Kjoaʼmiya 5

Jmé xi tjínndajinle Niná xi kao Sonʼnde

Jmé xá kisindani Sonʼnde jé Jeobá (1, 2)

Ánni nga tsín ʼndenaxósíni ndʼai je Sonʼnde (3)

Jmé xi koanle chjota xi chʼaosʼín (4)

Jósikao Jesús nichxin xi nroaján je xi tjíomʼe, chjota jchínga, kʼoa kao xi je kʼien (5, 6)

Jmé xi tjínneli xi sʼiain tsa meli nga sʼeli kjoanichikontʼain nichxin xi nroaján (7)

1. Jeobá kui xá kisindani Sonʼnde nga chjota koatioson tokʼia saʼndani, nga likuikʼia kuiyá. Kʼoasʼin koanmele nga chjota kixi koatio kʼoa nga tsjoasʼe kon ngantsjai nichxin (Salmo 115:16; Isaías 45:18). Likuikʼia kjoe Sonʼnde; kʼoejna tokʼia saʼndani (Salmo 104:5; Eclesiastés 1:4).

2. Kʼianga kjesa síndajín chjota, Niná kiskoejin choa nangi jña naskanakisichon kʼoa «ʼndenaxóle Edén» kitsole. Ya kisikatío jé chjota xi títjon koannda: Adán kao Eva. Niná kʼoasʼin tjínndajinle tsakai nga sʼele xti, nga sitse Sonʼnde kʼoa choa choa ʼndenaxó sikao ngakjijngo Sonʼnde (Génesis 1:28; 2:8, 15).

3. Adán kao Eva tsakajngijée kʼianga toxá jaʼatoneni kjoatéxomale Niná. Kuinga tsakʼaonsjejinsíni Jeobá ya ʼndenaxóle Edén, kʼoa kʼoasʼin kicha je ʼndenaxó (Génesis 3:1-6,23). Tonga Jeobá likui tíchajinle jme xi tsakʼendajin xi kao Sonʼnde, kuinga kʼoatsosíni nga ʼndenaxó sikao ijngokʼa kʼoa nga chjota koatioson ngantsjai nga tsínkʼia kuiyá. Jósʼinnile (Salmo 37:29).

4.Títjon kjoanla tjoʼaxin chjota xi chʼaosʼín ánni nga ʼndenaxó koansíni Sonʼnde (Colosenses 3:6). Kʼia kʼoakoan nga kjoaʼai je kjoajchánle Niná xi Armagedón ʼmi, xi kjoaʼaxin ngayeje xi chʼaotjín. Xijekoan, jngojmi nó sikʼejnaʼyanʼio jé Na̱i, kuinga tsín ʼya xi ti sikitsonsíni Sonʼnde. Tojé naxinandále Niná xi kʼoangi (Apocalipsis 16:14, 16; 20:1-3).

 5. Xijekoan, Jesucristo jngojmi nó koatéxomason Sonʼnde (Apocalipsis 20:6) kʼoa tochoa choa kjoaʼaxinná jée xi kichʼa kʼoa koanndaya kjoafaʼaitsjenná kao yaoná. Kʼoa kʼoasʼin chjota kixi koan ijngokʼa jokjoan Adán kao Eva nga kjesa bajngijéejin. Kʼoa likui tisʼeni chʼin, likui tisʼeni nga majchínga kʼoa likui tisʼeni kjoabiya. Xi tjíomʼe koanndayani kʼoa chjota jchínga koanxtiya ijngokʼani (Job 33:25; Isaías 33:24; Apocalipsis 21:3, 4).

6. Xi jngojmi nó koatéxoma Jesús, jé chjota xi kixi sixájtín nga ʼndenaxó sikao jngo tjíjtsa Sonʼnde (Lucas 23:43). Xi ijngosani, miyón chjota kjoaʼáyale kʼianga kjoaʼaikatiokon ijngokʼani i̱ Sonʼnde (Hechos 24:15). Tsa sitjoson jme xi kuitsole Niná koatio tokʼia saʼndani, tonga tsa tsín sitjoson jngokʼa sikjeson (Juan 5:28, 29; Apocalipsis 20:11-15).

7. Kʼoasʼin kuitjoson jme xi tsakʼendajin Niná saʼnda ngasʼa xi kao Sonʼnde. A meli nga sʼeli kjoanichikontʼain xi sʼe nichxin xi nroaján. Tsa meli, tosi tonda chotʼayai tʼatsʼe Jeobá kʼoa tosi tonda titjosuin jmeni xi síjéná. Xi koasenkaosali nga kʼoasʼiain kʼia nga kʼuin kjoajtín xi sʼejna ya Ndʼia jña kotʼaya jé Testigole Jeobá (Isaías 11:9; Hebreos 10:24, 25).

[Én xi ya faʼaitʼakao sén xi faʼaitʼa ya pájina 10]

ʼNdenaxó xi kicha

[Én xi ya faʼaitʼakao sén xi faʼaitʼa ya pájina 11]

Xi je kjoaʼato Armagedón, ʼndenaxó koan Sonʼnde