JÓTSO én xi sʼejinli kʼianga bʼexkiai je periódiko, kʼianga chotsenlai telebisión kʼoa nga noʼyalai radio. Ñaki tokui nʼio tíbʼaxki̱ tʼatsʼe chjotaché, kjoajchán kʼoa jñani ngotjo nikjesonni chjota. Kʼoa kuila tikjaʼaitsjain ndʼaibi kjoa xi tjínli. Tsakui nichxin chʼin tíbʼetʼali kʼoa tsa maije̱ je kʼien jngo xíngi kʼoa tsa jngo miyoli kʼoa kui xi nʼio tse kjoaba tísíkʼéjnajinli. Tochale kʼoati mali jokoanle je Job jngo chjota xi nda chjota koan, xi i̱ kitso: “Jekichobekaona nga totaon tíʼyana kʼoa kao je kjoanikjaojin xi tjínna” (Job 10:15).

Tsakui nichxin i̱si:

• A kʼoasʼin koanmele Niná nga i̱sʼin si̱jchá yaoná ngatsʼiaa.

• Jñáni so̱koná kjoafaʼaitsjen xi koasenkaoná nga kʼoéndajiaan kjoa xi tjínná.

• A kuicho nichxin nga sʼe̱ kjoanyʼán i̱ Sonʼnde.

Je Biblia ñaki bʼéjngoo tokoán josʼin bakóya xi tʼatsʼe jebi.

“Niná kʼoejon ngayije ndáxko̱n xi tsʼe xko̱n. Likui tisʼe̱ni kjoabiya. Likui tisʼe̱ni kjoaba, nijejin xi kjiʼndía, nijejin xi aon male.” (Apocalipsis 21:4)

“Je xi chjiʼngé ñaki skíngʼa josʼín tsa jngo naxínchxoa̱.” (Isaías 35:6)

“Je xko̱n xi xka̱ tjóxʼánginí.” (Isaías 35:5)

 “Ngatsʼi xi tjío ya nyʼoákʼen [...] kuitjoni.” (Juan 5:28, 29)

“Nijngojin xi ya kʼoéjna kʼoakuitso: Timʼeña.” (Isaías 33:24)

“Nʼio sʼe̱ tsojmintje i sonʼnde.” (Salmo 72:16)

Ali kʼoajinsʼin nikjaʼaitsjain tsa to én jmeni xi tso ya pájina 4 kao 5. Jé Niná xotso, kʼoa je Biblia tsoyaná josʼin sitjoson.

Tonga ali tsa tokuijin. Je Biblia kʼoati bakóyaná josʼin nda kuiyoaa ndʼaibi nga tsjoa sʼe̱ tokoán. Tikjaʼaitsjenlai je kjoa xi tjínli kʼoa jmeni xi nikjáojin. Tsakui nichxin tʼatsʼe tao̱n, tʼatsʼe yaniʼyali, tʼatsʼe chʼin kʼoa tsa jngo xíngi kʼien. Je Biblia basenkaoná nga bitjatojiaan kjoa jebi, kʼoa xi ijngosani tsjoánganʼioná nga tsoyaná jmeni xi sakʼoa chjonangilee yaoná, jolani tsa jebi:

• Ánni nga kjoañʼai bitjatojinsíñá.

• Jósʼin kuitjátojiaan jmeni xi nʼio nikjáojiaan.

• Jméni xi koa̱n sʼiaan kʼianga ngisasa ndasʼin kuiyoaa ya yaniʼyaná kʼoa nga tsjoa sʼe̱ná.

• Jméni xi maná kʼianga jebiyaa.

• A kuicho nichxin nga jcha ijngokʼá xíngiaa xi jekʼien.

• Ánni nga koa̱n kʼoéjngosíñá tokoán nga kʼoasʼin Niná jmeni xi tso.

 Kʼianga kʼoasʼin tibʼexkiai xo̱n jebi kui tibakui nga meli jchai jmeni xi bakóya Biblia, kʼoa libro jebi koasenkaoli. Tsa chótsenlai libro jebi kjoachjonangi tjíole nga jngó jngó párrafo. Miyón mani xi sasénle josʼin tsoya Biblia je testigole Jeobá. Je chjota xi ʼmiyale satíole kjoachjonangi kʼoa kʼoatso josʼin majinle. Choyaníjin nga kʼoati sa̱sénli tsanda ji. Nʼio tse kjoatsjoa so̱koli nga koa̱nli jmekjoanni xi bakóya je Biblia. Niná katasíchikontʼainli.