni nga jnjín chine. Kʼoati tsín ndatjín nga kui chine yaole cho̱ xi tsín nda kabitjongi jnjínle. Tsa jngo cho̱ xi tokachjenʼndosin kʼoatsa che̱n kamʼengi, likuikoan chine. Tonga tsa chʼinsá kamʼeni, kjitʼanangi chʼasje jnjínle, ánni nga koan chinesíni yaole (Génesis 9:3, 4; Levítico 17:13, 14; Hechos 15:28, 29).

6. A chʼaotjín nga jnjín xinyáná. Tikjaʼaitsjain kʼianga Jeobá kui síjé nga tsín koan jnjín chine. Tsa mená sitjosonle kʼoati tsínkoan nga jnjín xinyáná ninga ti tsanñá tsa kaxinyatjao kʼoati tsínkoan xinyá ijngokʼaniná (Hechos 21:25). Kuinga jé chjota tjenngile Cristo likui tsjoáʼndesíni nga jnjín xinyále. Tonga tsjoáʼnde nga xinyále xki xi tsín jnjín tjínle. Mele koatiokon, tonga likui kʼoasʼin kʼoasjentjaini kjoabijnachonle nga kjoatéxomale Niná kjoaʼatoné (Mateo 16:25).

[Én xi ya faʼaitʼakao sén xi faʼaitʼa ya pájina 25]

Nga nda kuijna xi kao Niná, tjínnele nga tsín kʼoaiʼnde nga jnjín xinyáná, nga tsín kui chanisʼenjian yaoná xi jndí tíjna kʼoa likui kʼoasʼian xi xkón sikʼiejna kjoabijnachonná