Kjoaʼmiya 8

Nga nda kuiyoa yaniʼyaná josʼin sasénle Niná

ʼYáni xi ngʼajko tíjna ya yaniʼya (1)

Jé xʼin jósʼin tjínnele skoekon chjoónle (2)

Jmé xi kjinele xi nʼai (3)

Jmé xi kjinele jé chjoón ya yaniʼya (4)

Jmé xi síjéle Niná xijchá kao xti (5)

Jósʼin be Niná xi binyatʼaxinle xínkjín kʼoa xi bʼejnda xon kjoabixanle (6, 7)

1. Ya Biblia kʼoatso kʼianga jé xʼin ngʼajko tíjnale yaniʼyale (1 Corintios 11:3). Jé xʼin tjínnele nga tojngo chjoón sʼele kʼoa nga katasatéxomale tsʼe chjotaxá (1 Timoteo 3:2; Tito 3:1).

2. Jé xʼin tjínnele kʼoasʼin tsjoake koan chjoónle josʼin tsjoake yaole. Kʼoatisʼin skoekon chjoónle josʼin bekon Jesús chjota tjenngile (Efesios 5:25, 28, 29). Nikʼiajinla nga totaon skoe chjoónle kʼoa kʼoele, tjínnele nga skoexkón (Colosenses 3:19; 1 Pedro 3:7).

3. Jé nʼai tjínnele sixá nga koanjngiʼa xi tjío yaniʼyale. Tjínnele nga tsjoále xi skine, xi kʼoakjá kʼoa ndʼia jña koatioʼya chjoónle kao xtile. Kʼoati tjínnele nga koakóyale xi tʼatsʼe Niná (1 Timoteo 5:8). Jé koasen títjon kʼianga koasenkao xi tjío yaniʼyale nga katamale xi tʼatsʼe Niná kao xi tjínndajinle (Deuteronomio 6:4-9; Efesios 6:4).

4. Jé chjoón tjínnele nga koasenkao xʼinle (Génesis 2:18). Kʼoati tjínnele koasenkao xʼinle nga kuitsoyale xtile (Proverbios 1:8). Jeobá kui xi mele nga jé chjoón kao kjoatsjoacha katasísinle xi tjío yaniʼyale (Proverbios 31:10, 15, 26, 27; Tito 2:4, 5). Jé chjoón tjínnele nʼio skoexkón xʼinle (Efesios 5:22, 23, 33).

5. Kʼoasʼin síjéle Niná jé xi xti nga katasítjosonle xijchále (Efesios 6:1-3). Niná kui xi mele kʼianga jé xi xijchá katabakóyale kʼoa katabandiale xtile. Jé xi xijchá tjínnele sikʼayale nichxin xtile kʼoa koakóyale Biblia. Jé xti machjénle xi tʼatsʼe Niná, kʼoa machjénle  nga chjakaonajmí ánni nga nda satíosíni kon (Deuteronomio 11:18, 19; Proverbios 22:6, 15). Nikʼiajin nga kao kjoatsʼen koatekjayanile xtile (Colosenses 3:21).

6. Kʼianga kjoa sʼele josʼin tjíokao xínkjín xi je kabixan, ngisa nda nga kui sichjén kjoafaʼaitsjen xi faʼaitʼa ya Biblia. Ya Biblia kʼoatsoná nga tsjoacha koan xíngia kʼoa sichatʼale (Colosenses 3:12-14). Énle Niná likui kʼoatso tsa koan kuinyatʼaxinle xíngia tsa tosʼani choa kjoa tjínná. Tonga tsa jé chjoón xi mele koan koasentʼaxinle xʼinle tsa likui bajngiʼa xi tjío yaniʼyale; kʼoati koan koasentʼaxinle tsa xkón je tibʼejna kjoabijnachonle tsa nʼio tsʼen xʼinle, kʼoa kʼoati koan koasentʼaxinle tsa likui tjoʼndele nga Jeobá bexkón tsa nʼio bʼejnachjoa xʼinle (1 Corintios 7:12, 13).

7. Xi je kabixan likuikoan kʼoanachale xínkjín. Je kjoachajngi jngo jée xi nʼio ai tíjna ngixkon Niná kʼoa jée jebi kʼoati nʼio ai tíjna ngixkon xi kabixankao nga yátsʼin kabasénle (Hebreos 13:4). Je kjoatéxomale Niná kʼoatso nga tokʼia kjoan nga koan xíjnda xon kjoabixanle chjota tsa jngo xi kasíchajngi, kʼoa je ndai kabatío nga koan kuixan ijngokʼani (Mateo 19:6-9; Romanos 7:2, 3). Jeobá nʼio jtike nga tokjoatjao sʼejnda xon kjoabixanle chjota tsa tsín ya Biblia kabʼangini kʼoa kjaʼai xi kabixankao (Malaquías 2:14-16; 1 Corintios 7:10).

[Én xi ya faʼaitʼakao sén xi faʼaitʼa ya pájina 16, 17]

Kui xi mele Niná nga jé xijchá kuitsoyale kʼoa koatekjáyale xtile

[Én xi ya faʼaitʼakao sén xi faʼaitʼa ya pájina 17]

Jé nʼai xi tjínle kjoatsjoacha tsjoále tsojmi xi machjénle xi tjío yaniʼyale kʼoa bakóyale tʼatsʼe Niná