KJOAʼMIYA XI MAJNGOKAO
A sá diciembre kitsin Jesús
JE Biblia alikuikjoan ñaki kʼoatso jme sá kitsin Jesús. Tonga tjíojin choa̱ xi bakóná nga tsín tsa sá diciembre kitsin.
Ya Belén, jñani kitsin Jesús, jómachon kʼianga sá diciembre. Je xo̱nsá xi síchjén chjota judío jngo sá nroajin xi kislev tsole kʼoa kʼiaa bʼakaotʼale nga sá noviembre kao diciembre, kʼoa sá jebi nyʼán machon kʼoa jtsí bʼa. Xijema kʼiaa fi je sá xi tebet tsole, kʼoa kʼiaa bʼakaotʼale nga sá diciembre kao enero, sá jebi ngisa nʼio nyʼán ma kʼoa jñani nindo saʼnda tjon sakʼoa nyʼán. Tonga kataʼyala jotso je Biblia jomachon ya Belén sá xokjoan.
Jngo chjota xi kiski Biblia xi Esdras tsakʼin kʼoakitso nga je sá kislev nʼio nyʼán ma kʼoa nʼio bʼa jtsí. Kʼoatso nga “je sá xi mani ñajan [kislev], kʼianga kan sá” nga koanxkó chjotankjín ya Jerusalén ñaki “tjíobʼatsé [...] xi totʼatsʼe nga kʼoasikjima jtsí”. Kʼoati tso nga je chjotankjín xi ya tjíoxkó i kitso: “Cha̱njtsíní ndʼai, kʼoa likui kʼoakoa̱nná nga i̱ nitsin kuiyoaa” (Esdras 10:9, 13; Jeremías 36:22). Kʼianga jemachrianle diciembre, je chjota xi koʼnda cho̱ síkatíoʼya je cho̱le ánni nga tsín ya koatiosíni ya jinsén kʼianga njio.
Tonga je Biblia kʼoatso kʼianga ya tjíosíkuinda cho̱le je chjota ya jinsén je nitje̱n kʼianga kitsin Jesús. Saʼnda je Lucas kʼoatso nga ya chrian Belén tjío chjota “xi koʼnda cho̱ xi tiyani nangibe, xi kisikʼaya nijñále jinsén, xi kiskoʼnda cho̱le nga nitje̱n” (Lucas 2:8-12). Tojosí tso testo jebi yaa jinsén tjíokoʼnda cho̱le je chjota kʼianga nitje̱n. Tsa nʼio nyʼán ma kʼoa tsa síxkón ma jtsí ya Belén kʼianga diciembre, a yaa koatio jinsén je xi koʼnda cho̱. Maijin. Jebi kui xi bakóná nga tsín tsa diciembrejin kitsin Jesús. *
Je Énle Niná kʼoatsokixi kʼiani kʼien Jesús, tonga nʼio tochoa kʼoatso kʼiani kitsin. Jebi kui síkjaʼaitsjenjinná je én xi kitso rey Salomón: “Ngisa nda nga nda bʼaxkiaa tikʼoajinni jngo siti̱ xi nʼio nda, kʼoa ngisa nda je nichxin nga biyaa tikʼoajinni nga tsiaan” (Eclesiastés 7:1). Kuijin nga tochoa bakóyani je Biblia kʼiani kitsin Cristo kʼoa nga ngisa tse bakóyani nga kitsoyason kʼoa nga kinikʼien.
Nitje̱n kʼianga kitsin Jesús yaa tjíosíkuinda cho̱le je chjota ya jinsén
^ párr. 1 Tsa mesali jchai, chótʼajin libro Razonamiento a partir de las Escrituras ya pájina 111-114. Libro jebi jé testigole Jeobá bʼasje.
Tsa kʼoati meli jchai xi tʼatsʼe jebi
XI NʼIO KJONANGI CHJOTA
Ánni nga tsín bʼasjesíni Navidad je testigole Jeobá
Nʼio nkjín xi be nga ya jaʼaini Navidad jmeni xi kisʼin chjota xi tsín Niná tsabexkón kʼoa tojo bʼasjee. Kataʼyai ánni nga tsín kʼoasʼínni je testigole Jeobá.
