Nga jejaʼato nó 4026 t. nó 1

Je “ye̱” kui tsakʼétʼale tsa tjínle ʼnde Jeobá nga je koatexoma kʼoa kao josʼin batéxoma. Je Jeobá kʼoakitso nga jngo “ntje̱” kjoaʼaí xi sikʼien je ye̱, xi tsonile, je Na̱i (Génesis 3:1-5, 15; nota). Tonga títsjoáʼnde choatse nga je Na̱i tíbándiaale chjota nga tije tjíobatéxomanile xínkjín.

Nó 1943 t. nó 1

Je Jeobá kʼoakitsole Abrahán [Abraham] nga je “ntje̱” xi kjoaʼaí, yaa ntje̱le kjuinroani (Génesis 22:18).

Nga jejaʼato nó 1070 t. nó 1

Je Jeobá kʼoakitsole je rey David kʼoa kao Salomón, xi tile koanni, nga je “ntje̱” xi kjoaʼaí, yaa familiale kjuinroani (2 Samuel 7:12, 16; 1 Reyes 9:3-5; Isaías 9:6, 7).

Nó 29

Je Jeobá tsakʼéjnatsen nga jéní Jesús je “ntje̱” xi tíchoyale kʼoa nga je kʼoaile je yáxilele David nga koatexoma (Gálatas 3:16; Lucas 1:31-33; 3:21, 22).

 Nó 33

Je xi kʼoakisʼin nga katanikʼien je Jesús jé “ye̱”, xi tsonile, je Na̱i. Kʼoa kʼoasʼin kisikiʼaon choatse je “ntje̱” xi tíchoyale. Je Jeobá kisikjaʼáyale Jesús nga ya kʼoéjna ijngokʼani ngʼajmi kʼoa kiskoé jotjín chjíle je kjoabijnachon tsjele. Kʼoa kʼoasʼin tsakʼéjnabasen nga koa̱n jchatʼa je jée kʼoa nga koa̱n koatio ngantsjai nichxin je ntje̱le Adán (Génesis 3:15; Hechos 2:32-36; 1 Corintios 15:21, 22).

Nó 1914 kʼoa tsa tokʼia choatse jaʼato

Je Jesús i tʼanangi kisikʼatjenjenngi je “ye̱” nga i̱ katabʼejna choatse (Apocalipsis 12:7-9, 12).

Nichxin xi nroaján

Je Jesús jngo jmi nó sikʼéjnaʼyanʼio je Na̱i kʼoa kʼiaa sikʼien. Kʼoa kʼoasʼin koase̱nneni jko̱ je “ye̱”. Kʼiaa kuitjoson jmeni xi tjínndajinle Jeobá xi tʼatsʼe Sonʼnde kao chjota. Ñaki tsje sʼin sʼe̱jna jaʼaínle Niná xi tʼatsʼe ngayeje énndiso xi tísʼene, kʼoa ñaki jchaale nga tojéní xi nʼio nda batéxoma (Apocalipsis 20:1-3, 10; 21:3, 4).