Yaa kitsian ya naxinandá Paddington, ya Londres (Inglaterra). Jan koanni yánchjín tichja kʼoa tojé mana kisijchánajin. Je pana nʼio tsakʼi xán kʼoa tosakʼoa kichokonnajin.

Kʼianga sʼa ʼndía, je mana tsakakóyana nga ntsjaintsjai kʼoetsʼoa nga jekoajnafe. Jngo Biblia kisʼejnana xi tokui libro xi tse Salmos faʼaitʼa kʼoa seña jmeni xi tso. Ñandia jngo libro tsakʼexkia kʼoa tokʼoa koanna nga i̱ tso xi faʼaitʼa: “Kuicho nichxin nga tsín ti kuiyochonñá”. Je én jebi alikui kisikájnafena kʼoa kui kisikjaʼaitsjen jméni xi koa̱nna nga koai nichxin. I̱ kixian: “Tjínjin anni nga i̱ tiyoñá sonʼnde. Jmé xá tijnaña”. Alikui koanmena nga kuicho nichxin nga kuiyáa.

Xijekoan, chaan koanmena tsabe jóma xi tʼatsʼe chjinebʼenda. Kuinga ya nyʼoákʼen kiña kao je xti xi ñatjen kia skuela kʼoa koanmena tsakjakoa je kʼien. Kʼoa sakʼoa kui película kichotsenlaijin xi to bʼéxkonná. Sakʼoa nʼio kisasennajin jme xi kinʼiaijin kʼoa sakʼoa kinokjonkaonijin.

Nga tokʼia 10 nóna jenʼio chʼao kisʼian. Na̱jno̱ kisken kʼoa chaan nʼio kitsjentʼale. Xijekoan chaan marihuana kisken. Kʼoa nga 11 nóna kʼia kiskotʼa títjoan xán, ninga tsín kisasenna joʼyo, tonga kisasenna joma nga machʼiaa. Nʼio koantsjoake canción kʼoa nga kite, kʼoa me tokjitʼa nga kia sʼuí kao ya discoteca. Sakʼoa chéché bitjoa ndʼiana nga manjio kʼoa chéché faʼa̱sʼe̱n ijngokʼa nga tanjioya ánni nga tsín ʼya xi skoe̱nina. Tonga nga jemanyaonni alikui fia skuela kʼoa kʼianga fia to xán ʼbia.

Kʼianga jekitjoa primaria, alikui nda tsakʼasjee xo̱nna. Je mana alikui tsabe nga nʼio chʼao kisʼian, tonga nga jekisʼejinle nʼio ba kisʼe kon kʼoa koanjtile xi kao an. Kichobatiníjin kʼoa xin kikatejna. Yaa tsakatejnakao choatse je Tony, je ti xi tsakʼamjekoa tonga ché koan. Xijekoan, kʼianga 16 nóna jngo ʼndí kisʼena.

Kʼianga ya tijna jñani ma batio je yánchjín xi toje tjíosíjchá ʼndíxtile, yaa tsaʼbexkoan je testigole Jeobá. Kui ya kichokatejnaña nga̱ jé chjotaxá xi kʼoasʼin koanmele nga toxá katasatíoni ʼnde jebi. Jao yánchjín xi testigole Jeobá ma xi ya ntsjaintsjai bichókonle je yánchjín xi kʼoati ya tsakatio. Ñandia nga kichonrʼoele nga tjíofáonajmí kʼoa tokui xá kichoña nga kʼoaxínle nga tsín kʼoatjín jmeni xi bakóya je testigole Jeobá. Tonga jmeni xi kiskonangile ngasin nganda kitsoyana kʼoa kui Biblia kisichjén nga tsakakóyana. Nʼio kisasenna jokji ndʼé kʼoa jokji nda chjota yánchjín jebi. Kuinga koanmenina tsaʼbesa jmeni xi tso Biblia kʼoa tsakakóyana.

Kʼianga tsaʼbe jmeni xi tso Biblia kui xi tsakasenkaona nga kisikʼantjaiya yaona. Kʼianga sʼa ʼndía alikui koanmena nga kuicho nichxin nga kuiyáa, tonga skaanni koanjinna nga kʼoakitso je Jesús nga kjoaʼáyanile xi jekʼien (Juan 5:28, 29). Jmeni xi tso Jeremías 29:11, ñaki kichokajin ni̱ma̱na. Itso texto jebi: “Nga̱ nda ʼbe jmeni xi tisikjaʼaitsjen xi tʼatsaon, kui xi tso je Jeobá, kui xi mena nga nyʼán sʼin kuiyo kʼoa nga tsín kjoañʼai chja̱ʼao. Kui xi mena nga ndasʼin kuiyo nichxin xi sʼa nroa”. Koankjainna nga koa̱n koatejna tokʼia saʼndani kʼianga jeʼndenaxó koa̱n Sonʼnde (Salmo 37:29).

Nʼio tjao tsabena je testigole Jeobá. Kʼianga tokʼia kitítjoan jña batiojtín, tsaʼbeña nga nʼio nda fikao xínkjín kʼoa ñaki nda kisʼe tokoan nga ya kicho̱katejnajinle (Juan 13:34, 35). Alikui koanngóson joma ya yo̱ngo̱ jñani fia tsakai. Je testigole Jeobá alikui tokui kuenta kisʼin jñani chʼao kisʼian ngasʼa, tosaa kisikʼayana nichxinle nga tsakinyakaona, nga kinrʼoéna kʼoa nga tjao tsabena. Joxi familiana ma koaanna.

Kʼianga kiskotʼaya Biblia, koanjinna nga tjínnele sikʼantjaiya yaona ánni nga kui kʼoasʼinña jotso je kjoatéxomale Niná. Nʼio ñʼai koanna nga kisikʼéjna na̱jno̱. Kʼoa sakʼoa kʼoati koanmena kisken ijngokʼa marihuana tonga koanjinna nga kui kʼoakoanni nga tokjaʼaí tso canción xi kinrʼoele. Kuinga tosa tsín tikui canción kinrʼoenile. Alikui tijña kiña sʼuí kʼoa niyajinla discoteca, nga̱ koanjinna nga ñʼai koa̱nna nga síkʼéjna xán kʼiatsa ya kjuía. Kisikatíoña xi miyona koan kʼoa je kisimiyoa xi kuinyakaona nga nda sʼian (Proverbios 13:20).

Nga kui nichxin, je Tony kʼoati kiskotʼaya Biblia kao testigole Jeobá. Kʼianga jekoanjinle jmeni xi ñʼai koanle tsakai kʼoa nga kao Biblia tsakʼinyanile kui xi tsakasenkaona nga koanjinna nga ñaki kʼoatjín jme xi tíkotʼaya. Kisikʼantjaiya yaole. Tobʼelañá, kisikatío miyole, alikui ti kisichéni kʼoa alikui ti marihuana kiskenni. Xi ijngosani, koanjinnajin nga tjínnele kuixainjin kʼiatsa menajin nga je Jeobá si̱xálaijin kʼoa nga nda ndiaa kjoénlaijin je ʼndínajin. Kʼoa kʼiaa nga nó 1982 chixainjin.

Kui tsakasjaiya ya revista La Atalaya kao ¡Despertad! a tʼatsʼe chjota xi kui kjoa tsakʼetʼale joni an kʼoa nga koan kisikʼantjaiya yaole. Nga tsakʼexkia tʼatsʼe chjota jebi kui xi tsakasenkaona nga tsín kisikʼajenle tokoan kʼoa nga tosi tonda kisikʼantjaiya yaona. Kjitʼa kʼoakixinle Jeobá nga tsejta katama xi kao an. Tony kao an, kʼiaa tsangínsʼenngindáijin nga sá julio nó 1982.

Nga miyole Jeobá koan kui xi nʼio tsakasenkaona. Je Tony kao an tiʼyaníjin josʼin tíbasenkaonajin je Jeobá kʼianga kjoa bitjatojinjin. Kʼianga ñʼai tjín kjoa bitjatojinjin jé Jeobá ninʼiotʼaijin yaonajin kʼoa jé tíbasenkaonajin nga nda tiyokoaijin xíngijin (Salmo 55:22).

Nʼio tsjoa tjín tokuinjin nga tsakinyakoaijin je tinajin kao tsotinajin nga miyole Jeobá koan. Kʼoa kʼoati nʼio tsjoa tjín tokoan nga sa tjíobe sa tjíobe xi tʼatsʼe Jeobá je xtindaina.

Ndʼaibi jenda bajnafe kʼoa tsín tikui sikjaʼaitsjenña nga manjio jókoa̱nña kʼoa tsakuije̱ tʼatsʼe kjoabiya. Je Tony kao an tsee xá tjínnajin nga nixatʼaijin xki̱ xomana je jtín xi tjío kʼoa nga ninʼiojinjin je ndsʼee. Kʼoati ʼmiyalaijin je chjota, tsa koankjainle xi tʼatsʼe Jesús kʼoati koa̱n koatio ngantsjai nichxin i̱ Sonʼnde.