JE LIBRO xi tsʼe Apocalipsis (Revelación), tjíojin én xi tsín tokatamajin kixiná (Apocalipsis 1:1). Tobʼelañá, jngo chjoónchajngi síkʼaxki̱ xi “Babilonia xi nʼio je” tso jaʼaín xi tjítʼa totjen. Kʼoa kʼoati tso nga “chjotankjín, kʼoa ʼnde” tíjnasonle (Apocalipsis 17:1, 5, 15). Tsa ñaki chjotalani chjoón jebi, jósʼin kʼoéjnasonnile je chjotankjín kao ʼnde. Tjínjin xi tsoyanile chjoón jebi. Tonga jmé xi tsoyanile.

 Ya Apocalipsis 17:18 kʼoatso nga chjoón jebi jé tsoyanile “je naxinandáje xi batéxoma[le] chjotatítjon xi tjío sonʼnde”. Je én xi naxinandá tso kui síkjaʼaitsjenjinná chjota xi tjíojtín. Xi ijngosani, “naxinandáje” jebi jé kjinentsja “chjotatítjon xi tjío sonʼnde”. Je Babilonia xi nʼioje ʼmi jngoo jtín tsoyanile xi kjinentsja jngo tjíjtsa Sonʼnde. Tonga jmé jtínni. Tsʼee relijión. Kataʼyala kʼaa bersíkulo xi tsʼe Apocalipsis ánni nga kʼoabixónsíñá.

Nkjín koya jtín tjín, tjín xi tsʼe polítika, xi tsʼe negosio kʼoa xi tsʼe relijión. Je Babilonia xi nʼioje ʼmi ali tsa polítika tsoyanile nga̱ je Énle Niná kʼoatso nga je “chjotatítjon sonʼnde kisichajngikao”. Kʼianga kʼoatso je Biblia nga síchajngikao je chjotatítjonle sonʼnde kui tsoyanile nga fákjao jko̱. Kʼoa kuinga bakinsínile nga “chjoónchajngi xi nʼio skále” ʼmile (Apocalipsis 17:1, 2; Santiago 4:4).

Kʼianga jetjóʼaxin chjoón jebi, je Biblia kʼoatso kʼianga skíʼndátʼain je chjota “xi sʼín kjoama̱”, xi tsonile, je chjota xi negosioyʼai tjínle. Kʼoa kui xi bakóná nga tsín tsa negosio tsoyanile je xi Babilonia xi nʼioje ʼmi. Saʼnda je testo xi tsʼe Biblia kʼoatso nga “kjin” skótsennile je chjotatítjonle sonʼnde kao je chjota xi sʼín kjoama̱ (Apocalipsis 18:3, 9, 10, 15-17). Tojosísʼin tiʼyaa, je xi Babilonia xi nʼioje ʼmi ali tsa polítika kʼoa negosio tsoyanile, relijión tsoyanile.

Ijngosa choa̱ tíjna nga relijión tsoyanile. Je Biblia kʼoatso nga kao kjoabʼendale bʼanachanile ngatsʼi naxinandá (Apocalipsis 18:23). Ngayeje kjoabʼenda xi tjín tʼatsʼe relijión kʼoa tʼatsʼe ánkjele na̱i tínroani. Kuinga tsín tokʼoamasíniná nga kʼoati “ʼndele na̱i xi ndajin” tsole Biblia je xi Babilonia xi nʼioje ʼmi (Apocalipsis 18:2; Deuteronomio 18:10-12). Xi ijngosani, nʼio bʼejnachjoale je relijión xi kixi kʼoa fitjenngikontrale “chjota xi [...]nchja̱ya tʼatsʼe Niná kao xi tsʼe chjotale Cristo” (Apocalipsis 18:24). Kʼianga kʼoasikji jtike je relijión xi kixi, ñaki kao kjoatsʼen fitjenngike “chjotale Cristo” kʼoa saʼnda síkʼien (Apocalipsis 17:6). Alikui jao tjínná kʼianga je xi Babilonia xi nʼioje ʼmi jé tsoyanile ngatsʼi relijión ndiso xi tjín jngo tjíjtsa Sonʼnde, xi kontra tjíole Niná Jeobá.