Kjoaʼmiya 11

Kjoamakjain kao costumbre xi tsín sasénle Niná

Jñánile kjoamakjain kao costumbre xi tsín sasénle Niná (1)

A koan kʼoasʼin koankjainle chjota tjenngile Cristo nga Trinidad jé Niná (2)

Chjota tjenngile Cristo ánni nga tsín bʼasjesíni Navidad, Nichxin xkón, kʼoa kao sʼuí nga fele nó chjota (3, 4)

A koanle kʼien josikao xi tjíokon (5)

A kro kʼientʼa Jesús (6)

Jókji chjíle nga nda kuijna xi kao Niná (7)

1. Likui tongayeje kjoamakjain kao costumbre nga chʼaotjín. Tonga likui sasénle Niná xi ya nroani tsʼe religión ndiso kao je xi kjantʼa jotso Biblia (Mateo 15:6).

2. Trinidad: A Trinidad Jeobá, xi tsonile, a ján mason nga tojngo Niná. Majain. Jeobá, jé Nʼai, tojé kjoan «Niná xi ñaki kjoakixi» (Juan 17:3; Marcos 12:29). Jesús ʼNdítjonle ma, kʼoa sítjosonle Nʼaile (1 Corintios 11:3). Jé Nʼai ngisa títjon tíjna tikʼoajinni ʼNdíle (Juan 14:28). Je espíritu santo a litsa Ninájin; kui nganʼio xi síchjén Niná (Génesis 1:2; Hechos 2:18).

3. Navidad kao Nichxin Xkón: Jesús a litsa kan aon jin sá diciembre kitsin, kʼia chrian kitsin nga jngo sá octubre, nichxin nga koʼnda jinsén cho̱le chjota nga jnjio (Lucas 2:8-12). Jesús likʼia kʼoasʼin tsakʼenele chjota tjenngile nga sʼuí katabʼasjele kʼiani nga kitsin. Xi kʼoakitsole kuiní nga katasíkjaʼaitsjenya kjoabiyale (Lucas 22:19, 20). Je Navidad kʼoa ngayeje jme xi sʼín chjota nga kʼia ya jaʼaini religión ndiso xi tjín kjoatse. Kʼoa xi tʼatsʼe Nichxin Xkón kʼoati ya jaʼaini religión ndiso, nga síkʼandai chjota kʼoa nga tsín ti kjineni yao. Chjota tjenngile Cristo xi títjon tsakatío likui tsakʼasje Navidad kʼoa kao Nichxin Xkón, kʼoa kʼoati tsín kʼoasʼín xi ñaki chjota tjenngile Cristo ma ndʼaibi.

4. Sʼuí nga fele nó chjota: Tojaokʼa faʼaitʼa ya Biblia sʼuí nga fele nó chjota,  tonga xi kʼoasʼin sʼuíle tsakʼasje jéní chjota xi tsín Jeobá tsabexkón (Génesis 40:20-22; Marcos 6:21, 22, 24-27). Chjota tjenngile Cristo xi títjon tsakatío likui sʼuí tsakʼasje nga jele nó. Costumbre jebi ya jaʼaini religión ndiso xi tjín kjoatse. Chjota tjenngile Cristo tsjoále tsojmi xínkjín kʼoa bʼetsaojin tojme nichxinni.

5. Xi tsokjónle kʼien: Xi je kʼien lijme xi ti sʼínni kʼoa lijme xi ti beni. Ñá likuikoan kuinyakoa kʼoa jé likuikoanle josikaoná (Salmo 146:4; Eclesiastés 9:5, 10). Kʼianga je mʼe tsínná nima xi bʼejnakonsa (Ezequiel 18:4). Tonga jé ánkjele Na̱i sakʼoa jé síkʼoya yaole chjota xi je kʼien nga mele kʼoasʼin koankjainná nga espíritu tjínle xi je kʼien. Ngayeje costumbre xi tjín tʼatsʼe kʼien nga tsokjónle chjota kʼoa nga bʼetsʼoale likui ndatjín (Isaías 8:19).

6. Kro: Jesús a litsa krojin kʼientʼa, jngoní yá xi tojon kji kʼientʼa. Biblia xi títjon kisʼenda jngo én griego nroatʼa xi yájon tsonile, tonga kʼianga je kjaʼai én kisikʼatoya chjota «kro» tsakʼe ʼndele nga yájon kʼoe. Je kro ya jaʼaini religión ndiso xi tjín kjoatse. Chjota tjenngile Cristo xi títjon tsakatío likui kro kisichjén kʼoa nikuijinla tsabexkón. Kʼoa, jósi ngai ji, a ndatjín nga kro sichjén nga jchaxkoán Niná (Deuteronomio 7:26; 1 Corintios 10:14).

7. Tsakui nichxin ñʼai koanli nga sikʼejnai kjoamakjain kao costumbre jebi. Kʼoatsa tjíokʼa xíngi kao miyoli xi kʼoakuitsoli nga tsín sikʼantjaiyai josʼin makjainli. Tonga ngisa chjíle nga kao Niná nda kuijna tikʼoajinni kao chjota (Proverbios 29:25; Mateo 10:36, 37).

[Én xi ya faʼaitʼakao sén xi faʼaitʼa ya pájina 22]

Niná a litsa Trinidadjín

[Én xi ya faʼaitʼakao sén xi faʼaitʼa ya pájina 23]

Je Navidad ya jaʼaini religión ndiso xi tjín kjoatse

[Én xi ya faʼaitʼakao sén xi faʼaitʼa ya pájina 23]

Lijme xá kuinokjonnile kʼoa kʼoetsʼoanile xi je kamʼe