1. Jóʼmi kjoabʼetsʼoa xi chótʼayajiaan.

JNGO tjíjtsa Sonʼnde miyón mani chjota xi male je padrenuestro. Jesoa Jesucristo tsakʼéjnachoya kjoabʼetsʼoa jebi kʼoa nʼio tse xi tsoyanile. Kuila nga jan koya én xi fitsʼiani chótʼayá ánni nga ngisa nda koa̱njinsínili jmekjoanni xi bakóya Biblia.

2. Jñánile nga jan koya xi tsakakóyale Jesús je chjotale nga sijé kʼianga kʼoetsʼoa.

² Nga tsakʼétsʼiakao Jesús kjoabʼetsʼoa jebi i kitsole chjota xi tjíonrʼoéle: “Jon kʼuisʼin tʼetsʼoao: Nʼainajin xi tijnai ngʼajmi, kataʼyaxkón jaʼaínli. Katjinroa kjoatéxomali. Kʼoakatasʼín josʼin nga meli, joni ya ngʼajmi kʼoatisʼin i̱ sonʼnde” (Mateo 6:9-13). Jósʼin tsoyanile nga jan koya én jebi.

3. Jméni xi tjínnele jchaa xi tʼatsʼe kjoatéxoma xi kisikʼaxki̱ Jesús ya padrenuestro.

³ Jetse kichotʼayá tʼatsʼe jaʼaínle Niná, je Jeobá. Kʼoati jekichotʼayá jmeni xi mele, jmeni xi jekisʼin kʼoa jmeni xi sʼin tʼatsʼe chjotasonʼnde. Tonga jókitsonile Jesús nga i̱ kitso: “Katjinroa kjoatéxomali”. Jméni xokitsole. Jósʼin kʼia jchaxkón kʼoa tjósjetsje jaʼaínle Niná kʼianga kjoaʼaí. Kʼoa jósʼin kʼia kuitjosonni josʼin mele Niná.

4. Jmé xi tínchja̱ni én xi kjoatéxoma tso kʼoa ʼyáni xi Rey tíjna.

⁴ Je kjoatéxoma xi kitso Jesús kui tínchja̱ni je Chjotaxá xi tsakasénnda Jeobá nga koatexoma. Kʼoa Jeobá jé Jesucristo kiskoejin nga Rey koa̱n. Je Jesucristo ngisa jeya tíjna tikʼoajinni ngatsʼi chjotaxá sonʼnde kʼoa i ʼmile: “Naitítjonle xi nai ma, kʼoa ngʼajko̱le je xi chjotatítjon” (Apocalipsis 17:14). Je Jesús tjínle nganʼio nga ngisa tse jme xi sʼin tikʼoajinni tojokji chjotaxáni, ninga xi nʼiosa nda sʼín.

5. Jñá tjen koatexomani je Chjotaxále Niná kʼoa ʼyáni xi koatexomasonle.

⁵ Jñá tjen koatexomani je Chjotaxále Niná. Ngo̱ jñáni tíjna Jesús. Tojosʼin jetsaʼyaa, kʼianga jekinikʼientʼa yá kʼoa jaʼáyanile yaa kini ngʼajmi (Hechos 2:33). Kʼoa kuinga ya ngʼajmi tíjnani. Kuinga “kjoatéxomale ngʼajmi” tsosínile Biblia (Mateo 4:17). Yaa tjen ngʼajmi koatexomasonnile chjotasonʼnde (tʼexkiai Apocalipsis 11:15).

6, 7. Ánni nga tsín ʼya xi mangósonkaosíni Jesús.

⁶ Je Jesús jngo Rey xi tsín ʼya xi mangósonkao. Ánni kʼoabixónsíñá. Kuinga tsínkʼia kuiyá. Je Biblia kʼoatso nga likui fitson kjoabijnachonle (Hebreos 7:16). Kuinga tsínkʼia kjoetʼasíni ngayeje kjoanda xi kjoaʼaíkao. Kʼoa nʼiojin tse kjoanda tsjoá.

⁷ Tikjaʼaitsjenjinlai én jebi xi tongini kisʼetʼa Biblia xi tʼatsʼe Jesús: “Kʼoa sʼeele nganʼiole Jeobá, sʼeele kjoachjine kao kjoamajintokon, sʼeele kjoafaʼaitsjen kao nganʼio, sʼeele kjoankjíntokon kao kjoanokjoncha xi kao Jeobá. Kʼoa kao kjoatsjoa tso̱kjonke Jeobá. Kʼoa alikui tokui koaini jme xi skoe̱ni xko̱n kʼianga kʼoendajinle chjota, kʼoa alikui tokui koaini jmeni xi kjuinrʼoé xoño nga koatekjáya. Kʼoa tongóson sʼin kʼoendajinle xi nangi tíjna,  kʼoa kao kjoatéxomakixi koatekjáyanile je chjotandʼé xi tjín sonʼnde” (Isaías 11:2-4). Je én jebi kui xi bakó nga kao kjoatéxomakixi kʼoa kao kjoamatokon koatexomasonnile Jesús je chjotasonʼnde. A tsí matsjoali tsa jngo chjotaxá xi kʼoasʼín koatexomali.

8. ʼYáni xi koatexomakao Jesús.

⁸ Kataʼyalasa ijngoaa xi tʼatsʼe Chjotaxále Niná: Je Jesús alikui toje koatexoma, tjíosa xi koatexomakao xi kʼoati rey koa̱n. Tobʼelañá, je pastro Pablo i kitsole Timoteo: “Tsa tíjchókjoaná kao je, kʼoatisʼin koatexomaa kao je” (2 Timoteo 2:12). Kʼoatjín, Pablo, Timoteo kʼoa kao xi kjaʼaísa chjotakixi xi kiskoejin Niná, yaa koatexomakao Jesús ya ngʼajmi. Jótjín mani xi sʼe̱le kjoanda jebi.

9. Jótjín mani chjota xi koatexomakao Jesús, kʼoa kʼiáni saʼnda tíkjoejinni Niná chjota jebi.

⁹ Tojosʼin kitsoya kjoaʼmiya ñato, je pastro Juan jngo sén tsabe, kʼoa i kitso: “Koeni je Barré [Jesucristo] ya tíjnason nindo xi Sión ʼmi [kʼianga Rey sʼin tíjna ya ngʼajmi], kʼoa tjíokao nga je jngo siento kao ñachanño jmi xi tjínle jaʼaínle Barré kao jaʼaínle Nʼaile”. ʼYáni chjota xi kʼoatjín mani. Jesoa pastro Juan kʼoakitso: “Jébi xi fitjenngile je Barré tojñanibe nga koai. Jébi xi koanchjíntjai yajinle chjota, nga ʼndítjon koan xi tsʼe Niná kao je Barré” (Apocalipsis 14:1, 4). Kʼoatjín, jé xi ñaki chjotakixile ma Jesucristo xi tjoéjin nga ya koatexomakao ya ngʼajmi. Kʼianga jekuiyá kʼoa kjoaʼáyanile ya ngʼajmi jé koatexomason Sonʼnde kao Jesús (Apocalipsis 5:10). Kʼiaa saʼnda nichxinle pastro tíkjoejinni Niná je xi jngo siento kao ñachanño jmi mani xi koatexomakao Jesús.

10. Ánni nga nʼio tse kjoatsjoacha tíbakósíni Jeobá nga je Jesús kʼoa kao xi jngo siento kao ñachanño jmi mani kiskoejin nga koatexomale chjotasonʼnde.

¹⁰ Nʼio tse kjoatsjoacha tíbakó Jeobá nga je Jesús kʼoa kao xi jngo siento kao ñachanño jmi mani kiskoejin  nga koatexomale chjotasonʼnde. Tobʼelañá, je Jesús chjota koan kʼoa kuinga besíni kjoañʼai xi faʼá chjota. Je pastro Pablo kʼoakitso nga “koa̱nle koa̱nmakená, nga̱ tsí tse nganʼio xi tjínná, tonga je kichotʼa ngayije josʼin nga kjoan, tonga likui kisʼele jée” (Hebreos 4:15; 5:8). Je xi koatexomakao Jesús kʼoati jejaʼá kjoañʼai xi chjaʼá xi chjotaa. Xi ijngosani, kiskantʼakao jée kʼoa tojme chʼin xi tjín. Nʼiojin nda koa̱njinle jme kjoa xi bitjatojiaan.

11. Ánni kʼoakitsosínile Jesús je chjotale nga kui katasíjé nga katabitjoson josʼin mele Niná ya ngʼajmi.

¹¹ Kʼianga kʼoakitsole Jesús je chjotale nga katabʼétsʼoa nga katafaʼai Chjotaxále Niná, kʼoati kitsole nga kʼoasʼin sijé nga katabitjoson josʼin mele “joni ya ngʼajmi kʼoatisʼin i̱ sonʼnde”. Ya ngʼajmi jña tíjna Niná, je ánkjele kʼoasʼínntsjai josʼin mele. Tonga tojosʼin tsaʼyaa ya kjoaʼmiya jan, jngo ánkje xi koantsʼen xi tsín tikisitjosonnile Niná, kʼoa jé xokisikao Adán kao Eva nga tsakajngijée. Yaa kjoaʼmiya te jchasaa xi tʼatsʼe ánkje xokji, xi Na̱i ʼmile. Je Niná kitsjoaʼnde choatsele nga ya ngʼajmi tsakatio je Na̱i kʼoa kao ánkje xi je kitjenngile. Kʼianga nichxinle Jesús ali tsa tongatsʼijin ánkje xi tjío ngʼajmi kʼoatjíosʼín josʼin mele Niná. Tonga kʼianga tsakʼaile xá Jesucristo jngo kjoajchán tsakʼéjna kʼoa tsakjaʼáxin je Na̱i (tʼexkiai Apocalipsis 12:7-9).

12. Jñánile nga jao koya én xi nʼio chjíle síkʼaxki̱ Apocalipsis 12:10.

¹² Je én xi tongini kisʼetʼa Biblia kʼoakitso jokoa̱n: “Kinrʼoejngoa jta̱ nʼio ya ngʼajmi, xi kitso: Ndʼaibindai jejaʼai kjoabitjontjai, kao nganʼio, kao kjoatéxomale Nináná, kao kjoatéxomale Cristole, nga̱ je na̱i xi tsakángi ndsʼee jekinikʼatjenngi, jñale xi tsakángi ndsʼee ngixko̱n Nináná nichxin kao nitje̱n” (Apocalipsis 12:10). A kaʼyaní nga jao koya én xi nʼio chjíle síkʼaxki̱ testo jebi. Xi títjon,  kuinga jetsakʼétsʼiakao xále Jesucristo nga tíbatéxoma. Xi majaoni, i Sonʼnde kinikʼatjenngi je Na̱i.

13. Jméni xi koan ya ngʼajmi nga tsakichonsje je Na̱i.

¹³ Tojosʼin jchasaa xi fisani jekitjoson nga jao koya én jebi. Kʼoa jméni xi koan ya ngʼajmi nga kitjoson. Je Biblia itso: “Xi tokuibi, katamatsjoano ngʼajmi kao xi ya tiyo” (Apocalipsis 12:12). Kʼoatjín, tsjoa koanle je ánkjele Niná kʼianga tsakichonsje ya ngʼajmi je Na̱i kʼoa kao ánkje xi ya tsakájta. Ngatsʼi ánkje xi ya tjío ñaki kixi tjíofitʼale Niná Jeobá, nyʼán kʼoa jtín tjíokao xínkjín ngatsʼi. Xi ya ngʼajmi jekʼoakjima josʼin mele Niná.

14. Jmé xi kjima i̱ Sonʼnde nga i̱ kinikʼatjenjenngi je Na̱i.

¹⁴ Kʼoa jméni xi koan i̱ Sonʼnde. Je Biblia kʼoatso: “Ma̱xóni xi tjío sonʼnde kao ya ndáchikon, nga je na̱i jekʼoasʼin jitjojenjinno nga jon. Ali tokʼoakji jti male, nga be nga tochoa nichxin tjínle” (Apocalipsis 12:12). Je Na̱i síxkónkji jtile nga kʼoasʼin tsakichonsje ya ngʼajmi kʼoa nga tochoasa nichxin tjínle. Kʼoa nga kʼoasikji jtile nʼio tse kjoa tíbajngi i̱ Sonʼnde. Yaa kjoaʼmiya xi ijngo chótʼayasaa tʼatsʼe kjoa xi tíbajngi. Kʼoa tojosísʼin tichotʼayajiaan, jósʼin kuitjosonle Jesucristo kao xi koatexomakao nga kʼoakatama josʼin mele Niná i̱ Sonʼnde.

15. Jméni xi tjínndajinle Niná xi kao Sonʼnde.

¹⁵ Tikjaʼaitsjenla ijngokʼai jmeni xi mele Niná xi kao Sonʼnde. Tojosʼin tsaʼyai ya kjoaʼmiya jan, yaa tsakakóni Jeobá ʼndenaxó xi tsakʼéjna ya Edén nga mele nga ʼndenaxó koa̱n jngo tjíjtsa Sonʼnde kʼoa nga chjotakixi sʼe̱jnakitse xi tsínkʼia kuiyá. Kʼianga jetsakʼanachale Na̱i je Adán kao Eva, chitsonjin jmeni xi tjínndajinle Niná xi kao Sonʼnde, tonga alikui tsʼantjaiya jmeni xi mele Niná. Jeobá tojo mele nga katabitjoson én jebi: “Je xi kixi tsʼee koa̱n sonʼnde, kʼoa i koatioson ngantsjai nichxin”  (Salmo 37:29). Kʼoa jé Chjotaxále Niná xosʼin. Jósʼin kuitjosonnile.

16, 17. Jméni xi tsoná Daniel 2:44 tʼatsʼe je Chjotaxále Niná.

¹⁶ Ya Daniel 2:44 tongini i̱ kitso: “Kʼianga tjíosa chjotaxá xokjoan je Niná xi tíjna ngʼajmi jngo chjotaxá koasennda xi nikʼiajin tjóxin. Chjotaxá jebi ali tsa tikjaʼaíjin naxinandá koa̱nntsjani. Ñaki sichaoní kʼoa kjoaʼaxinní ngatsʼi chjotaxá xokjoan, kʼoa jé kʼoéjna ngantsjai nichxin”. Jméni xi bakóyaná én jebi xi tʼatsʼe Chjotaxále Niná.

¹⁷ Xi títjon, kuinga kʼia koatexoma je Chjotaxále Niná “kʼianga tjíosa chjotaxá xokjoan”, xi tsonile, je chjotaxá sonʼnde. Xi majaoni, kui bakó nga kʼoéjna tokʼia saʼndani. Nijngojinla chjotaxá sonʼnde sikinjele kʼoa kʼoéjnayangajaole. Xi majanni, kui bakóyaná nga jngo kjoajchán kʼoejna kao chjotaxá sonʼnde kʼoa nga je kuinje̱le. Xijekoa̱n, toje tojngo koatexomale chjotasonʼnde kʼoa ngisasa nʼio nda sʼin tikʼoajinni toʼyani.

18. Jóʼmi je kjoajchán xi kʼoejna je Chjotaxále Niná kao chjotaxá sonʼnde.

¹⁸ Nʼio tse xi bakóyaná je Biblia tʼatsʼe kjoajchán xi kʼoejna je Chjotaxále Niná kao chjotaxá sonʼnde. Tobʼelañá, kʼianga jetífikjetʼa nichxin, je ánkjele Na̱i énndiso singabason nga kʼoanachale “chjotatítjon xi tsʼe ngakijnda sonʼnde”. Ánni kʼoasʼinsíni. Kuinga ya sikatíoxkó kʼianga sʼe̱jna “kjoajchán kʼia nichxinje xi tsʼe Niná xi batéxoma ngayije”. Kʼoa yaa sikatíoxkó “ya ʼnde xi kʼoaʼmi Armagedón nga én hebreo” (Apocalipsis 16:14, 16). Tojo tso nga jao testo jebi, je kjoajchán xi kʼoejna je Chjotaxále Niná kao chjotaxá sonʼnde, Armagedón ʼmi.

19, 20. Jméni xi tíbʼéchjoa nga tsín kʼoakjimasíni ndʼai josʼin mele Niná i̱ Sonʼnde.

¹⁹ Jmé xá kʼoejnani kjoajchán jebi. Si̱kjaʼaitsjenla ijngokʼangáñá jme xi tjínndajinle Niná xi kao Sonʼnde.  Nga ʼndenaxó sikao kʼoa nga je koatio chjota xi kixi xi je sixále. Jméni xi tíbʼéchjoa nga tsín kʼoakjimasíni ndʼai. Xi títjon, kuinga chjotajée maa kʼoa kuinga sokóchʼinsíniná kʼoa biyasíñá. Tonga ya kjoaʼmiya aon jetsaʼyaa nga kui xá kʼientjaininá Jesús nga koa̱n kuiyoaa ngantsjai nichxin. Faʼaitsjenjinli je én xi kiski Juan: “Nga̱ Niná kʼoasʼin koantsjoake sonʼnde nga kitsjoa je xi tojngo ʼndíle, jméni nga ngatsʼisíni xi makjainle tʼatsʼe, likui cha̱, tonga tjínle kjoabijnachon ngantsjai” (Juan 3:16).

²⁰ Je xi kʼoati tíbʼéchjoa nga tsín tíbitjoson jme xi tjínndajinle Niná kuinga nkjín chjota xi chʼao sʼín. Bʼéndisoo, bʼanachaa kʼoa síchajngi. Likui mele kʼoasʼín josʼin mele Niná. Chjota jebi kʼiaa kjoeson nga sʼe̱jna kjoajchánle Niná xi Armagedón ʼmi (tʼexkiai Salmo 37:10). * Ijngosa anni nga tsín tíbitjosonsíni jme xi tjínndajinle Niná i̱ Sonʼnde kuinga tsín kʼoatso je chjotaxá sonʼnde nga Niná katasítjosonle chjota. Nkjín chjotaxá xi choa nganʼiole, kʼoa tjín xi nʼio tsʼen kʼoa kao xi ché. Ñaki kʼoatjín jotso Biblia: “Je chjota tjíobatéxomale xínkjín nga tjíosíkiʼaon” (Eclesiastés 8:9).

21. Jósʼin kuitjosonle je Chjotaxále Niná josʼin mele Jeobá xi kao Sonʼnde.

²¹ Kʼianga jekjoaʼato Armagedón, tojé Chjotaxále Niná koatexomale chjota kʼoa kʼoasʼin sitjoson josʼin mele Niná kʼoa nʼio naskánatjín kjoanichikontʼain kjoaʼaíkao. Tobʼelañá, kjoaʼaxin je Na̱i kao ánkjele (Apocalipsis 20:1-3). Kʼoa kui sichjén je kjoabʼechjíntjai xi kitsjoa Jesús ánni nga likui tichʼin sʼe̱sínile chjota kʼoa likui tikuiyásíni, tosa koa̱n koatio ngantsjai nichxin (tʼexkiai Apocalipsis 22:1-3). Xi ijngosani, ʼndenaxó sikao  Sonʼnde. Kʼoasʼin kʼoasjetsjeni jaʼaínle Jeobá Chjotaxá jebi kʼoa kʼoasʼin kuitjosonnile josʼin mele Niná xi kao Sonʼnde. Kʼoatjín, ngatsʼi chjota skoe̱xkón jaʼaínle Jeobá.

22. Jósʼin ʼyañá nga tsín kʼia tsakatéxoma Jesús nichxin nga tsakʼejna kʼoa nikʼiajinlaje̱ nga jejaʼáyanile.

²² Kʼianga kʼoakitsole Jesús je chjotale nga katasíjéle Niná nga katjinroa Chjotaxále, kui xi bakó nga kje batéxomajin nga kʼia. A kʼiaa tsakatéxoma nga kini Jesús ya ngʼajmi. Majain. Je pastro Pedro kao Pablo kʼoakitso nga kʼia kitjoson én xi tjítʼa Salmo 110:1 xi tʼatsʼe Jesús kʼianga jejaʼáyanile, én jebi itso: “Je Jeobá itsole Naina: Tijnai ngakixina saʼnda nga sikatíongia ndso̱kui je kontrali joni tsa yá xi binyanai ndso̱kui” (Hechos 2:32-35; Hebreos 10:12, 13). Kʼoatjín, Jesucristo kiskoya saʼnda nga tsakʼaile xá.

23. 1) Kʼiá tsakʼétsʼiakaoni nga tíbatéxoma je Chjotaxále Niná. 2) Jméni xi kuinchja̱ni je kjoaʼmiya xi ijngo.

²³ Jókji tse kiskoya Jesucristo. Kʼianga chrianle nó 1900 kʼoa kao nga jejaʼato nó jebi jngo jtín mani chjota xi nda kiskotʼayason Biblia xi kʼoasʼin tsabe nga nó 1914 kʼoaile xá Jesucristo. (Tsa mesali jchai xi tʼatsʼe nó 1914 chótʼai ya jñani tso: “Jmé én xi tongini kisʼetʼa Biblia xi kʼia kitjoson nga nó 1914”.) Jmeni xi kjima jngo tjíjtsa Sonʼnde saʼnda  nó 1914 kui xi bakó nga kʼoatjín josʼin koanchoyale Biblia chjota jebi. Kʼianga tíbitjoson je én xi tongini kisʼetʼa Biblia kui bakó nga nó 1914 kitsjoale xá Jeobá je Jesús nga Rey kisikao kʼoa kʼiaa saʼnda tíbatéxomani je Chjotaxále Niná. Kʼoa je Na̱i “tochoa nichxin tjínle” kʼoa kui nichxin tiyoaa ndʼaibi (Apocalipsis 12:12; Salmo 110:2). Kʼoati jeme kʼoasʼin Chjotaxá jebi nga katabitjoson josʼin mele Niná i̱ Sonʼnde. Nʼio nda tso én jebi, a tsí jaon. A ñaki kʼoaxótse tjín, jósingái ji. Je kjoaʼmiya xi ijngo kui koakoli jmekjoanni xi bakóya Biblia xi tʼatsʼe kjoa jebi.