Kjoaʼmiya 10

Kjoa xi jtike Niná

Jósʼin tjínnele jchatokuin jmeni xi kʼoatso Niná kʼianga chʼaotjín (1)

Jñánile xá jndí xi chʼaotjín kʼoasʼín chjota (2)

Chjota tjenngile Cristo jósʼin tjínnele skoekon énndiso (3) xi taon sískani (3) kjoaché (3) kjoatsʼen (4) kjoabʼenda (5) kjoachʼi (6)

Jmé xi koasenkaoli nga koan sikʼejnai xi chʼaotjín (7)

1. Jé choʼndale Niná kui xi ndatjín tsjoake, tonga kʼoati tjínnele nga koanjtike xi chʼaotjín (Salmo 97:10; 1 Pedro 3:11). Kui xi tsoyanile jebi nga tsín kui kʼoasʼian jmeni xi jtike Niná. Kui kʼa jebi xi jtike Niná.

2. Kjoachajngi: Xi síchajngi nga kje bixanjin, xi síchajngitʼa, xi cho̱ síkaojée, xi tijé fayokaoni xi xínkjín mani, xi ngoson xʼin xínkjín fayokao kʼoa kao xi ti yánchjín xínkjín fayokaoni, jngo jée xi nʼio ai bajngi ngixkon Niná (Levítico 18:6; Romanos 1:26, 27; 1 Corintios 6:9, 10). Tsa jngo chjoón kao jngo xʼin xi totjíokao xínkjín, tjínnele kuinyatʼaxinle xínkjín, kʼoatsa maije, katasatéxomale tsʼe chjotaxá (Hebreos 13:4).

3. Énndiso, xi taon sískani, kjoaché: Jeobá Niná likui male bʼéndiso (Tito 1:2). Kuinga likui tjínnesínile kʼoendiso jé chjota xi mele nda koatio kao jé (Proverbios 6:16-19; Colosenses 3:9, 10). Ngayeje kjoaniska xi taon niskanile kjoachingataon tjenkao. Kuinga chjota tjenngile Cristo likui rifa batsesíni kʼoa ni taonjinla fínile jña tokanacha naxín kʼoatsa jmesani xi taon niskanile (Lucas 12:15). Ni síchejinla  kʼoa ni kuijinla batse tsojmi xi tokamache kʼoa likui tobʼéni ntsja nga bʼa jngo tsojmi tsa tsín kasíjékjoa (Éxodo 20:15; Efesios 4:28).

4. Nga nʼio nijtile yaoná kʼoa kao kjoatsʼen: Nga nʼio nijtile yaoná kjoatsʼen bichokaoná (Génesis 4:5-8; Santiago 1:19, 20). Jé chjota tsʼen likuikoan miyole Niná koan (Salmo 11:5; Proverbios 22:24, 25). Likui ndatjín nga sijndá ngajaoñá tsa ʼya xi jokasíkaoná (Proverbios 24:29; Romanos 12:17-21).

5. Kjoataon kʼoa kao kjoabʼenda: Tjínkʼa chjota xi jé síjéle nganʼio espíritu nga katamandaya. Kʼoa tjínkʼa xi kjoataon síkao xi jtike nga tsjoáchʼinle kʼoatsa saʼnda sikʼien. Ngayeje kjoataon kʼoa kao kjoabʼenda Satanás síxákao. Kuinga tsín tjínnesínile chjota tjenngile Cristo nga kui kʼoasʼin (Deuteronomio 18:9-13; Apocalipsis 21:8). Xi nʼio nda sikuindaná xi tʼatsʼe kjoataon kuinga chrian kuijnale Jeobá (Proverbios 18:10).

6. Kjoachʼi: Nga ʼyo choa xán, vino, cerveza kʼoatsa jmesani xi xán tjínle likui chʼaotjín (Salmo 104:15; 1 Timoteo 5:23). Tonga Niná likui sasénle nga bitjatone choale nga ʼyoá kʼoa kao kjoachʼi (1 Corintios 5:11-13; 1 Timoteo 3:8). Tsa sikʼatonai choale nga sʼui tsjoáchʼinli kʼoa likui nda kuiyo yaniʼyali. Xi ijngosani, ngotjo kʼoasʼianni jmeni xi chʼaotjín (Proverbios 23:20, 21, 29-35; Efesios 5:18).

7. Jé chjota xi kui kʼoasʼín jmeni xi kʼoatso Niná nga chʼaotjín likui kʼoaile kjoanda nga koatéxoma Rey xi kiskoejin Niná (Gálatas 5:19-21, NM). Tsa ñaki tsjoacha kjoaixi Niná kʼoa meli nda kuijnai xi kao jé, koan sikʼiejnai kjoa jebi (1 Juan 5:3). Katamajtichai jmeni xi tsín nda be Niná (Romanos 12:9). Jé tjajtai chjota xi kʼoasʼin tjíofikao yaole josʼin mele Niná (Proverbios 13:20). Jé chjota tjenngile Cristo xi ñatjen chotʼaya xi je taja xi kao Énle Niná koan koasenkaoli (Santiago 5:14). Tonga xi nʼiosa chjíle kuinga kʼoetsʼoalai Niná nga katabasenkaoli (Filipenses 4:6, 7, 13).

[Én xi ya faʼaitʼakao sén xi faʼaitʼa ya pájina 20, 21]

Niná jtike je kjoachʼi, kjoaché, xi taon sískani, kʼoa kao kjoatsʼen