1, 2. Ánni nga nʼio chjí jchatokonsíñá nga ma bʼetsʼoalee Niná, kʼoa ánni nga machjénsíni nga jchaa jotso Biblia xi tʼatsʼe kjoabʼetsʼoa.

JE Sonʼnde nʼio ʼndí kji tsakui si̱ngósonkoaa jokji tse kijna ngʼajmi. Je Jeobá “je xi kisinda ngʼajmi, kao sonʼnde” tokʼoasʼin be je naxinandáyʼai joni tsa jngo tin nandá (Apocalipsis 14:7; Isaías 40:15). Tonga je Biblia kʼoatso nga “je Jeobá chrian tíjnale ngatsʼi xi je básjai, ngatsʼi xi ñaki kjoaixi nga básjai” kʼoa “tsjoále jmeni xi mele je xi tsokjónke, kʼoa kjuinrʼoéle kʼianga sijéle nganʼio” (Salmo 145:18, 19). Tikjaʼaitsjenlai josʼin tínchja̱ni én jebi. Je Niná xi ngisasa tse nganʼio tjínle chrian tíjnaná kʼoa kjuinrʼoéná tsa ñaki kjoaixi nga kjoásjee. ¡Jmé sikji tseni kjoanda nga ma bʼetsʼoalee!

² Tonga tsa mená nga kjuinrʼoéle Jeobá je kjoabʼetsʼoaná, tjínnele kʼoasʼin kʼoétsʼoalee josʼin mele. Tonga jósʼin nda kʼoétsʼoanilee tsa saʼnda tsín ʼyaa jotso Biblia xi tʼatsʼe kjoabʼetsʼoa. Nʼio chjíle nga jchaa jotso je Biblia, nga̱ je kjoabʼetsʼoa síchriantʼaná Jeobá.

3. Ánni nga kʼoétsʼoasínilee Jeobá.

³ Xi títjon anni nga kʼoétsʼoasínilee Jeobá kuinga je xotsoná nga kʼoasʼiaan. Je Énle itso: “Ali kʼoajin mano.  Tojmenibe xi machjénno, tijélao Niná, tʼetsʼoalao, kʼoa tʼailao kjoanda. Kʼoasʼin katasʼejinle Niná jme xi nijáo. Je kjoanyʼántakonle Niná xi ñaki faʼatole ngayije kjoafaʼaitsjenle chjota, jé xi sikuinda ni̱ma̱no kao kjoafaʼaitsjenno nga tiyokao Cristo Jesús” (Filipenses 4:6, 7). Alikuijin mai kʼuínlee je Niná xi batéxomale ngayeje kʼianga kʼoatítsoná nga kʼoétsʼoalee.

4. Ánni nga machriantʼasínilee Jeobá kʼianga ntsjaintsjai bʼetsʼoalee.

⁴ Ijngosa anni nga tjínnesínile kʼoétsʼoaa, kuinga ngisasa mamiyoaa je Jeobá kʼianga ntsjaintsjai bʼetsʼoalee. Je xi ñaki miyo fáo, mandosinle xínkjín kʼoa fákaontsjai xínkjín kʼoa ali tsa tokʼiajin básjai xínkjín nga tjín xi machjénle. Kʼianga tsoyale xínkjín jotjío kjoafaʼaitsjenle, kjoanikjaojin xi tjínle kʼoa jotjío kon sa nda sa nda mamiyole xínkjín. Kʼoakjoánti ma xi kao Jeobá. Kʼianga tichotʼayai xo̱n jebi jenʼio tse xi kjimali jotso Biblia xi tʼatsʼe Jeobá, jokjoan kʼoa jme xi tjínndajinle. Jetiʼyai nga ñaki tíjna Niná. Kjoanda xi tjenkao je kjoabʼetsʼoa kuinga koa̱n kʼoakʼuínlai je Nʼainá xi tíjna ngʼajmi jotjín kjoafaʼaitsjenli kʼoa kao ni̱ma̱li. Kʼoa kʼoasʼin koa̱nchriantʼasalai (Santiago 4:8).

5. Jósʼin ʼyañá nga tsín nrʼoéle Niná kjoabʼetsʼoa xi batío ngatsʼi chjota.

⁵ A nrʼoéle Niná kjoabʼetsʼoa xi batío ngatsʼi chjota. Tikjaʼaitsjenlai jokitsole je chjota israelita xi xíjin koan, xi tsakatio nichxinle Isaías, kitsole: “Ninga nʼio nkjín kʼa kʼoétsʼoao, alikui kjuinrʼoeno; nga̱ tomakji njín tibʼejtaon” (Isaías 1:15). Tojosí tso én jebi, tsakui kʼoasʼiaan jmeni xi tsín sasénle Niná alikui kjuinrʼoéle kjoabʼetsʼoaná. Tsa mená nga katanrʼoéle Niná kjoabʼetsʼoaná, tjínnele si̱tjosoán jmeni xi síjéná.

6. Kʼianga katanrʼoéle Niná kjoabʼetsʼoaná, jméni xi machjén nga katasʼená kʼoa jósʼin koakoñá nga tjínná.

⁶ Jngo koya xi síjéná Niná kuinga katasʼená kjoamakjain (tʼexkiai Marcos 11:24). Je pastro Pablo kitso: “Tsa tsín makjainná, likui nda sʼekon Niná xi tʼatsaan. Je xi faʼaikonle Niná, machjén nga koa̱nkjainle nga tíjna Niná, kʼoa nga Niná tsjoá chjíle je chjota xi nʼio básjai nga je” (Hebreos 11:6). Tonga je xi ñaki kjoamakjain ʼmile ali tsa toyajin tjen tíjna nga jchaa nga tíjna Niná, nga nrʼoéle kjoabʼetsʼoaná kʼoa nga tsjoáná jme xi nijélee. Je kjoamakjainná kao xáná bakoñá. Kao kui josʼin mangínkoaa kjoabijnachonná kataʼyanile nga tjínná kjoamakjain (Santiago 2:26).

7. 1) Ánni nga kao kjoaxkóntokon kʼoétsʼoasínilee Jeobá. 2) Jósʼin bakoá kjoanangitokon kʼoa nga ñaki kʼoatjín tokoán kʼianga bʼetsʼoaa.

⁷ Ijngosa xi síjéná Jeobá kuinga ñaki kʼoatjín tokoán jme xi kʼuínlee kʼoa nga kao kjoanangitokon kʼoasʼiaan. Nkjín koya tjín anni nga kao kjoanangitokon kʼoétsʼoasínilee Niná. Tobʼelañá, kʼianga jngo chjotaxá fikjákao jngo chjota kao kjoaxkóntokon fákao, nga̱ be nga ngisa ngʼa xá tjínle chjota jebi. A tsí ngisa tse kjoaxkóntokon machjénle Jeobá kʼianga kʼoétsʼoalee (Salmo 138:6). Nga̱ tojé Jeobá je “Niná xi ngisasa tse nganʼio tjínle” (Génesis 17:1). Kao kjoanangitokon chja̱koaa Jeobá nga̱  ngisa ngʼa tíjna tikʼoajinni ñá. Kʼiatsa tjínná kjoanangitokon kʼoati kui xosikaoná nga ñaki kʼoatjín tokoán nga kʼoétsʼoalee, nga tsín tokui kʼoasʼianñá nga tjínnele kʼoétsʼoaa kʼoa nga tsín tikui tima én si̱chjénñá (Mateo 6:7, 8).

8. Jmé xi tjínnele sʼiaan kʼianga jme xi jekanijélee Niná.

⁸ Ijngosa xi síjéná Niná kʼianga kjuinrʼoéle kjoabʼetsʼoaná kuinga kʼoénelee yaoná nga kʼoasʼiaan jmeni xi kanijélee. Tobʼelañá, tsa i̱ kʼuínlee Jeobá: “Tʼainajin nioxtila xi nichxin nga nyaon machjénnajin”, tjínnele nda si̱xá tojme xá xi so̱koná tsa ʼyale nga koa̱nná xá jebi (Mateo 6:11; 2 Tesalonicenses 3:10). Kʼoa tsakui si̱jélee nga katabasenkaoná nga tsínkui ska̱jiaan jmeni xi síkinjesaná, tjínnele kʼoéchjoalee yaoná tsa jmeni xi kui ska̱nijinná (Colosenses 3:5). Jekaʼyaa jmeni xi síjéná Niná kʼianga kjuinrʼoéle kjoabʼetsʼoaná, tonga kʼoati machjén nga jchaa jmeni xi sakʼoa chjonangiaa xi tʼatsʼe kjoabʼetsʼoa.

9. ʼYáni xi tjínnele kʼoétsʼoalee kʼoa ʼyá tsʼe jaʼaín xi si̱chjén.

⁹ ʼYáni xi tjínnele kʼoétsʼoalee. Je Jesús isʼin tsakakóyale je chjotale kʼianga kʼoetsʼoa: “Nʼainajin xi tijnai ngʼajmi” (Mateo 6:9). Tojo kitso Jesús, tojékjoán Niná Jeobá xi kʼoétsʼoalee. Tonga je Jeobá mele nga jchaa jme xá xi yʼa Jesucristo, je ʼNdítjonle. Tojosʼin tsaʼyaa ya kjoaʼmiya aon, je Jeobá kui xá kisikasénni Jesús i̱ Sonʼnde kʼianga kʼoasjentjainá xi tʼatsʼe jée kao kjoabiya (Juan 3:16; Romanos 5:12). Xi ijngosani, Naʼmitítjon kʼoa Jues sʼin kisikʼéjna (Juan 5:22; Hebreos 6:20). Kuinga kʼoatsosíni Biblia nga kao jaʼaínle Jesús kʼoétsʼoaa. Jesoa Jesús xi i̱ kitso: “An nía xi ndiaa, an nía xi kjoakixi, an nía xi kjoabijnachon. Nitoʼyajin xi faʼaikonle Nʼainá, tsa tsian nga an” (Juan 14:6). Kʼianga katanoʼyale kjoabʼetsʼoaná,  tojékjoán Jeobá kʼoétsʼoalee kʼoa kui jaʼaínle ʼNdíle si̱chjén.

10. Ánni nga tsín machjénsíni nga kjaʼaíkjoansʼin kuinyaa kʼianga kʼoétsʼoaa.

¹⁰ A machjénní nga kjaʼaíkjoansʼin kuinyaa kʼianga kʼoétsʼoaa. Mai. Ali tsakui xi síjéná Jeobá nga kjaʼaísʼin kjoáyoaa ndsaa kʼoa nga kjaʼaísʼin kuinyaa. Je Biblia nkjín koya síkʼaxki̱ josʼin ma sʼetsʼoa. Tobʼelañá, koaan kuijnaa, koaan kjoénjeen jkoaa, koaan kuisenxkónyʼiaan kʼoa koaan kuisenndoaa (1 Crónicas 17:16; Nehemías 8:6; Daniel 6:10; Marcos 11:25). Je xi chjíle ali tsakuijin tsa ndsaa si̱kjaan kʼoa tsa kjaʼaísʼin kuinyaa tojoni nga skoe̱ná chjota, kuiní jotjín tokoán. Saʼnda koaan to jinni̱ma̱ná kuinókjoaa kʼoa tojñani tiyoaa, tsa xáná tinʼia kʼoa tsa nʼiokjoan machjénná. Tsakui nichxin liʼya xi skoe̱ná kʼianga tibʼetsʼoaa, tonga je Jeobá tínrʼoéná (Nehemías 2:1-6).

11. Jméni xi koa̱n si̱jé kʼianga bʼetsʼoaa.

¹¹ Jméni xi koa̱n si̱jé kʼianga kʼoétsʼoaa. Je Biblia itso: “Tsa nijé tojmeni kjoa josʼin mele nga je, je [Jeobá] nrʼoéná” (1 Juan 5:14). Tojosí tso testo jebi koaan si̱jé tojmeni nga tonga kuikjoanni xi mele Jeobá. Tobʼelañá, a mele Jeobá nga kʼoakʼuínlee jmeni xi nikjáojiaan. Jaon. Kʼianga chjakoaa Jeobá kʼoasʼin mangóson josʼin chjakoaa jngo miyo xi nʼio ndaná. Koaan kʼoakʼuínlee jotjín ni̱ma̱ná (Salmo 62:8). Kʼoati kixi tíjna nga si̱jélee nganʼiotsjele kʼianga katabasenkaoná nga kui kʼoasʼiaan xi ndatjín (Lucas 11:13). Xi ijngosani, kʼoati nijélee nga katabasenkaoná nga kui chjoéjiaan xi ndatjín kʼoa nga katatsjoáná nganʼio nga ska̱ná kjoa xi bitjatojiaan (Santiago 1:5). Kʼianga kasokójéená, tjínnele kʼoétsʼoalee nga katasíchatʼaná xi totʼatsʼe kjoamakjain xi tjínná nga tsakʼéchjíntjainá Cristo (Efesios 1:3, 7). Tonga likui toñá kʼoétsʼoantje yaoná, koaan kʼoétsʼoantje xíngiaa kʼoa kao  xi ngóson sʼin makjainná (Hechos 12:5; Colosenses 4:12).

12. Jósʼiaan kʼianga kui títjon si̱kʼéjnaa xi tʼatsʼe Nʼainá xi tíjna ngʼajmi kʼianga bʼetsʼoaa.

¹² Je xi ngisa nʼio tse kjoandosin kʼoailee kʼianga bʼetsʼoaa kui josʼin tiyoaa ngixko̱n Niná Jeobá. Kʼianga kʼoasikji tse kjoanda títsjoáná Jeobá, machjén nga chʼa̱sjengʼaa kʼoa nga kʼoailee kjoanda kao ngayeje ni̱ma̱ná (1 Crónicas 29:10-13). Yaa Mateo 6:9-13 tjítʼa je kjoabʼetsʼoa xi tsakʼéjnachoa̱ Jesús (tʼexkiai). Kʼoatso nga kui si̱jé nga kataʼyaxkón jaʼaínle Niná, xi tsonile nga katabitjotsje. Xijema kui faʼaitʼa nga katjinroa Chjotaxále Niná kʼoa nga katabitjoson josʼin mele i̱ Sonʼnde joni ya ngʼajmi. Tojosʼin tiʼyaa, je Jesús kui títjon kisikʼaxki̱ xi tʼatsʼe Jeobá kʼoa skan kisikʼaxki̱ xi tʼatsaan. Tsa kʼoati kui títjon si̱kʼéjnaa xi tʼatsʼe Jeobá kʼianga bʼetsʼoaa, kui xi koakoá nga tsín toñá mangínñá yaoná.

13. Jótso Biblia xi tʼatsʼe jokji tse kuinókjoaa kʼianga kʼoétsʼoaa.

¹³ Jókji tse kuinókjoaa kʼianga kʼoétsʼoaa. Je Biblia alikui jotso jokji tse kuinókjoaa kʼianga kʼoétsʼoaa, a kʼiaa nga jinle xíngiaa tibʼetsʼoaa axo toñá tibʼetsʼoaa. Koaan tochoa én kuinókjoaa tojo nʼia nga kjesa bichijián. Kʼoa kʼoati koa̱n tse én kuinókjoaa tojo nʼia nga toñá nokjoakoaa Jeobá nga ʼmiyalee jotjín ni̱ma̱ná (1 Samuel 1:12, 15). Tonga je Jesús chʼaosʼin kisikʼaxki̱ je chjota xi tsakʼasjetsje yaole xi likui tofe toma je kjoabʼetsʼoa xi tsakatío tojoni nga skoe̱ chjota (Lucas 20:46, 47). Alikui kuenta sʼín Jeobá kjoabʼetsʼoa jebi. Je xi chjíle kuinga ñaki kʼoatjín jmeni xi kʼuínlee. Jokji tse kʼoétsʼoaa kui xi kuitsoni jme xi machjénná kʼoa jme xá tibʼetsʼoañá.

14. Jósʼin tsoyanile kʼianga “tʼetsʼoantsjao” tso Biblia kʼoa jmé kjoanichikontʼain xi tjínná.

¹⁴ Jókji tse kʼoétsʼoañá. Je Biblia itso: “tʼetsʼoao”, “tʼetsʼoantsjao” kʼoa “tʼetsʼoao ali nichajinjion ngantsjai”  (Mateo 26:41; Romanos 12:12; 1 Tesalonicenses 5:17). Ali tsakuijin xi tsonile nga kʼoétsʼoaa kʼoajnda nichxin kʼoajnda nitje̱n. Kui xi tsonile nga ntsjaintsjai kʼoétsʼoalee Jeobá tʼatsʼe jokji kjoanda títsjoáná, kʼoa nga si̱jélee nga katabándiaaná, katasínʼiojinná kʼoa katatsjoáná nganʼio. Jmé sikji tse kjoanichikontʼain tjínniná nga tsjoáʼndená Jeobá tojo tjínkʼa mená kʼoétsʼoalee kʼoa tojokji tse mená. Tsa chjí ʼyatokoán nga ma bʼetsʼoalee Nʼainá xi tíjna ngʼajmi, kʼoétsʼoantsjaijinlee.

15. Tsa toñá tibʼetsʼoaa kʼoa tsa totinoʼyá, ánni nga “kʼoakatama” kuixónsíñá nga jekjoetʼa je kjoabʼetsʼoa.

¹⁵ Ánni nga “kʼoakatama” kuixónsíñá nga jefetʼa jngo kjoabʼetsʼoa. Ya Biblia faʼaitʼa kʼa choa̱ kʼianga kixi tíjna nga “kʼoakatama” kuixoán kʼianga jefetʼa jngo kjoabʼetsʼoa, ninga ñásoa tibʼetsʼoaa kʼoa ninga kjaʼaí xi tíbʼétsʼoa kʼoa totinoʼyá ñá (1 Crónicas 16:36; Salmo 41:13). Kʼianga toñá tibʼetsʼoaa kʼoa “kʼoakatama” bixoán kui xi tsonile nga ñaki kʼoatjín jme xi kaʼmilee Niná. Kʼoa nga kʼoati bixoán jinle xíngiaa, a to jinni̱ma̱ná kʼoakuixoán axo ñaki kuinókjoañá, kui xi tsonile nga tjínjngo tokoán jokatso je xi kabʼétsʼoa (1 Corintios 14:16).

16. A ñaki tsjoá kjoaixiná Niná jmeni xi nijélee.

¹⁶ A ñaki tsjoá kjoaixiná Niná jmeni xi nijélee. Jaon, tsjoáná. Jeʼyaa nga nrʼoéle kjoabʼetsʼoaná je Niná kʼoa nga tsjoáná jmeni xi nijélee chjota xi miyón mañá, nga̱ ñaki kʼoatjín joʼmilee (Salmo 65:2). Kʼoa nkjín koya josʼin tsjoáná jmeni xi nijélee.

17. Ánni kʼoabixónsíñá nga Jeobá jé ánkjele kʼoa kao choʼndale síchjén nga tsjoáná jmeni xi nijélee.

¹⁷ Je Jeobá jé síchjén ánkjele kao choʼndale nga tsjoáná jmeni xi nijélee (Hebreos 1:13, 14). Tobʼelañá, nkjín chjota xi kui síjéle Niná nga katabasenkao ánni nga katamajinsínile  jotso Biblia, kʼoa xijemani jngo choʼndale Jeobá bichónrʼoe chjota jebi ya niʼyale. Je choa̱ jebi kui xi bakó nga jé ánkje tjíobándiaa nga tíʼmiyason je énnda chjotse (Apocalipsis 14:6). Kʼoa kʼianga nʼio machjénná tsa jmeni, je Jeobá koaanle je sichjén choʼndale nga katabasenkaoná (Proverbios 12:25; Santiago 2:16).

18. Jósʼin síchjén Jeobá je nganʼiotsjele kʼoa kao Biblia nga tsjoále choʼndale jmeni xi síjéle.

¹⁸ Je Jeobá kʼoati síchjén nganʼiotsjele kʼoa kao Biblia  nga tsjoále choʼndale jmeni xi síjéle. Kʼianga jme kjoa tibitjatojiaan kʼoa nijélee nganʼio, koaanle kao nganʼiotsjele koandiaaniná kʼoa sinʼiojinná (2 Corintios 4:7). Kʼoa nga kʼoaʼmilee nga katabasenkaoná nga kui chjoéjiaan xi ndatjín, jé Biblia síchjén. Tsakui nichxin kʼia koa̱nsjaijinná je én xi machjénná kʼianga tichotʼayá Biblia kʼoa tsa kʼiaje̱ nga tichotʼayá je xo̱n xi Biblia yʼangini, joni tsa libro jebi. Kʼoa tsakui nichxin kʼia nikjaʼaitsjenjinná je kjoafaʼaitsjen xi tsjoá Biblia kʼianga koanngián kjoajtínná kʼoa tsa maije̱ kʼianga tsjoáná kjoafaʼaitsjen jngo ndsʼee xi mandosinle tʼatsaan xi chjotajchínga sʼin tíjna ya jinjtín (Gálatas 6:1).

19. Jósʼin si̱kjaʼaitsjeen tsa sakʼoa kʼoakoa̱nná nga tsín ndi̱to̱n títsjoáná Jeobá jmeni xi nijélee.

¹⁹ Tsakui nichxin sakʼoa kʼoakuixoán nga tsín ndi̱to̱n títsjoáná Jeobá jmeni xi nijélee, tonga ali tsakuijin xi tsonile nga tsín koa̱nle tsjoáná. Je Jeobá be kʼiani kʼoa josʼin tsjoáná jmeni xi kanijélee. Je, ngisa nda be tikʼoajinni ñá jmeni xi machjénná kʼoa josʼin tsjoáná. Kui xi mele nga tosi tonda si̱jé, kuijnyísjee kʼoa si̱kjanetʼaa (Lucas 11:5-10). Tsa kʼoasʼiaan, kʼoasʼin koakonilee nga nʼio mená jmeni xi tinijélee kʼoa nga ñaki makjainná tʼatsʼe. Kʼoa tsakui nichxin saʼnda tsín jchaa josʼin tsjoáná Jeobá.  Tobʼelañá, tsakui si̱jélee nga katabasenkaoná tsa jme xi ñʼai kjimaná, tsakui nichxin likui kjoaʼaxinná kʼoa sa to nganʼio tsjoáná nga ska̱ná (tʼexkiai Filipenses 4:13, TNM). *

20. Ánni nga ntsjaintsjai kʼoétsʼoasíñá.

²⁰ Nʼio tse kjoanda kʼoailee je Niná xi kisinda ngʼajmi kao Sonʼnde nga kʼoasʼin chrian tíjnaná ngatsʼiaa xi kʼoasʼin bʼetsʼoalee josʼin sasénle (tʼexkiai Salmo 145:18). * Si̱chjén kjoanda jebi. Tsa kʼoasʼiaan, sa koa̱nchriantʼa sa koa̱nchriantʼasalee Jeobá, je Niná xi nrʼoéle kjoabʼetsʼoa.