1. Ánni kʼoakitsosíni jngo chjota xi xá kisʼele ya ndʼiabasenle naxinandá Etiopía nga katachanisʼenngindá.

“¡KOENI! Tjín nandá ibi; jmé xi bʼéchjoana an nga koa̱n kjuísʼe̱nngindá”, kitso jngo chjota xi xá kisʼele ya ndʼiabasenle  naxinandá Etiopía nichxin kjoatse. Nga kjesa chanisʼenngindájin chjota jebi, je Felipe kʼoasʼin kitsoyale kao Énle Niná nga jé Jesús je Mesías xi tíchoyale. Chjota jebi ñaki tokʼoakoanle jmeni xi tsakʼinyale kʼoa kuinga kʼoakitsosíni nga katachanisʼenngindá (Hechos 8:26-36, TNM).

2. Ánni nga jekoa̱n kui si̱kjaʼaitsjensíni xi tʼatsʼe kjoachanisʼenngindá.

² Tsa jenda kichotʼayai kjoaʼmiya xi jaʼato kao jngo testigole Jeobá, tochale kʼoatisʼin tinikjaʼaitsjain: “Jmé xi bʼéchjoana an nga koa̱n kjuísʼe̱nngindá”. Jeʼyai nga kʼoatso Biblia nga ya koatio je chjota ya sonʼndenaxó tokʼia saʼndani (Lucas 23:43, TNM; Apocalipsis 21:3, 4). Kʼoati jeʼyai josʼin tjío je kʼien kʼoa nga kjoaʼáyanile (Eclesiastés 9:5; Juan 5:28, 29). Tsakui nichxin jeʼmi je kjoajtín xi batío je testigole Jeobá kʼoa jeʼyai nga kui tjíojin relijión xi kixi (Juan 13:35). Kʼoa tsakui nichxin jengisasa nʼio kjimachriantʼalai je Niná Jeobá.

3. 1) Jmé xi tsakʼénele Jesús je chjotale. 2) Jónikao jngo chjota xi mele nga chjotale Cristo koa̱n.

³ Jósʼin koakui nga meli si̱xálai Niná. Jesús isʼin tsakʼénele chjotale: “Kuinga tanginsíño, kʼoa chjotana tikao je chjota xi tjín ngakjijnda naxinandá, cha̱nisʼenngindáo” (Mateo 28:19, TNM). Jesoa Jesús tsakʼéjnaná choa̱, nga̱ je kʼoati kichanisʼenngindá. Tonga li tsa to jko̱jin kisʼejtenson nandá (Mateo 3:16, TNM). Kuinga ñaki chanisʼenngindá kjijngosíni yaole je xi mele nga chjotale Cristo koa̱n.

4. Jméni xi bakoá kʼianga chanisʼenngindá yaoná.

⁴ Toʼyani xi mele nga nda kʼoéjna ngixko̱n Jeobá tjínnele ska̱nisʼenngindá yaole. Kʼianga chanisʼenngindá yaoná kʼoasʼin bakoá ngixko̱n chjota nga mená si̱xálee Niná kʼoa nga tsjoachaa nga kʼoanʼia josʼin mele (Salmo 40:7, 8). Tonga nga koa̱n koanngínsʼenngindá nkjín koya jmeni xi machjén nga sʼiaan.

5. 1) Jméni xi títjon machjén nga koa̱n koanngínsʼenngindá. 2) Ánni nga nʼio machjénsíni nga kʼuín ntsjaintsjai je kjoajtín xi satío.

⁵ Ji, jekʼoatinʼiai xi títjon. Ánni. Kuinga jetiʼyai tʼatsʼe Niná Jeobá kao tʼatsʼe Jesucristo nga kʼoasʼin tíʼmiyali Biblia (tʼexkiai Juan 17:3). Tonga tsesa xi sʼa koa̱nsali. Je chjotale Cristo kui xi mele nga skoe̱sa jmeni xi mele Niná (Colosenses 1:9). Je xi nʼio koasenkaoli nga jchai jmeni xi mele Niná kui je kjoajtín xi batío je testigole Jeobá. Kuinga tʼin ntsjaintsjaisíni (Hebreos 10:24, 25). Tsa ntsjaintsjai kʼuín, ngisa jchasai xi tʼatsʼe Niná.

6. Jókji tjínnele jchai xi tʼatsʼe Biblia kʼianga koa̱n kʼuínsʼenngindái.

⁶ Kʼianga koa̱n kʼuínsʼenngindái ali tsakuijin xi tsonile nga síkoa̱n kjijngoli jotso Biblia. Jela tikjaʼaitsjain je chjota xi yaná Etiopía tsʼe, tokʼoa jebe choa jotso Énle Niná, tonga tojo koanchjén nga tsakʼinyandasale (Hechos 8:30, 31). Tikʼoasʼinni, ji tsesa xi sʼa jchai. Kʼoa likuikʼia kjoetʼa nga jchasai xi tʼatsʼe Niná (Eclesiastés 3:11). Tonga nga koa̱n kʼuínsʼenngindái, machjénní nga jchai kʼoa nga koa̱nkjainli jmeni xi tsoya Biblia (Hebreos 5:12). Tobʼelañá, josʼin tjío xi jekʼien, jokji chjíle je jaʼaínle Niná kʼoa josʼin koatexoma je Chjotaxále.

7. Jméni xi machjén nga katasʼeli kʼianga tichotʼayai Biblia.

⁷ Tonga ali tsa tokui xi machjén nga jchaa xi tʼatsʼe Niná, nga̱ “tsa tsín makjainná, likui nda sʼekon Niná xi tʼatsaan” (Hebreos 11:6). Je Biblia bʼéyanajmí jokisʼin kʼa chjota xi ya Corinto tsʼe kʼianga kinrʼoé je én xi tjíotsoyason chjotale Cristo, “koankjainle kʼoa kisʼenngindá” (Hechos 18:8, TNM). Kʼoati choyalee nga kʼoasʼiain tsanda ji. Nga ñaki katamakjainli nga tʼatsʼe Niná kinroani Biblia. Nga katamakjainli nga sitjoson Niná jmeni xi tjínndajinle kʼoa nga koa̱nle kʼoasjentjaili xi totʼatsʼe kjoabʼechjíntjaile Jesús (Josué 23:14; Hechos 4:12; 2 Timoteo 3:16, 17).

8. Jméni xosikaoli nga koa̱nmeli chja̱kaonajmí chjota jmeni xi jetiʼyai.

⁸ Kʼianga sa tse sa tsesa kjoamakjain sʼe̱li, ngisa koa̱nmeli chja̱kaonajmí chjota jmeni xi jetiʼyai (Jeremías 20:9). Koa̱nmeli nga kʼuínyai xi tʼatsʼe Niná kʼoa jmeni xi tjínndajinle (tʼexkiai 2 Corintios 4:13).

9, 10. 1) Xi títjon, ʼyáni xi koa̱n kʼuínyalai jotso Biblia. 2) Jméni xi sʼiain tsa meli kʼuínyasuin kao je testigole Jeobá.

⁹ Xi títjon, koaan ngasin nganda kʼuínyalai jotso Biblia je xíngi, je miyoli, je chjota ndaindʼiali kʼoa kao xi ñatjen nixái. Xi koa̱nskanni, tsakui nichxin koa̱nmeli kʼuínkoai je testigole Jeobá kʼianga tsoyason. Kʼianga jekoa̱nmeli kʼuínyasuin, kʼoatʼinlai je xi títsoyali Biblia. Kʼiatsa jebele kon je xi títsoyali nga jekoa̱n kʼuínyasuin, jao xi chjotajchínga sʼin tjío ya jinjtín kjoakaonajmíno.

¹⁰ Kʼoasʼin ngisa nda jchai je xi chjotajchínga sʼin tjío ya jinjtín, je xi síkuinda naxinandále Niná (Hechos 20:28; 1 Pedro 5:2, 3). Je xi kuenta sʼin je chjotajchínga jebi kui tsa jemajinli kʼoa tsa makjainli jotso Biblia. Tsa jekʼoasʼin tiʼmikoai kjoabijnachonli jotso kjoatéxomale Niná kʼoa tsa ñaki meli nga testigole Jeobá koai̱n. Tsa jaon, kʼoakuitsoli nga jekoa̱n kʼuínyasuin énnda chjotse xi tsʼe Niná ninga kje ʼmisʼenngindájin.

11. Jméni xi tjínnele sikʼéjna jngo chjota tsa mele kuitsoyason.

¹¹ Tonga je xi chjotajchínga sʼin tjío sakʼoaa be nga tjínsa xi chale jngo chjota kʼianga koa̱n kuitsoyason. Tobʼelañá, tsakui nichxin kui tjínneli si̱kʼéjnai jngo jée xi kje nikʼéjnajin. Kuinga tongini nga kjesa kʼoaʼmijinlai je xi chjotajchínga sʼin tjío nga jemeli kʼuínyasuin je Énle Niná, títjon kjoanla tikʼéjnai jme xi jée tjenkao, jolani tsa kjoachajngi, kjoachʼi̱ kʼoa tsa droga (tʼexkiai 1 Corintios 6:9, 10; Gálatas 5:19-21).

12. Ánni nga nʼio machjénsíni nga kʼoakoa̱nniná jéená.

¹² Kʼianga koa̱n kʼuínsʼenngindái, nkjínsa koya xi machjén nga sʼiain. Je pastro Pedro kitso: “Tikʼantjaiyao [...] kjoafaʼaitsjenno, katabʼantjaiyanio, jméni nga cha̱tʼasíni jéeno” (Hechos 3:19). Kʼianga síkʼantjaiya kjoaixi kjoafaʼaitsjenle jngo chjota kʼoamanile jéele. Tonga ali tsa tojejin chjota xi kjoachajngi kisʼin xi tjínnele nga kʼoakoa̱nnile jéele, kʼoati tjínnele nga kʼoakoa̱nnile jéele ninga xi nda tjíofikao yaole. Ánni. Kuinga chjotajée maa ngatsʼiaa kʼoa machjénná kjoanichatʼale Niná (Romanos 3:23; 5:12). Kʼianga kjesa chotʼayajin Biblia likui ʼyai jmeni xi mele Niná. Kʼoa likuijin kʼoasʼin kʼinkoai yaoli jokjoansʼin mele. Tojosʼin tiʼyaa, nʼio machjén nga kʼoakoa̱nniná jéená.

13. Jmé xi tsoyanile nga ñaki si̱kʼantjaiyaa yaoná.

¹³ Tonga kʼoati machjén nga si̱kʼantjaiyaa yaoná. Kʼianga si̱kʼantjaiyai yaoli ali tsa tokuijin xi tsonile nga kʼoakoa̱nnili jme xi kinʼiai, kui xi tsonile nga tsín tikʼoasʼianni jokinʼiai ngasʼa. Ñaki kʼoatʼai tokuin nga tokuisa xi ndatjín kʼoasʼiain. Kʼianga kjesa chanisʼenngindájián yaoná títjon kjoanla machjén nga kʼoakoa̱nniná jéená kʼoa nga si̱kʼantjaiyaa yaoná.

14. Jmésa xi machjén nga sʼiain nga kjesa ʼmisʼenngindájin.

¹⁴ Ijngosa xi nʼio machjén nga sʼiain nga kjesa ʼmisʼenngindájin. Kuinga kʼoaitʼalai yaoli je Niná Jeobá.

15, 16. Jósʼin tsoyanile nga bʼaitʼalee yaoná je Niná, kʼoa jméni xosikaoná nga kʼoasʼiaan.

¹⁵ Kʼianga bʼaitʼalee yaoná je Jeobá jngo kjoabʼetsʼoa bʼejnalee kʼianga kʼoaʼmilee nga ñaki tojé jchaxkoán tokʼia saʼndani (Deuteronomio 6:15). Tonga ánni nga kʼoasʼiansíñá. Si̱kjaʼaitsjenla jngo chjota xi kʼoakuitsole jngo chjoón nga mele skoe̱xkon. Kʼianga sa tse sa tsesa skoe̱ chan sa koa̱ntsjoake sa koa̱ntsjoakesa je chjoón. Kʼoa tochanjin  kʼoakuitsole je chjoón nga katabixankao. Kʼianga jekuixankao chjoón jebi ngisa tse xá tikjinéngánile. Tonga tsa nʼio tsjoake je chjoón alikuijin kui koaini.

¹⁶ Kʼianga jeʼyaa kʼoa matsjoachaa Jeobá, kui xosíkaoná nga nʼio nixánilee, kʼoa nga kui títjon nikʼéjnaa kjoaʼyaxkón xi tibʼailee. Je chjota xi mele koaitjenngile Jesucristo, ʼNdíle Niná, tjínnele tsjiónkon yaole (Marcos 8:34). Kʼianga njiotokoán yaoná kui xi tsonile nga nitjosonlee Niná kʼoa nga tsín bʼaiʼndee nga kui bʼéchjoaná tsa jmeni xi tsjoachaa kʼoa tsa jmeni xi mená kuichotjenngiaa. Nga kjesa chanisʼenngindájin yaoli kʼoatʼai tokuin nga jekui kʼoasʼiain josʼin mele Niná (tʼexkiai 1 Pedro 4:2).

17. Ánni nga tjínkʼasíni chjota xi tsín tsjoátʼale yaole Niná.

¹⁷ Tjínkʼa chjota xi tsokjón nga tsjoátʼale yaole Jeobá, nga̱ jetsesa xi kjinele ʼyani xi kʼoasʼín. Tochale kui xi tsokjónle nga kuenta tsjoále Niná nga jekatsjoátʼale yaole. Kʼoasʼin síkjaʼaitsjen nga chʼao sʼe̱ kon Jeobá tsa so̱kojéele kʼoa nga tongisa nda nga tsín tsjoátʼale yaole.

18. Jméni xosikaoli nga kʼoaitʼalai yaoli je Jeobá.

¹⁸ Kʼianga ngisasa koa̱ntsjoachai je Jeobá, kui xosikaoli nga kʼoaitʼalai yaoli kʼoa nga si̱tjosuin jokaʼmilai (Eclesiastés 5:4). Kʼianga jekʼoaitʼalai yaoli je Niná, kʼoajinsʼin koa̱nmeli kuitómjai “josʼin nga bakinle Nainá [Jeobá], jñale ngayije xi sasénle nga je” (Colosenses 1:10). Tsa tsjoachai Niná alikuijin ñʼai koa̱nli nga si̱tjosuin josʼin mele. Kʼoajinti sʼin nikjaʼaitsjain jokitso je pastro Juan: “Kʼoasʼin tjaochaa Niná, nga nikjitjosoán kjoatéxomale. Je kjoatéxomale ali ñʼaijin tjín” (1 Juan 5:3).

19. Ánni nga tsín kuijkónsíni nga kʼoaitʼalai yaoli je Niná.

¹⁹ Je Niná ali tsakuijin xi síjé nga ñaki tsje je chjota xi tsjoátʼale yaole. Je Jeobá be jokji tjen bichó nganʼioná  kʼoa nikʼiajinla kui sijéná jmeni xi tsín kʼoakoa̱nná (Salmo 103:14). Je Niná koasenkaoli nga̱ mele nga nda kuijnai (tʼexkiai Isaías 41:10). * Tsa ñaki je Jeobá si̱nʼiotʼai yaoli kao ngayeje ni̱ma̱li “jé sikixiya je ndiaali” (Proverbios 3:5, 6).

20. Ánni nga machjénsíni nga katabe xi ngikʼa nga jekabʼaitʼalai yaoli je Jeobá.

²⁰ Kʼianga si̱kjaʼaitsjain jmeni xi jekachotʼayá ibi, tsakui  nichxin koa̱nmeli kʼoétsʼoalai Jeobá kʼoa kʼoakʼuínlai nga meli kʼoaitʼalai yaoli. Tonga ngatsʼi xi tsjoake kjoaixi Niná ijngosa xi machjén nga sʼin: tjínnele tsjoá “kjoakixil[e] ngixko̱n nkjín testigo” (1 Timoteo 6:12). Jósʼin.

21, 22. Jósʼin kʼoai “kjoakixili ngixko̱n nkjín testigo” xi tʼatsʼe kjoamakjainli.

²¹ Kʼoatʼinlai je chjotajchínga xi coordinador sʼin tíjnale je chjotajchínga xi ngikʼa nga meli kʼuínsʼenngindái.  Je, kʼoakuitsole je chjotajchínga xi ngikʼa nga skónangi ngindiali jmeni xi bakóya Biblia. Tsa bele kon je chjotajchínga jebi nga jekoa̱n kʼuínsʼenngindái, kʼoakuitsoli nga jekoa̱n kʼuínsʼenngindái ya kjoajtíntse xi me tiʼakʼia sʼe̱jnani. * Kʼianga chanisʼenngindá je chjota, títjon kjoanla jngo kjoanokjoaya sʼejna jñani ʼmiya josʼin tsoyanile je kjoachanisʼenngindá. Nga jeme síkjetʼa je xi tínchja̱yajin, jao kjoachjonangi batíole je xi ska̱nisʼenngindá yaole, kʼoa je xi koaisʼenngindá “jaon” tso. Kʼoa kʼoasʼin tsjoá “kjoakixil[e] ngixko̱n nkjín testigo” xi tʼatsʼe kjoamakjainle.

²² Nga jekachanisʼenngindái yaoli kabakoní ngixko̱n chjota nga jetsakʼaitʼalai yaoli je Niná kʼoa nga testigole Jeobá jekamai. Je chjota ñaki chanisʼenngindání ngakjijngo yaole nga katabe je xi ngikʼa nga jekitsjoatʼale yaole je Jeobá.

23. Jósʼin tsoyanile nga “kao jaʼaínle Nʼai kʼoa kao tsʼe ʼNdí kʼoa kao tsʼe nganʼiotsje” chanisʼenngindá yaoná.

²³ Je Jesús kʼoakitso nga je chjotale “kao jaʼaínle Nʼai kʼoa kao tsʼe ʼNdí kʼoa kao tsʼe nganʼiotsje” cha̱nisʼenngindáni (Mateo 28:19, TNM). Kui xi tsonile nga je xi kanísʼenngindá yaole be jokji ngʼa tíjna Niná Jeobá kʼoa kao Jesucristo (Salmo 83:18; Mateo 28:18). Kʼoati be josʼin síxá je nganʼiotsjele Niná (Gálatas 5:22, 23; 2 Pedro 1:21).

24, 25. 1) Jmé xi tsoyanile je kjoachanisʼenngindá. 2) Jmé xi kuitsoyaná je kjoaʼmiya xi fetʼani.

²⁴ Nʼio tse xi tsoyanile je kjoachanisʼenngindá kʼoa nʼio chjíle. Kʼianga cha̱nisʼenngindáli kui xi tsoyanile nga jekanikʼéjnai ngayeje jme xi kinʼiai ngasʼa xi tsín kixi tíjna. Kʼoa nga jekuitjongindái kui xi tsoyanile nga jekʼoasʼin si̱chjain kjoabijnachonli nga kʼoasʼiain josʼin mele Niná. Likʼiajin  nichajin nga jé Jeobá xi kabʼaitʼalai yaoli. Ali tsa xájin, ali tsa chjotajin kʼoa ali tsa jngojin jtín xi kabʼaitʼalai yaoli. Nga jekabʼaitʼalai yaoli Niná kʼoa nga jekaʼmisʼenngindái, jetibʼetsʼiakoai nga nda tibijnai ngixko̱n (Salmo 25:14).

²⁵ Tonga li tsakuijin xi tsonile nga jekuitjo̱ntjé nga jekachanisʼenngindá yaoná. Je pastro Pablo i kitso: “Tosi tonda tjasjao kjoabitjontjaino kao kjoajkon kao kjoafatsé” (Filipenses 2:12, TNM). Kʼianga chanisʼenngindá yaoná likui toya fetʼa, tosa tokʼia fitsʼiani nga koa̱n kuitjo̱ntjé. Tonga jósʼiaan nga tosi tonda kjuintʼalee Niná kʼoa nga sʼe̱ná kjoatsjoachale. Jé kjoaʼmiya xi fetʼani kuitsoyaná xi tʼatsʼe jebi.