Saʼnda ngasʼa ʼndía nʼio tsjoake̱ jmeni xi tjín Sonʼnde. Kjitʼa tsangínkitsomaijin kao familiana ya ngi jñájchá kʼoa ya jñani kjio xo̱ngá ya chrian Jyväskylä, ya naxinandá Finlandia. Kʼoati nʼio tsjoake̱ je cho̱. Kʼianga sʼa ʼndía ñaki bʼangʼaña tsa nía kʼoa tsa chito ʼbe. Kʼianga jekoanjchínga kui kisikjáojian ánni nga totaon beni chjota je cho̱, kuinga jngo jtín tsakatejnajinña xi cho̱ sítoánntjai. Ya jtín jebi, yaa tsaʼbexkon kʼa chjota xi kʼoatisʼin síkjaʼaitsjen josʼin sikjaʼaitsjen.

Biyojtínníjin nga nitoánntjaijin cho̱. Nikʼabísonníjin xo̱n, bimaníjin marcha ya calle nga nitoánntjaijin cho̱, ya tienda jñani xjoa̱le cho̱ saténa kʼoa kao laboratorio jñani cho̱ síchjén nga kotʼayakao nga binyále nindo. Xijekoan, chaan jngo jtín tsakʼendaijin nga kinitoánntjaijin cho̱. Tonga kinikʼatoneníjin choa̱le jmeni xi kinʼiaijin kʼoa me tokjitʼa nga tse kjoa bichómani kao chjotaxá. Nkjín kʼa nga ndoyá kinikʼéjnaʼyana kʼoa saʼnda ngixko̱n kjoatéxoma kichoa.

Je xi kʼoati koankjáojinna kui je kjoa xi tjíofaʼatojin chjota, kuinga jao jtín tsakatejnajinña xi Amnistía Internacional kʼoa xi Greenpeace ʼmi, kʼoa kʼoakisʼian jokji tjen kʼoakoanna nga kitsjoanganʼiole. Kʼoa kʼoati kisitoánntje xi tsín jme xi tjínle, jolani xi ma̱ tjíosíjchá yaole kao xi kjinrá tjíofaʼá.

Nga jeki nichxin koanjinna nga tsín jme xi koa̱nna sʼian. Ningalani tsakʼainganʼio sakʼoaijin tonga sakʼoa to kjoa kinitsaijin. Kʼoasʼin kisikjaʼaitsjen nga ñaki to kjoachʼao kijnakitse sonʼnde kʼoa nga tsín ʼya xi mandosinle jmeni xi chon. Kʼoasʼin kisikjaʼaitsjen nga toxitsjoa ninga sitoánntje cho̱ kʼoa kao chjota.

Nʼio ba kisʼe tokoan nga tsín jme xi koan kisʼian, kuinga koanmenina tsaʼbe xi tʼatsʼe Niná kʼoa kao jmeni xi tso Biblia. Nga tongini, tokʼoa jekitsjoana estudio je testigole Jeobá kʼoa ningalani kisasenna josʼin tsakʼinyana, alikui kisikʼantjaiya yaona. Tonga xijekoanni jekjaʼaísʼin kisikjaʼaitsjen.

Tsakʼexkiaa ijngokʼa Bibliana. Kui xi tsakasenkaona nga nda kisʼe ijngokʼa tokoan. Nkjín texto tsakʼexkia xi kui nchja̱ni nga tjínnele si̱kuindaa je cho̱. Tobʼelañá, ya Proverbios 12:10 itso: “Je chjota xi kixi síkuindaa cho̱ntjele”. Xi ijngosani, kʼoati koanjinna nga tsín je Niná tjínle jée jmeni xi chon sonʼnde kʼoa nga kui kʼoachonni nga tsín fitjenngi chjota jotso je kjoatéxomale Niná. Ñaki kichokajin ni̱ma̱na nga koanjinna jokji tsejta kʼoa jokji tsjoakená je Niná (Salmo 103:8-14).

Nga kui nichxin jngo xo̱n kisokona jñani kʼoatso nga koa̱n sijé je libro Jmé kjoanni xi bakóya je Biblia kʼoa kisijéña. To choatse jaʼato kʼoa kʼiaa kichokonna je testigole Jeobá kʼoa kʼoakitsona nga tsjoána estudio. Kʼoakixinle nga katatsoyana. Xijekoan, kʼoati kia ya ndʼia jñani satío kjoajtín kʼoa sa tsjoake̱ sa tsjoake̱ koan jmeni xi tso Biblia.

Nga kʼoasʼin kiskotʼaya Biblia nʼio tsakasenkaona kʼoa kisikʼantjaiyaña yaona. Alikui ti na̱jno̱ kiskenña kʼoa alikui ti xán tsakʼi̱ña, alikui ti totsakjatomaña, alikui ti chʼao tso én kinchjaña kʼoa alikui tichʼaosʼin kisikʼaxki̱ña je chjotaxá (Romanos 13:1). Nga títjon alikui chʼaotjín tsaʼbekoan je kjoachajngi tonga nga jekoanni alikui ti kʼoakisʼinña.

Je xi ñʼai koanna kuinga kisikʼéjna je jtín xi tsakatejnajian xi cho̱ kʼoa xi chjota sítoánntjai. Saʼnda kʼoasʼin kisikjaʼaitsjen nga kontra tibatejnale kʼiatsa kuitjojian jtín jebi. Tonga skanni koanjinna nga toje Chjotaxále Niná xi koa̱nle kʼoendajin je kjoa xi tjín Sonʼnde, kuinga tosa je Chjotaxále Niná kitsjoanganʼionile kʼoa nga kixinyale chjota tʼatsʼe Chjotaxá jebi (Mateo 6:33).

Kʼianga kui jtín tsakatejnajian xi cho̱ kʼoa xi chjota sítoánntjai nʼio chʼaosʼin tsaʼbekoan je chjota xi chʼao sʼín kʼoa tojé nda tsaʼbekoan je xi nda chjota. Tonga ndʼaibi alikui tiʼya xi jtike̱ña, tosaa tibʼenele yaona nga tjao kjimana toʼya chjotani (Mateo 5:44). Nkjín koya josʼin tibakoa. Tobʼelañá, tixinyale chjota jotso je énnda xi tʼatsʼe Chjotaxále Niná. Nʼio tsjoa bʼé tokoan nga kui xá jebi tisʼian nga̱ kui xi basenkao chjota nga nda batio kʼoa nga tsjoa satío kon kʼoa tjíobe je chjota nga nda kuiyo kjoaixiaa nichxin xi sʼa nroa.

Nga tiʼbe nga je Jeobá kʼoendajin jmeni xi chon sonʼnde kui jebi xi nda tíbʼé tokoan. Alikui jao tjín tokoan nga tsín tosi tonda tsjoáʼnde je Jeobá nga totaon kataʼya je cho̱ kʼoa kao chjota kʼoa nga tosi tonda kjuitsón je Sonʼnde. Kʼianga jekoatexoma je Chjotaxále Niná kʼoendaya ijngokʼani Sonʼnde nga̱ je chjota tse kjoa tjíobajngi (Isaías 11:1-9). Nʼio tsjoa tjín tokoan nga tiʼbe jokjoantjínni xi kixi kʼoa nga tibasenkoa je chjota nga kjimakjainle jotso je Énle Niná. Alikui timachjénni nga kjoa tsjonjian yaona.