KJOAʼMIYA XI MAJNGOKAO
Je Daniel tongini kʼoakitso kʼiani kjoaʼaí Mesías
JE Daniel tsʼato aon siento nó nga kjesa tsinjin Jesús tsakʼejna. Ninga kʼoalani, je Jeobá tsakʼéyanajmíle én xi jchanile kʼiákjoánni skoéjin je Jesús nga Mesías kʼoa Cristo koa̱n. I tsakʼinle je Daniel: “Kataʼyai kʼoa katamachoyali nga fitsʼiakjoanni nga kuitjo én xi tso nga sʼe̱ndayani kʼoa nga tjómitjenni Jerusalén saʼnda nga kjoaʼaí je Mesías xi Ngʼajko̱ kʼoéjna, ñato xomana kjoaʼato, kʼoati jankan kaoni jao xomana kjoaʼato” (Daniel 9:25).
Kʼianga jchaa kʼiákjoánni tjínnele kjoaʼaí je Mesías tojo kitso Daniel, títjon kjoanla machjén nga kataʼyaa kʼiá kitsʼiani nga kitjoson én xi kinchja̱. Je Daniel kʼoakitso nga kʼia koaitsʼiani “nga kuitjo én xi tso nga sʼe̱ndayani kʼoa nga tjómitjenni Jerusalén”. Kʼiáni kitjo én jebi. Ijngosa chjota xi kiski Biblia, xi Nehemías tsakʼin, kʼoakitso nga kʼia kitjo nga “jetsoʼbakao kan nó nga rey sʼin tíjna Artajerjes” (Nehemías 2:1, 5-8). Nkjín mani chjota xi kui batiotsʼinya jmeni xi koan ngasʼa xi kʼoatso nga nó 475 nga kjesa chʼajin nó 1 tsakʼétsʼiakao Artajerjes nga tsakatéxoma. Kʼianga chʼasjengiaa je nó xotjín, nó 455 bichókaoná nga kjesa chʼajin nó 1 kʼoa kʼiaa tsoʼbakao kan nó nga rey sʼin tíjna Artajerjes. Kui nó jebi kitsʼia nga kitjoson je én xi tongini kinchja̱ Daniel.
Je Daniel kʼoakitso jokji tse kjoaʼato saʼnda nga kjoaʼaí “Mesías xi Ngʼajko̱” koa̱n. Je én xi kiski kʼoatso nga “ñato xomana kjoaʼato, kʼoati jankan kaoni jao xomana kjoaʼato”, kʼoa jankan kaoni ñajan xomana bichóni ngayeje. Jótjín tse tínchja̱ni xomana xotjín. Tojo tso je Biblia xi kjaʼaí ali tsa nichxinjin tínchja̱ni xomana jebi, nó tínchja̱ni. Xi tsonile, nga jngo xomana ñato nó tínchja̱ni. Je chjota judío xi tsakatio ngasʼa nda tsabe je xomana xi ñato nó sʼexki̱. Tobʼelañá, jaon nó kisixá kʼoa xi mañatoni nó kisikjáyaa (Éxodo 23:10, 11). Kuinga je xi jankan kaoni ñajan xomana tínchja̱ni én xi kiski Daniel, kʼianga ñato nó nikoaa nga jngó jngó xomana, ño siento kao ñokan kaoni jan nó bichóni ngayeje.
Tokuisa xi machjén nga chʼa̱sjengiaa nó xotjín. Tsa ño siento kao ñokan kaoni jan nó kʼoéxkiaa fitsʼiakjoanni nó 455 nga kjesa chʼajin nó 1, nó 29 saʼnda bichókaoná, kʼoa kuikjoán nó jebi kichanisʼenngindá Jesús nga Mesías koan (Lucas 3:1, 2, 21, 22). * A tsí kjoaixi nga ñaki kʼoakjoansʼin kitjoson én jebi xi tongini kisʼetʼa Biblia.
^ párr. 3 Tjen nó 455 nga kjesa chʼajin nó 1 saʼnda nó 29, ño siento kao ñokan kaoni jan nó bichóni ngayeje, kuinga kʼoatjín bichósíni nga jao nó 1 kisʼe kʼoa likui kisʼe nó 0. Je Jesús nó 33 kinikʼien, ya ngabasenle je xomana xi mani jankan kao te, je xi nó tínchja̱ni (Daniel 9:24, 26). Tsa mesali jchai xi tʼatsʼe jebi koaan chótʼajin ya kapítulo 11 tsʼe libro xi Prestemos atención a las profecías de Daniel ʼmi, kʼoa kao je xi Perspicacia para comprender las Escrituras ʼmi, vol. 2, pájina 1014-1017. Nga jao xo̱n jebi jé testigole Jeobá bʼasje.
