1, 2. Ánni nga ndatjínsíni nga kʼoasʼin chjonangiaa tsa jmeni.

A ʼYANÍ nga totjíokjonangi ʼnde je xtiʼndí kʼianga jemale nchja̱. Tsakui nichxin i̱ kuitsoná: “Ánni kʼoakjisíni ngʼá”. “Ánni nga kʼoakjoansíni niño”. “Ánni nga sesíni je nise”. Ninga nʼio kjoásjailee jokʼuínlee, tonga sakʼoaa likui tiʼyañá jokuixoán. Ninga nʼio nda kʼuínlee koa̱nná, tonga titsongáni: “Kʼoa ánni”.

² Ali tsa tojejin je xtiʼndí xi kʼoasʼin kjonangi. Jokji nga jefiná nó toxá chjonangiñá. Sakʼoaa kui chjonangiaa josʼiaan nga tsín jme kjoa ska̱jiaan. Kʼoati chjonangiaa jósʼin kuichoaa jngo ʼnde kʼoa tsa maije̱ totjín xi mená jchaa. Tonga nʼio nkjín chjota xi likui tikjonangini jmeni xi nʼio chjíle. Kʼoa tsa maije̱ likui tibásjaiyani.

3. Ánni nga likui tibásjaiyasíni je chjota je kjoachjonangi xi nʼio chjíle.

³ Tokuila tikjaʼaitsjain joʼmi libro jebi kʼoa kao kjoachjonangi xi nroatʼa ya pájina 3 kao 6 kʼoa jña fitsʼiasíni kjoaʼmiya  jebi. Kui kʼa jebi kjoachjonangi xi ngisasa nʼio chjíle. Tonga nʼio nkjín chjota xi tsín tikui tjíobásjaiyani. Ánni. A yaa Biblia koa̱nsjaitʼaná tsokʼoa. Tjínkʼa xi kʼoatso nga nʼio ñʼai tjín jmeni xi tso je Biblia. Kʼoa tjínkʼa xi kuinga tsín kjonangini nga tsín mele nga kjoasoa koatiojin. Kʼoa tjíoje̱ xi kʼoasʼin síkjaʼaitsjen nga ngisa nda nga je kuitsoya xi nyatítjonle relijión. Jósʼin nikjaʼaitsjenngái ji.

4, 5. Jméni xi sakʼoa nʼio chjonangilee yaoná, kʼoa ánni nga machjénsíni nga kuijnyísjaiyaa.

⁴ Ji, mejinli jchai tʼatsʼe jmeni xi nʼio chjonangilee yaoná. Tsakui nichxin sakʼoa i̱si: “Jmé xá jaʼaiñá sonʼnde. A tokui xá kitsinñá nga kjoañʼai chja̱ʼá kʼoa nga kuiyá. Jókjoan je Niná”. Nda nʼiai nga nikjaʼaitsjain xi tʼatsʼe jebi kʼoa nʼio chjíle nga likui koa̱ntsʼai saʼnda nga so̱koli je én xi ñaki kʼoatjín xi kʼoejngoni tokuin. Je Jesucristo, xi nʼio nda maestro koan, kitso: “Tijáo, kʼoa kʼoaino. Tijnyísjao kʼoa koa̱nsjaino. Tikjanetʼao xo̱ntjoa, kʼoa tjóʼaino” (Mateo 7:7).

⁵ Kʼiatsa tosi tonda kuijnyísjai jokjoantjínni jmeni xi nʼio chjonangilai yaoli, jchaní nga tsín toxitsjoa nga kʼoasʼiain (Proverbios 2:1-5). Ninga tojmeyeje xi kuitsoli chjota, je én xi mená jchaa tjíoni kʼoa alikui kjin tjío. Yaa Biblia faʼaitʼa kʼoa likui ñʼai tjín. Kʼoa xi ngisasa nda, kuinga tsjoáná kjoachoya kao kjoatsjoa, kʼoa basenkaoná nga nda bijnaa ninga ndʼaibi. Kuila kʼoétsʼiakaoñá jmeni xi nʼio kjonangile yaole je chjota.

6. Ánni nga nkjín chjota xi kʼoasʼin síkjaʼaitsjensíni nga tsín mandosinle Niná je kjoañʼai xi tichjaʼá.

⁶ Nʼio nkjín xi kʼoatso nga mai. Kʼoatso nga ndajinxó chon tsa mandosinlanilee je Niná. I̱ Sonʼnde jñani tiyoaa ñaki to kjoajchán tjín kao kjoajticha kʼoa kao kjoaʼaon. Chʼin bʼetʼaná, kjoañʼai chjaʼá kʼoa biyaa xíngiaa. Kuinga  i̱ tso kʼasíni chjota: “Tsa mandosinlanilee je Niná, a tsí kjoaʼaxinná ngayeje kjoa jebi”.

7. 1) Ánni kʼoabixónsíñá nga je chjota xi tʼatsʼe Niná bakóya tsole yaole xotjíosʼín nga kʼoasʼin síkjaʼaitsjen chjota nga likui jomale Niná jmeni xi maná. 2) Jmékjoánni xi bakóya je Biblia xi tʼatsʼe kjoañʼai xi tichjaʼá.

⁷ Kʼoa xi ngisasa chʼaotjín kuinga nʼio nkjín chjota xi tʼatsʼe Niná bakóya tsole yaole xotjíosʼín nga kʼoasʼin makjainle chjota nga likui jomale Niná jmeni xi maná. Tobʼelañá, kʼianga jngo kjoaxkón faʼaine chjota, kʼoatso nga je Niná xi kʼoasʼin mele. Kʼianga kʼoatso, jékjoánni Niná fánele. Tonga a kʼoatjín. Jmékjoánni xi bakóya je Biblia. Ya Santiago 1:13 tso: “Kʼiatsa jngo xi kjoatsʼen chʼao síkao, ali tsojin tsa je Niná xi chʼao síkao kao kjoatsʼen. Je Niná alikui male tjoé kjoatsʼen, kʼoa nijngojin xi je chʼao síkao kao kjoatsʼen”. Kʼoatjín, je Niná nikʼiajinla nga je xosʼín jmeni xi chʼao kjima i̱ Sonʼnde (tʼexkiai Job 34:12). * Kjoaixiní nga títsjoáʼnde nga kʼoakjima xi chʼaotjín, tonga likui mangóson jmeni xi tobʼaiʼndee kʼoa jmeni xi ñásoa kʼoanʼia.

8, 9. 1) Jmé xi koa̱n si̱ngósonkoai nga koakoyai nga tsín mangóson nga bʼaiʼndee je xi chʼaotjín kʼoa nga ñásoa kʼoanʼia. 2) Ánni nga chʼaotjínsíni tsa chʼaosʼin si̱kʼaxkiaa Niná nga kʼoasʼin títsjoáʼnde nga kui ndiaa xi tsín nda tjíokjoé chjotasonʼnde.

⁸ Tikjaʼaitsjenlai tʼatsʼe jngo nʼai xi tjínle kjoafaʼaitsjen kʼoa xi tsjoake je tile xi sʼa ya tíjnaʼyakao yaniʼyale. Kʼianga maxíjin ti jebi kʼoa fi, je nʼaile alikui bʼéchjoale. Je ti jebi kui ndiaa xi tsín nda kjoé kʼoa kjoa kajin. A síní nga je nʼaile xotísʼín nga kjoa tíkajin ti jebi. Maijin (Lucas 15:11-13). Kʼoatisʼinni xi kao Niná, alikui tíbʼéchjoale je chjotasonʼnde nga kui ndiaa xi tsín nda tjíokjoé, tonga ali tsakuijin xi tsonile nga je xotísʼín nga kʼoasʼin kjoañʼai tjíojinni je chjota, tijé xotjíosíkaoni yaole. Nʼiojin chʼaotjín tsa je Niná kjoánelee je kjoañʼai xi tjíofaʼá chjotasonʼnde.

 ⁹ Je Niná bení anni nga kʼoasʼin títsjoáʼndesíni nga kui ndiaa xi tsín nda tjíokjoé je chjotasonʼnde. Makjoanni nga nʼio chjine kʼoa nga je kisindaná alikui tjínnele kuitsoyaná anni nga títsjoáʼndesíni jebi. Tonga kui kjoatsjoachale xosíkao nga kʼoasʼin tsoyaniná. Yaa kjoaʼmiya tejngo kuitsoyandasaná anni nga títsjoáʼndesíni. Tonga koaan kʼoakʼoaí tokuin nga tsín je Niná tjínle jée nga kjoa tiyojiaan. Je Niná tosa jngo kjoachoya tsjoáná nga sʼe̱ndajin kjoa jebi (Isaías 33:2).

10. Ánni nga koa̱n koa̱nkjainsíniná nga kjoaʼaxin Niná ngayeje kjoañʼai xi tjín xi totʼatsʼe kjoatsʼen.

¹⁰ Xi ijngosani, tsjení je Niná (Apocalipsis 4:8). Jebi kui xi tsonile nga nijmejin kjoatsʼen tjínle. Kuinga koa̱n si̱nʼiotʼasíñá yaoná, tonga xi kao chjotasonʼnde alikui koa̱n si̱nʼiotʼa yaoná, nga̱ sakʼoaa chʼao sʼín. Saʼnda nijejinla chjotaxá xi nʼio kixi koa̱nle kʼoendajin jmeni xi tjíosʼín chjotatsʼen. Tonga Niná, jésa xi ngisasa tse nganʼio tjínle. Koaanle kjoaʼaxin ngayeje kjoañʼai xi tjín xi totʼatsʼe kjoatsʼen, kʼoa kʼoaasʼin. Kʼoa kʼianga kʼoasʼin, ñaki tondiaa kjoaʼaxinní ngayeje kjoatsʼen (tʼexkiai Salmo 37:9, 10). *

11. 1) Jósʼin bekon Niná je xi tsín kixi tjín. 2) Jómale Niná kʼianga kjoañʼai chjaʼá.

¹¹ Tonga, jómale Niná tʼatsʼe jmeni xi kjima i̱ Sonʼnde kʼoa jmeni xi tibitjatojiaan. Je Biblia kʼoatso nga kui xi kixi tsjoake (Salmo 37:28). Je Niná nʼio mandosinle tsa jme xi ndatjín kʼoa nʼio síkjáojin tsa jme xi chʼaotjín, kʼoa jtikení tojmeni xi tsín kixi. Je Biblia kʼoatso nga “ba koanle ni̱ma̱le” kʼianga kjoatsʼen kisʼejnakitse i̱ Sonʼnde nichxin kjoatse (Génesis 6:5, 6). Kʼoa je Niná alikui tíbʼantjaiya  kjoafaʼaitsjenle (Malaquías 3:6). Tojo jtikení je xi chʼaotjín kʼoa mamakení je xi kjoañʼai tjíofaʼá. Je Biblia itsoná: “Je [Niná] tísíkuindano” (tʼexkiai 1 Pedro 5:7).

12, 13. 1) Ánni nga tjínsíniná kjoatsjoacha, kʼoa nga kui tjínna, jósʼe tokoán tʼatsʼe kjoañʼai xi tjín Sonʼnde. 2) Ánni nga tjínjngosíni tokoán nga kjoaʼaxin Niná ngayeje kjoa xi tjín ngakjijnda Sonʼnde.

¹² Ánni nga koa̱n kʼoakʼoésíñá tokoán nga aon male Niná kʼianga kjoañʼai chjaʼá. Ijngolasa choa̱ jchaa. Je Biblia kʼoatso nga Niná kʼoasʼin kisinda chjota jokji sénle (Génesis 1:26). Kuinga tjínniná kjoatsjoacha, kjoamatokon kʼoa kao kjoanda nga̱ jé Niná xi kui tjínle. Tobʼelañá, ji, a tsí mamachai je chjota xi tsín jme jée tjínle kʼianga ʼyai nga kjoañʼai tjíofaʼá. Tsa aon mali ji nga ʼyai jebi, likui jao tjínná nga ngisa aon male Niná.

¹³ Jngo xi ngisa ndatjín xi tjínná xi chjotaa kuinga ma bakoá kjoatsjoacha. Xi tʼatsʼe jebi kʼoati mangósoán kao je Niná xi kisindaná, nga̱ je Biblia itso: “Jé Niná xi kjoatjaocha” (1 Juan 4:8). Kuinga tjínniná kjoatsjoacha nga̱ kuiní je Niná. Kʼiatsa tjínlanili nganʼio nga koa̱n chja̱ʼaxin je kjoañʼai kʼoa kao je kjoa xi tsín kixi kjima i̱ Sonʼnde, a tsí kʼoasʼiain. A tsí je kjoatsjoachali xosikaoli nga kʼoasʼiain. Jaonjin. Ngo̱ koaan ñaki kʼoakʼoaí tokuin nga kjoaʼaxin je Niná ngayeje kjoa xi tjín ngakjijnda Sonʼnde. Je én xi tsakʼexkiai ya pájina 4 kao 5 ali tsa to énkjitiajin, jé Niná xotso kʼoa ñaki kuitjosonní. Tonga, kʼianga ñaki koa̱nkjainná én jebi nʼio machjén nga nda jchaa je Niná xi kʼoatso nga kʼoakoa̱n.

14. Jóʼmi Niná, kʼoa ánni nga tjínnesíniná si̱chjén jaʼaínle.

¹⁴ Jméni xi títjon ʼmilai jngo chjota xi meli nga skoe̱li. A tsíkui títjon ʼmiyalai joʼmili. Kʼoa a tjínle jaʼaín je Niná. Nkjín mani relijión xi kʼoatso nga to “Niná” kʼoa “Señor” ʼmi, tonga én jebi ali tsa ñaki jaʼaínjin. Tokʼoasʼin mangóson jolani tsa je én xi “rey” kʼoa tsa xi “chjotaxá” tso. Je Biblia kʼoatso nga nʼio nkjín koya josʼin ʼmile je Niná, jolani én xi Niná kʼoa xi Señor tso. Tonga kʼoati bakóya nga tjínle jaʼaín, kʼoa kʼoatso nga Jeobá ʼmi. Ya Salmo 83:18 itso: “Ji xi Jeobá ʼmili, tojiní xi nʼio ngʼa tijnalai jngo tjíjtsa sonʼnde”. Kʼiatsa tsín  faʼaitʼa Bibliali je jaʼaín jebi, koaan chótʼajin ya jñani tso: “Jaʼaínle Niná: jósʼin machjén kʼoa jósʼin tsoyanile” ánni nga tsín faʼaitʼasíni. Nga̱ je Biblia jchá xi kichji kjoatse me ñato jmi kʼa faʼaitʼa jaʼaínle Niná. Je Jeobá mele nga jchai je jaʼaínle kʼoa nga si̱chjain. Xi ijngoni én, jé Biblia tísíchjén Niná nga kataʼyai ʼyani je.

15. Jósʼin tsoyanile jaʼaín xi Jeobá tso.

¹⁵ Je jaʼaín xi Jeobá tso xi jesoa Niná kitsjoale yaole, nʼio tse xi tsoyanile. Kui tsoyanile nga koa̱nle sitjoson ngayeje én xi bitjoni tsʼoa kʼoa nga kʼoasʼin josʼin tjínndajinle. * Je jaʼaínle Niná tojé xi bakinle. Chótsenla kʼalee jósʼin nga tsín ʼya xi mangóson kao je Jeobá.

16, 17. Jméni xi bakóyaná xi tʼatsʼe Jeobá én jebi: 1) “Tjínle ngayije nganʼio”. 2) “Chjotatítjon xi batéxomantsjai”. 3) “Xi kisinda ngayeje”.

 ¹⁶ Jesa kaʼyaa Salmo 83:18 nga i̱ tso xi tʼatsʼe Jeobá: “Tojiní xi nʼio ngʼa tijnalai jngo tjíjtsa sonʼnde”. Kʼoa kʼoati toje xi “tjínle ngayije nganʼio” (Lucas 1:49). Jebi kui xi tsonile nga ngisa tse nganʼio tjínle tikʼoajinni toʼyani. Aliʼya xi mangósonkao. Kʼoa ya 1 Timoteo 1:17 “Chjotatítjon xi batéxomantsjai” ʼmile Niná. Kui xi bakóyaná nga tojé xi tokʼoa tíjna saʼnda ngasʼa. Kʼoa ya Salmo 90:2 itso: “Saʼnda nichxin xi jaʼato kʼoa saʼnda tokʼiani [xi tsonile, ngantsjai nichxin] jiní Niná”. A tsí kjoaixi nga ñaki tomaxkónná nga kui nikjaʼaitsjeen.

¹⁷ Ijngosa tíjna anni nga tsín ʼya xi mangósonsíni kao Jeobá: jé kisinda ngayeje xi tjín. Ya Apocalipsis 4:11 tso: “Señor, bakinli nga ji katjitjojeyai, kʼoa nga xkón kataʼyatakonli, kʼoa katasʼeli nganʼio, nga ji kinindai ngayije tsojmi, nga ji koanmetakuin nga kisʼe, kʼoa kʼoasʼin koan”. Jé Jeobá kisinda ngayeje tsojmi xi tjín: je ánkje kʼoa kao niño xi tjío ngʼajmi, je to xi bale yá, je jti̱ xi tjín ya jinndáchikon kʼoa kao xo̱ngá, kʼoa nʼiosa nkjín tsojmi xi kisinda.

18. Ánni nga kʼoasʼin síkjaʼaitsjen kʼasíni chjota nga nikʼiajin koa̱n si̱chriantʼalee Niná, tonga jósʼin bakóya Biblia.

¹⁸ Tjínkʼa xi toʼi̱natjío ma kon jokji jeya tíjna Jeobá. Kʼoasʼin síkjaʼaitsjen nga nʼio ngʼa tíjna je Niná kʼoa nga nikʼiajin koa̱n si̱chriantʼalee kʼoa tsa maije̱ nga tsín mandosinlee. A kixi tíjna kjoafaʼaitsjen jebi. Je Biblia kjaʼaí tso xi tʼatsʼe Jeobá, itso: “Nga tsí tsa kjin tíjnaná nga jngó jngoá” (Hechos 17:27). Saʼnda itsoná: “Tichriantʼalao Niná, kʼia kʼoati je sichriantʼano nga jon” (Santiago 4:8).

19. 1) Jósʼin koa̱n si̱chriantʼalee je Niná, kʼoa jmé kjoanda xi so̱koná. 2) Jñánile xi ngisa tsjoachai jokjoan Jeobá.

¹⁹ Jósʼin koa̱n si̱chriantʼalai je Niná xi kisinda ngayeje  xi tjín. Xi títjon, tosi tonda chótʼayai, katamali xi tʼatsʼe Niná jokji tjen kuicho kjoafaʼaitsjenli. Je Jesús kitso: “Jé xi kjoabijnachon ngantsjai, nga kʼoasʼin skoe̱li xi tojngo ji Niná xi ñaki kjoakixi, kʼoa skoe̱ Jesucristo je xi kinikasáin” (Juan 17:3). Tojo tso je Biblia, kʼianga jchaa je Jeobá kao Jesús “kjoabijnachon ngantsjai” so̱koná. Jekaʼyaa nga “kjoatjaocha je Niná” (1 Juan 4:16). Tonga nʼiosa nkjín koya xi naskánatjín tjínle Jeobá jonga kjoan kʼoa kui xosíkaoná nga nichriantʼalee. Tobʼelañá, je Biblia kʼoatso nga Niná “tjínle kjoamatokon” kʼoa “mamake chjota, likui tokjoan síjtile yaole kʼoa nʼio tjínle kjoatsjoacha xi ñaki kjoakixi kʼoa kao xi ñaki kʼoatjín” (Éxodo 34:6). Je Niná nda chjota kʼoa tíjnandaní nga síchatʼa (Salmo 86:5). Tsejtaní (2 Pedro 3:9). Ñaki kixiní, kʼoa koaan koa̱nkjainná jme xi tso (Revelación [Apocalipsis] 15:4, TNM). Kʼianga tosi tonda kʼoéxkiai je Biblia, jchaní josʼin tíbakó Jeobá ngayeje jebi kʼoa xi kjaʼaísale.

20-22. 1) Kʼianga tsín ʼyañá xkoaan je Niná, a kui xi tsonile nga tsín koa̱n si̱chriantʼalee. 2) Jmé xi kuitso kʼali chjota nga Biblia tichotʼayai, tonga jméni xi ndatjín nga sʼiain.

²⁰ Kjoakixiní nga likui ʼyaa je Niná xi kao xkoaan, nga̱ espírituní kʼoa likui matsen (Juan 1:18; 4:24; 1 Timoteo 1:17). Tonga je Biblia bakóya jokjoan Niná. Tojo kitso je David, koaan jchai je kjoandale Jeobá (Salmo 27:4; Romanos 1:20). Kʼianga ngisasa tse jchai xi tʼatsʼe, ñaki tiʼyakjoánni koaanli, ngisasa koa̱ntsjoachai kʼoa koa̱nchriantʼalai.

²¹ Tojbijbi koa̱njinnili ánni nga kʼoatsosíni Biblia nga ñaki jo Nʼainá sʼin jchatokoán je Niná (Mateo 6:9). Ali tsa to kjoabijnachonjin kitsjoaná, kʼoati kui xi mele nga nʼio ndasʼin kuiyoaa, tojo sʼín jngo nʼai nga kui xi mele nga nda koatio xtile (Salmo 36:9). Je Biblia kʼoati bakóya nga koa̱n miyole Jeobá koaan xi chjotasonʼnde ʼminá (Santiago 2:23). Tocha̱niyalai jkui, koaan miyole koai̱n je Niná xi kisinda ngayeje.

 ²² Kʼianga jejchasai xi tʼatsʼe Biblia, tsakui nichxin kao kjoandale kʼoakuitso kʼanili chjota nga likui tichótʼayani. Tsakui nichxin kui kʼoakuitsonili nga likui mele nga si̱kʼantjaiyai kjoamakjainli. Tonga li bʼaiʼndejin nga ʼya xi kʼoechjoali nga tosi tonda si̱miyui Niná, nga̱ jéní Niná je miyo xi ngisasa nda xi koa̱n sʼe̱li.

23, 24. 1) Ánni nga koa̱n chjónangisíni jmeni xi tsín majinli. 2) Jméni xi chótʼayá ya kjoaʼmiya xi fini.

²³ Xi kjoaixi, tjínjin jñani nga tsín koa̱njinli nga títjon. Tonga ali masoajinli, tijái nganʼio. Jesús kʼoakitso nga ndatjín nga nangitokon maa joni tsa jngo tiʼndí (Mateo 18:2-4). Kʼoa jeʼyaa josʼín je xtiʼndí nga totjíokjonangi tojmeyejeni. Je Niná mele nga jchai jmeni xi chjonangilai yaoli. Je Biblia nʼio nda síkʼaxki̱ kʼa chjota xi tsakatio nichxin kjoatse xi kʼoasʼin nʼio koanmele tsabe xi tʼatsʼe Niná. Kʼoa kuinga nʼio nda kiskotʼayajinsíni je xo̱nle Niná kʼoa tsakásjaiya tsa ñaki kʼoatjín jmeni xi tsakʼinyale (tʼexkiai Hechos 17:11).

²⁴ Tokʼiaa nga Biblia chotʼayá nga ngisasa nda ʼyaa je Jeobá. Tsínsa ijngo xo̱n xi mangóson kao Biblia. Ánni. Yaa chótʼayá jebi ya kjoaʼmiya xi fini.