1, 2. 1) Ánni nga nʼio chjí ʼyatokonsíni jngo tsojmi xi bʼaikjoatjaoli. 2) Ánni nga kuisíni je kjoabʼechjíntjai je kjoatjao xi ngisasa nʼio chjíle xi tsakʼainá.

JMÉ tsojmini xi ngisasa chjí ʼyatokuin xi sa tsakʼai kjoatjaoli. Jngo kjoatjao ali tsakuijin nga nʼio ʼyachjíñá tsa tse tao̱n kasʼengi. Nga̱ je xi ngisa chjíle ali tsakuijin jotjín kasʼengi. Kuiní nga chjí ʼyatokonni nga tsjoa bʼé tokuin kʼoa nga machjénli tsojmi jebi.

² Ninga tojmeyeje xi kʼoaikjoatjaoli tíjna jngo xi ngisasa nʼio chjíle. Kui kjoatjao xi kitsjoale Niná je chjotasonʼnde. Kjoaixiní nga nʼio nkjín tsojmi títsjoáná Jeobá, tonga xi ngisasa chjíle kuiní nga kʼoasʼin kitsjoa je ʼNdíle kʼianga kʼienntjainá (tʼexkiai Mateo 20:28). Tojosʼin jchaa ibi, je kjoatjao xi ngisasa chjíle xi kitsjoaná Niná kui kjoabʼechjíntjai, nga̱ kui xi koasenkaoná nga nʼio tsjoa sʼe̱ tokoán kʼoa nga sʼe̱ná jmekjoanni xi machjénná. Xi kjoaixi kui bakó jokji tsjoakená Jeobá nga jngó jngoá.

3. Jméni xi kjoabʼechjíntjai ʼmi, kʼoa jméni xi tjínnele nga kataʼyaa nga koa̱njinná jokji chjíle kjoatjao jebi.

³ Je kjoabʼechjíntjai kui xi sichjén Jeobá nga kʼoasjentjai  je chjotasonʼnde xi tʼatsʼe jée kao kjoabiya (Efesios 1:7). Kʼianga koa̱njinná jmeni xi kjoabʼechjíntjai tsole Biblia machjénní nga kataʼyaa jmeni xi koan ya ʼndenaxóle Edén. Tokʼiaa koa̱njinná jokji chjíle je kjoabʼechjíntjai xi kao ñá kʼiatsa jchaa jmeni xi kisicha Adán kʼianga tsakajngijée.

4. Jósʼin tsakʼejna tsakai Adán kʼianga ñaki nda je kjoabijnachon xi tsakʼaile.

⁴ Kʼianga kisinda Jeobá je Adán kui kitsjoale jngo kjoabijnachon xi ñaki nda, xi tsín jme xi koa̱nle. Totikjaʼaitsjenlai josʼin tsakʼejna tsakai. Likuijinkʼia chʼin kisʼele, likuijinkʼia koanjchínga kʼoa likuijinkʼia kʼien nga̱ ñaki nda yaole kao kjoafaʼaitsjenle. Xi ijngosani, nʼio nda tsakʼejna xi kao Jeobá. Je Biblia kʼoatso nga “ʼndíle Niná” koan Adán (Lucas 3:38). Kui xi tsonile nga je Niná kao Adán nʼio nda kikao xínkjín, tojosʼin fikao xínkjín jngo nʼai kao ʼndíle. Kʼoatjín, je Niná tsakjákao je ʼndíle, kui xá kitsjoale xi tsjoa kʼoe kon kʼoa kitsoyale jmeni xi mele nga sʼin (Génesis 1:28-30; 2:16, 17).

5. Jótsonile Biblia kʼianga kʼoatso nga sénle Niná tsakʼa Adán.

⁵ Kʼianga kininda Adán sénle Niná tsakʼa (Génesis 1:27). Ali tsakuijin xi tsonile nga kʼoakjoan kisʼe jokji je Niná. Tojosʼin tsaʼyaa ya kjoaʼmiya jngo, je Jeobá espírituní, likui matsen (Juan 4:24). Je Niná ali tsa kʼoajinkji jotisoyoa ñá nga ninda kʼoa nga yao tjínná. Kʼianga sénle Niná tsakʼa Adán kui xi tsonile nga kisʼele kjoatsjoacha, kjoachjine, kjoatéxomakixi, nganʼio kʼoa xi kjaʼaísanile, tojokjoan je Niná. Ijngosa josʼin koanngóson kao je Nʼaile kuinga tiʼndele nga je skoéjin jmeni xi sʼin. Ali tsa kʼoajinsʼin koannda joni tsa jngo makina xi tokui kʼoasʼín jme xá kamandani. Tiʼndele nga kui kiskoejin xi ndatjín kʼoa tsa xi chʼaotjín. Tsakuilani  kiskoejin nga kisitjosonle Niná koanjin tsakʼejna ngantsjai nichxin ya ʼNdenaxó xi kisʼejna i̱ Sonʼnde.

6. Jméni xi kisicha Adán kʼianga tsín tikisitjosonnile Niná, kʼoa jmé kjoa xi tsakajnginá xi xtile maa.

⁶ Nʼio tse tsakʼéchjí Adán nga tsín kisitjosonle Niná, nga̱ kjoabiya tsakʼaile. Kisicha je kjoabijnachonle xi nʼio nda kao ngayeje kjoanda xi tjenkao (Génesis 3:17-19). Xi tokʼoamaná, kuinga tsín tojejin xi kisicha kjoanda jebi, kʼoati kinichaa tsanda ñá xi xtile maa. Je Énle Niná itso: “Je xi jée ʼmi jaʼasʼenjin sonʼnde xi totʼatsʼe jngo chjota [je Adán]. Kʼoasʼin tjín kjoabiya xi totʼatsʼe jéebe. Kʼoa je kjoabiyabe kʼoasʼin kitsaotʼale ngatsʼi chjota, nga tsajngijée ngatsʼi” (Romanos 5:12). Ngatsʼiaa kui kitsaotʼaná jée xi tsakajngi Adán. Kuinga kʼoatsosíni Biblia nga tsakaténaná Adán kʼoa nga choʼndale jée kao kjoabiya kisikaoná (Romanos 7:14). Xi je Adán kao Eva alikui tijme kjoachoya kisʼenile nga toxá tsín kisitjosonnile Niná. Tonga jókoa̱nñá xi xtile maa.

7, 8. Jñánile nga jao koya josʼin machjén je én xi kjoabʼechjíntjai tso.

⁷ Je Jeobá kʼoasʼin tsakʼéndajin nga kʼoechjíntjai je chjotasonʼnde. Jósʼin tsoyanile én xi kjoabʼechjíntjai tso. Jao koya josʼin tsoyanile. Xi títjon, kui tsoyanile jotjín bʼéchjíntjai jngo chjota kʼianga kʼoainile je tsojmile kʼoa tsa katanikʼéjnandaí jngo chjota xi tíjnanʼio. Xi majaoni, kui tsoyanile jotjín machjíntjai tsa jmeni xi kasʼín jngo chjota. Tobʼelañá, nichxin kjoatse kʼiatsa tokjoataon xi koa̱nle jngo chjota nga tjín xi sikiʼaon, tjínnele nga kʼoakjoantjín kʼoechjí jotjín bakinle.

⁸ Tojosísʼin tiʼyaa, nʼio tse xi kinichaa xi totʼatsʼe Adán. Jóxótse sʼin koa̱nchjíntjai jebi, kʼoa jóxótse sʼin nga tsín tichoʼndale jée kao kjoabiya koa̱nñá. Kataʼyala je kjoabʼechjíntjai xi kitsjoa Jeobá kʼoa je kjoanda xi koa̱n so̱koli ji.

9. Jmé kjoabʼechjíntjai xi koanchjén.

⁹ Je xi kisicha Adán jngo kjoabijnachon xi tsje tíjna. Kʼianga tjoé ijngokʼaniná kjoabijnachon jebi alikui kʼoakoa̱nle tsa je kʼoechjíntjainá jngo chjota xi jée yʼa (Salmo 49:7, 8). Jngoo kjoabijnachon machjén xi kʼoakjoanti kji chjíle jokji chjíle je kjoabijnachon xi kicha. Kʼoasʼin tsakakó je kjoatéxomale Niná xi faʼaitʼa ya Biblia. Je kjoatéxoma jebi kʼoatso nga “kjoabijnachon kao kjoabijnachon koa̱njndani” (Deuteronomio 19:21). Kʼoa jméni xi koanjndani je kjoabijnachon xi kisicha Adán. Kʼoati jngo kjoabijnachon xi tsje tíjna, xi kʼoakjoanti tjín chjíle (1 Timoteo 2:6).

10. Jósʼin kitsjoa Jeobá je kjoabʼechjíntjai.

¹⁰ Jósʼin kitsjoa Jeobá je kjoabʼechjíntjai. Jngo ʼndíle kisikasén i̱ Sonʼnde, xi kʼoati ñaki nda je kjoabijnachonle. Tonga ali tsa toʼyajin xi kisikasén, jé kisikasén xi ngisasa tsjoake, je ʼNdíjngole (tʼexkiai 1 Juan 4:9, 10). Je ʼNdí jebi kao kjoatsjoa kisikʼéjna ngʼajmi (Filipenses 2:7). Tojosʼin jetsaʼyaa ya kjoaʼmiya xi jekitjakoaa, je Jeobá yaa kisikʼéjnaya tsʼoa̱ María je kjoabijnachonle ʼNdíle. Jé nganʼiotsjele Niná tsakasenkao je Jesús nga tsín jme jée kisʼele, nga ñaki tsje nga kitsin (Lucas 1:35).

11. Jósʼin nga tojngo chjota kʼoechjíntjaisíni chjota xi miyón mani.

¹¹ Jósʼin nga tojngo chjota kʼoechjíntjaisíni chjota xi miyón mani. Tonga jókoanni nga chjotajée koansíni ngatsʼi. Tikjaʼaitsjain nga kʼianá kisicha Adán je kjoabijnachon tsjele kʼianga tsakajngijée kʼoa je ntje̱le likui tikoan kisʼenile kjoabijnachon jebi. Tokui kisikakinle je jée kao kjoabiya. Je Jesús jngo kjoabijnachon xi nʼio nda kisʼele, nikʼiajinla tsakajngijée kʼoa je Biblia “Adán xi jetʼani” tsole (1 Corintios 15:45). Kui xi tsonile nga  je kiskoé ʼndele Adán nga tsakʼasjentjainá. Ñaki nda kisitjosonle Nʼaile kʼoa saʼnda kitsjoa kjoabijnachonle. Kʼoa kʼoasʼin tsakʼéchjí je jée xi tsakajngi Adán kʼoa jngo kjoachoya kitsjoaná xi ntje̱le maa (Romanos 5:19; 1 Corintios 15:21, 22).

12. Jmé xi tsakakó Jesús ninga nʼio tse kjoañʼai tsakjaʼá.

¹² Je Biblia nʼio nda bʼéyanajmí jme kjoañʼai xi tsakjaʼá Jesús nichxin nga kinikʼien. Kisʼele kʼoa xó kixinyale nga kisʼetʼa je yá kjoañʼai, nʼio tse kjoañʼai tsakʼaile nga kinikʼien (Juan 19:1, 16-18, 30, TNM; chótsenlai ya jñani tso: “A tjínnele nga kro sichjén je chjotale Cristo”). Ánni nga kʼoasikji kjoañʼai tsakjaʼásíni. Tojosʼin jchaa kjoaʼmiya xi fisani, je Na̱i kʼoakitso nga nijngojin chjota xi kixi koaitʼale Jeobá kʼiatsa chótʼayakao. Kʼianga kiskale Jesús ninga nʼio tse kjoañʼai kinikjaʼá tsakakóní nga to kjoandiso jmeni xi kitso je Na̱i. Tsakakóní nga jngo chjota xi tsje joni tsa Jesús, xi tjínle kjoandái nga koa̱n skoéjin jmeni xi sʼin, koaanle nga kixi koaitʼale Jeobá ninga tojme kjoa xi sikʼéjnabasenle je Na̱i. ¡Li toʼi̱jin kji tsjoa koanle Niná nga ñaki kixi kitʼale je ʼNdíle! (Proverbios 27:11.)

13. Jósʼin koanchjíntjai je ntje̱le Adán.

¹³ Jósʼin koanchjíntjai je ntje̱le Adán. Kʼianga 14 sá nisán, je sá xi síchjén chjota judío, nó 33, je Niná kitsjoaʼnde nga kinikʼien je ʼNdíle xi tsín chjotajée koan. Kʼoa kʼoasʼin “nga tojngo kʼa ndiaa” kitsjoatʼa kjoabijnachonle xi nʼio nda (Hebreos 10:10). Kʼianga kicho jan nichxin, jo ánkje sʼin kisikjaʼáyanile Jeobá. Ya ngʼajmi, je Jesús kichokao ngixko̱n je Nʼaile jotjín chjíle je kjoabijnachon tsjele xi kitsjoa nga tsakʼasjentjai je ntje̱le Adán (Hebreos 9:24). Je Jeobá kisasenle je kjoabʼechjíntjai xi kitsjoa Jesús kʼoa kui sichjén nga kʼoasjentjai je chjota xi tʼatsʼe jée kao kjoabiya (tʼexkiai Romanos 3:23, 24).

14, 15. Jméni xi tjínnele sʼiaan nga koa̱n jchatʼa je jéená.

¹⁴ Xi totʼatsʼe kjoabʼechjíntjai jebi koaan sʼe̱ná kjoanichikontʼain ninga chjotajée maa. Kataʼyala kʼaa josʼin nda síkatíoná ndʼaibi kʼoa kao nichxin xi sʼa nroa je kjoatjao xi nʼiosa chjíle xi kitsjoaná Niná.

¹⁵ Nga chatʼa jéená. Kʼianga jée jekichʼá, nʼio ñʼai maná nga kui kʼoanʼia je xi ndatjín. Bijnyijéeñá ngatsʼiaa, tsakui nichxin kao ndsoʼbaa kʼoa tsa jonʼia. Totʼatsʼení nga tsakʼéchjíntjainá Jesús nga jchatʼa je jéená (Colosenses 1:13, 14). Tonga tjínnele nga kao ni̱ma̱ná kʼoakatamaniná jéená. Kʼoati machjén nga kao kjoanangitokon si̱jélee Jeobá nga katasíchatʼaná xi totʼatsʼe nga makjainná je kjoabʼechjíntjai xi kitsjoa ʼNdíle (tʼexkiai 1 Juan 1:8, 9).

16. Ánni nga koa̱n tsje sʼe̱síni kjoafaʼaitsjenná nga jchaxkoán Niná, kʼoa jósʼin nda basenkaoná nga tsje tjío kjoafaʼaitsjenná.

¹⁶ Nga tsje sʼe kjoafaʼaitsjenná ngixko̱n Niná. Kʼianga likui tsje tjío kjoafaʼaitsjenná likui sʼená kjoachoya kʼoa joxi tsín jme chjíná maná. Tonga xi totʼatsʼe kjoabʼechjíntjaile Jesucristo, je Jeobá síchatʼaná kʼoa tsjoáʼndená nga tsje sʼe kjoafaʼaitsjenná nga ʼyaxkoán ninga chjotajée maa (Hebreos 9:13, 14). Kʼoa tso tokoán nga chjakaonajmiá kʼoa kʼoaʼmilee tojmeni xi mená (Hebreos 4:14-16). Kʼoa nga tsje tjín kjoafaʼaitsjenná alijme xi nikjáojiaan kʼoa ngisa tsjoa sʼená.

17. Jmé kjoanichikontʼain xi so̱koná nga kʼoasʼin kʼienntjainá Jesús.

¹⁷ Nga koa̱n kuiyoaa ngantsjai nichxin ya sonʼndenaxó. Romanos 6:23 itso: “Nga̱ je chjíle jée kjoabiyaní, tonga je kjoatjaole Niná kjoabijnachon ngantsjainí, xi totʼatsʼe Cristo Jesús Nainá”. Jetsaʼyaa ya kjoaʼmiya jan je kjoanichikontʼain xi sʼe̱ ya sonʼndenaxó xi  jemachrianle (Apocalipsis 21:3, 4). Kuinga so̱koniná ngayeje kjoanichikontʼain jebi nga kʼoasʼin kʼienntjainá Jesús kʼoa koaan kuiyoaa ngantsjai nichxin nga tsín jme chʼin tisʼe̱niná. Kʼianga kʼoainá kjoanda jebi tjínnele koakoá nga chjí ʼyatokoán je kjoabʼechjíntjai xi kitsjoa Niná.

18. Ánni nga nʼio tse kjoanda kʼoaisínilee Jeobá nga kʼoasʼin kitsjoa je kjoabʼechjíntjai.

¹⁸ Ánni nga nʼio tse kjoanda kʼoaisínilee Jeobá nga kʼoasʼin tsakʼéchjíntjainá. Jngo kjoatjao ngisa chjíle kʼiatsa tse kjoama̱ kabʼéngi je chjota xi katsjoáná. Xi ijngosani, nʼio nda sʼele ni̱ma̱ná nga̱ kʼoasʼin bakóniná nga tsjoake kjoaixiná. Kuinga kuisíni je kjoabʼechjíntjai je kjoatjao xi ngisasa chjíle xi tsakʼainá, nga̱ nʼio tse kjoama̱ kisʼengile Niná. Juan 3:16 itso: “Nga̱ Niná kʼoasʼin koantsjoake sonʼnde nga kitsjoa je xi tojngo ʼndíle”. Je kjoabʼechjíntjai kui xi bakó nga nʼio tsjoakená Jeobá. Kʼoati kui xi bakó jokji tsjoakená Jesús, nga̱ kao  kjoatsjoa kitsjoa kjoabijnachonle xi totʼatsaan (tʼexkiai Juan 15:13). Kuinga ñaki kʼoakatabʼésíni tokoán je kjoabʼechjíntjai nga tsjoakená nga jngó jngoá je Jeobá kʼoa nga kʼoati tsjoakená je ʼNdíle (Gálatas 2:20).

19, 20. Jósʼin koakui nga bʼailai kjoanda Niná tʼatsʼe kjoabʼechjíntjai xi kitsjoa.

¹⁹ Kʼoa jósʼin koakui nga bʼailai kjoanda Niná tʼatsʼe kjoabʼechjíntjai xi kitsjoa. Xi títjon, ndasa kataʼyai je Jeobá, nga̱ jé kitsjoa kjoatjao jebi (Juan 17:3). Ngisa nda jchai tsa chótʼayai Biblia kao xo̱n jebi. Kʼianga jchasai Jeobá ngisa koa̱ntsjoachasai. Kʼoa nga koa̱ntsjoachasai ngisa koa̱nmeli kʼoasʼiain jmeni xi sasénle (1 Juan 5:3).

²⁰ Katasʼeli kjoamakjain xi tʼatsʼe kjoabʼechjíntjai. Itso Biblia xi tʼatsʼe Jesús: “Je xi makjainle tʼatsʼe ʼndíle Niná, tjínle kjoabijnachon ngantsjai” (Juan 3:36). Jósʼin koakoá nga makjainná xi tʼatsʼe Jesús, ali tsa to énjin kuinókjoaa. Tojo tso ya Santiago 2:26 “je xi makjainná tochajinní, tsa tsín ndatjín xáná”. Kʼoatjín, je xi ñaki kjoamakjain kao xá bakoñá. Jngo koya josʼin nga bakoá nga makjainná xi tʼatsʼe Jesús kuinga bʼenelee yaoná nga chjenngilee jmeni xi bixoán kʼoa jmeni xi nʼia (Juan 13:15).

21, 22. 1) Ánni nga tjínnesíniná koanngián nga faʼaitsjenya je Kjoabichile Nainá nga xki̱ nó. 2) Jméni xi jchaa ya kjoaʼmiya jaon kao ñato.

²¹ Tʼin nga faʼaitsjenya je Kjoabichile Nainá nga xki̱ nó. Nga jekoannjio nga 14 sá nisán nó 33, je Jesús jngo kjoabichi tsakʼéjnabasen xi “cenale Nainá” tsole Biblia (1 Corintios 11:20; Mateo 26:26-28). Kʼoati Kjoanikjaʼaitsjenya xi tsʼe kjoabiyale Cristo sʼin ʼyale. Je Jesús kui xá tsakʼéjnani nga kjoaʼaítsjenle je pastrole kao ngatsʼi xi ñaki chjotale ma jngo kjoa xi nʼio chjíle,  nga kʼoasʼin tsakʼéchjíntjainá nga kitsjoa kjoabijnachon tsjele. Je Jesús kui kinchja̱ni kjoanikjaʼaitsjenya jebi kʼianga kitsjoa kjoatéxoma xi i̱ tso: “Kʼoatʼiaon kuibi jméni nga nda kʼoéjintakonsínináo” (Lucas 22:19). Je kjoanikjaʼaitsjenya xi tsʼe Nainá kui síkjaʼaitsjenjinná je kjoatsjoacha xi tsakakóná Jeobá kao Jesús kʼianga kitsjoa je kjoabʼechjíntjai. Kʼianga mangián nga xki̱ nó nga faʼaitsjenya Nainá kʼoati bakoá nga ʼyachjiá je kjoabʼechjíntjai xi kitsjoa Niná. *

²² Je kjoabʼechjíntjai xi kitsjoa Jeobá liʼya xi be jotjín chjíle (2 Corintios 9:14, 15). Kʼoati saʼnda so̱kole kjoanda je chjota xi jekʼien tojosʼin jchaa ya kjoaʼmiya jaon kao ñato.