1. Jmé kjoanda xi sʼe̱ná tsa kʼoasʼin jchaxkoán Niná josʼin mele.

JE Niná Jeobá nʼio tsjoakená. Kʼoa kuinga bándiaasíniná nga nda kuiyoaa. Tsa kʼoasʼin jchaxkoán josʼin mele tsjoa sa̱tío tokoán, kʼoa nkjín kjoa xi ndaí kuiyolee. Xi ijngosani, sichikontʼainná kʼoa koasenkaoná (Isaías 48:17). Tonga siento relijión tjín xi kʼoatso nga ñaki kʼoatjín josʼin tjíotsoya tʼatsʼe Niná, tonga nga jekui tsoya ʼyáni je Niná kʼoa jméni xi síjéná kjaʼaí kjaʼaíni tso nga jngó jngó.

2. Jósʼin jchani josʼin tjínnele jchaxkón je Jeobá.

² Jósʼin jchani josʼin mele Jeobá nga jchaxkón. Likuikjoan tjínnele nga si̱ngósonkoai josʼin tsoya nga jngó jngó relijión. Tokui xi machjén nga katamali jmekjoanni xi bakóya je Biblia tʼatsʼe kjoaʼyaxkón xi sasénle Niná. Kʼianga jchai jotjínnele sʼin relijión xi kixi kʼoati jchai jokjoan xi to relijión ndisoni ma.

3. Tojo kitso Jesús, jméni xi sʼiaan nga katasasénle Niná xi tʼatsaan.

³ Nʼio chjíle nga kʼoasʼin jchaxkoán Jeobá josʼin mele. Nʼio nkjín chjota xi kʼoasʼin makjainle nga sasénle Niná ngatsʼi relijión xi tjín, tonga je Biblia likui kʼoasʼin bakóya. Kʼoati likui toya tjen tíjna nga chjotale Cristoña nga kuixoán, nga̱ Jesús kitso: “Likui kjoaʼasʼen kjoatéxomale ngʼajmi ngatsʼi xi Señor, Señor, tsona. Toje xi kʼoasʼin josʼin  mele Nʼaina xi tíjna ngʼajmi xi kjoaʼasʼen”. Tokʼiaa nga sa̱sénle Niná xi tʼatsaan tsa jchaa jmeni xi síjéná kʼoa tsa kʼoasʼiaan. Je xi tsín kʼoasʼín josʼin mele Niná, je Jesús i kitsole: “Chjota xi kjoatsʼen mano” (Mateo 7:21-23). Je relijión ndiso lijme chjíle kʼoa chʼaosʼin síkatíoná.

4. Jósʼin tsoyanile nga jao ndiaa xi kisikʼaxki̱ Jesús, kʼoa jñáni kuichokaoná nga jngó jngó.

⁴ Je Jeobá títsjoáʼndele ngatsʼi je chjota nga koa̱n tjoéle kjoabijnachon xi tsínkʼia fetʼa. Tonga nga koa̱n kuiyoaa ngantsjai nichxin ya ʼNdenaxó xi nroakao Niná tjínnená nga kʼoasʼin jchaxkoán kʼoa kʼoasʼin koanngínkoaa yaoná josʼin mele. Xi tokʼoamaná kuinga nʼio nkjín xi tsín mele kʼoasʼin kʼoa kuinga i̱ kitsosíni Jesús: “Titjásʼennio xo̱ntjoa xi nrʼoeya, nga teya xo̱ntjoa, kʼoa teya je ndiaa xi fini jña nga cha̱jin, kʼoa ali kʼoakji nkjín xi ya faʼasʼen. Nga̱ nrʼoeya je xo̱ntjoa, kʼoa xkóya je ndiaa xi fini kjoabijnachon, kʼoa choa mani xi ya masjaile” (Mateo 7:13, 14). Tojo tso én jebi, je relijión xi kixi kjoabijnachon kuichokaoná kʼoa je relijión ndiso kjoabiya kuichokaoná. Je Jeobá alikui mele nga jngo xi cha̱jin, kuinga títsjoáʼndesínile ngatsʼi je chjota nga katabe (2 Pedro 3:9). Josʼin tiʼyaxkoán Niná, koaan kjoabijnachon kʼoa tsa kjoabiya kuichokaoná.

5. Jósʼin jchañá je chjota xi ya tjíojin relijión xi kixi.

⁵ Jósʼin koa̱nsjainá “je ndiaa xi fini kjoabijnachon”. Je Jesús kʼoakitso nga ngotjo jchañá je chjota xi ya tjíojin relijión xi kixi kʼiatsa chótsenlee josʼin fikao yaole. Kitso: “Kao xále jchanile chjotabe”, nga̱ “ngayije yá xi nda, bale to xi nda” (Mateo 7:16, 17). Kui xi tsonile nga kao kjoamakjainle kʼoa kao xále ʼyanile je chjota xi ya tjíojin relijión xi kixi. Ninga chjotajéelani kʼoa sakʼoa saténgi, bʼénele yaole ngatsʼi nga kʼoasʼín josʼin mele Niná.  Jaonla koya chótʼayá josʼín je chjota xi ya tjíojin relijión xi kixi.

6, 7. Jósʼin síkjaʼaitsjen xi tʼatsʼe Biblia je choʼndale Niná, kʼoa jósʼin tsakʼéjnachoa̱ Jesús xi tʼatsʼe jebi.

⁶ Je choʼndale Niná yaa Biblia bʼangini jmeni xi bakóya. Je Énle Niná itso: “Ngayije xo̱n Escritura Niná jinroani, kʼoa kjaínga nda machjén nga bakóyaná, nga nchja̱tikaoná, nga sichoyandaná, nga sikinyáyandiaaná xi kjoakixi, jméni nga je chjotale Niná ñaki tjíjngosíni, nga ñaki tjínyijele xi machjénle tʼatsʼe ngayije xá xi nda” (2 Timoteo 3:16, 17). Je pastro Pablo i kitsole je chjotale Cristo xi ya tsʼe Tesalónica: “Kui kjoa kʼoati jinjin likui nichajinjin nga bʼailaijin kjoanda Niná nga kʼoasʼin kichjobáo énle Niná xi kinoʼyanajin. Likui kichjobáo joni tsa énle chjota, tonga joni tsa énle Niná xi ñaki kʼoatjín, je xi tísíxájinno xi koankjainno” (1 Tesalonicenses 2:13). Tojo tso én jebi, jmeni xi bakóya kʼoa josʼín je relijión xi kixi alikui ya bʼangini je kjoamakjain kao kostumbre xi tjínle chjota. Tosa ya Biblia nroatʼa josʼin bakóya kʼoa josʼín.

⁷ Xi tsakʼéjna títjon choa̱ jé Jesucristo. Jmeni xi tsakakóya yaa tsakʼangini je Énle Niná. Kʼianga tsakʼétsʼoale Nʼaile xi tíjna ngʼajmi i kitso: “Jé énli xi ñaki kjoakixi” (Juan 17:17). Je Jesús koankjainle jotso je Énle Niná, kʼoa ngayeje jmeni xi tsakakóya yaa tsakʼangini. Kjitʼa i̱ kitso: “Tjítʼa”. Kʼoa xijekoan, jngo testo xi tsʼe Biblia kisichjén (Mateo 4:4, 7, 10). Tikʼoasʼinni, je choʼndale Niná xi tjío ndʼaibi alikui totsʼe kjoafaʼaitsjen bakóya. Tosa kʼoasʼin makjainle kʼianga Énle Niná je Biblia kʼoa jmeni xi bakóya yaa bʼangini.

8. Jósʼin tjíobexkón Jeobá je chjota xi ya tjíojin relijión xi kixi.

⁸ Je chjota xi ya tjíojin relijión xi kixi tojékjoán Jeobá bexkón kʼoa síkʼéjnatsen jaʼaínle. Jesús kitso: “Toje [Jeobá] Naili Nináli xi jchaxkuín, kʼoa toje tojngo xi si̱xálai” (Mateo 4:10). Kuinga toje Jeobá bexkónsíni xi choʼndale Niná ma.  Tsoyason jaʼaínle kʼoa kʼoatso jokjoan. Ya Salmo 83:18 kʼoatso: “Katabe chjota nga ji xi Jeobá ʼmili, tojiní xi nʼio ngʼa tijnalai jngo tjíjtsa sonʼnde”. Je choʼndale Niná jé choa̱le Jesús fitjenngi kʼianga binyakao je chjota nga katabe je Niná. Je Biblia itso xi tʼatsʼe Jesús: “Kuinchjayanile ndsʼe je jaʼaínli” (Hebreos 2:12). Tikʼoasʼinni ndʼai, je xi ñaki choʼndale Niná ma tsoyale chjota je jaʼaínle Niná, jme xi tjínndajinle kʼoa jokjoan.

9, 10. Jósʼin bakóngañále kjoatsjoacha xínkjín je xi ñaki chjotale Cristo ma.

⁹ Je choʼndale Niná tsjoakengañá xínkjín, alikui to yaole fini. Jesús kitso: “Kʼuisʼin skoe̱ ngatsʼi nga jonnío chjotana, tsa kʼoasʼin matsjoachao xíngio” (Juan 13:35). Je chjotale Cristo xi títjon tsakatio kʼoasʼin koantsjoake xínkjín. Je choʼndale Niná nʼio tsjoake xínkjín, alikui fini josʼin tsen yaole, josʼin tjío, kʼoa jñani naxinandále kʼoa ñaki ndsʼe fao ngatsʼi (tʼexkiai Colosenses 3:14). Je chjota xi ya tjíojin relijión ndiso alikui kʼoasʼin tsjoake xínkjín. Tsa tsjoakelani xínkjín, alikuijin kʼoasʼin sikʼien xínkjín xi totʼatsʼe nga xin naxinandále kʼoa nga kjaʼaísʼin tsen yaole. Je xi ñaki chjotale Cristo ma alikui síkʼien xínkjín xi ngóson sʼin makjainle kʼoa nijejinla chjota xi kjaʼaí. Je Biblia kʼoatso: “Kʼuisʼin ʼyanile je xi ʼndíle Niná, kʼoa je xi ʼndíle na̱i. Ngatsʼi xi tsín kjoakixi xi sʼín, xi tsín tjaoke ndsʼe̱, ali tsʼe Ninájin [...] nga tjaocha koaan xíngiaa. Alikui kʼoanʼiao joni Caín xi tsʼe na̱i, xi kisikʼen ndsʼe̱” (1 Juan 3:10-12; 4:20, 21).

¹⁰ Je kjoatsjoacha jebi tsesa xi tínchja̱ni ali tsa tokuijin nga tsín koa̱n si̱kʼieen xíngiaa. Je xi ñaki chjotale Cristo ma kao kjoatsjoa tsjoá nichxinle, nganʼiole kao tsojmi xi tjínle nga binyakao kʼoa nga sínʼiojin xínkjín (Hebreos 10:24, 25). Binyakaongañá xínkjín tsa ʼya xi kjoa faʼatojin kʼoa likui kjoachʼanacha tjínle. Sítjosonní kjoafaʼaitsjen jebi: “Nda si̱xá tʼatsʼe ngatsʼi” (Gálatas 6:10).

11. Ánni nga tjínnesínile koa̱nkjainná nga je Jesucristo xi sichjén Niná nga kʼoasjentjainá.

 ¹¹ Je xi ñaki chjotale Cristo, makjainle nga je Jesucristo xi síchjén Niná nga bʼasjentjainá. Je Biblia itso: “Nitoʼyajinsa xi bʼasjentjainá, nga tsín xi kjaʼaí xi tjío i̱ sonʼndebi xi male bʼasjentjainá” (Hechos 4:12). Tojosʼin tsaʼyaa ya kjoaʼmiya aon, je Jesús kitsjoantjai kjoabijnachonle xi tʼatsʼe chjota xi sítjosonle Niná (Mateo 20:28). Xi ijngosani, je Jeobá Rey kisikao Jesucristo ya ngʼajmi nga koatexomason jngo tjíjtsa Sonʼnde. Je Niná kui xi mele nga si̱tjosonlee Jesús kʼoa nga kʼoasʼiaan josʼin tsakakóya. Tokʼiaa nga so̱koná kjoabijnachon xi tsínkʼia fetʼa tsa kʼoasʼiaan. Kuinga kʼoatsosíni Biblia: “Je xi makjainle tʼatsʼe ʼndíle Niná, tjínle kjoabijnachon ngantsjai. Je xi tsín makjainle tʼatsʼe ʼndíle Niná, likui skoe̱ kjoabijnachon” (Juan 3:36).

12. Jmé xi tjenkao nga tsín i̱ nojiaan yaoná jme xi chon sonʼnde.

¹² Je xi ñaki choʼndale Niná ma alikui i̱ tsjonjin yaole jme xi chon sonʼnde. Je Jesús kitsole Pilato kʼianga tísíjtsoʼa: “Je kjoatéxomana likui tsʼe i̱ sonʼndebi” (Juan 18:36). Je xi ñaki chjotale Cristo ma sítjosonle Cristo tojñani naxinandá jña tjío. Kʼoa kuinga tsín ya tsjonjinsíni yaole je kjoa polítika kʼoa kao kjoasi xi tjín sonʼnde, tosa liʼya xi tsjoánganʼiole. Xi ijngosani, alikui bʼéchjoale je chjota xi mele nga kjoa polítika koaijin, kʼoa tsa ʼyani xi mele nga xá sa̱sén kʼoa tsa ʼyani xi mele koaisʼín botar. Kʼoa ningalani tsín ya tsjonjin yaole kjoa polítika, sítjoson kjoatéxoma xi tjín ya naxinandále. Ánni. Kuinga kʼoasʼin bʼénele Énle Niná je chjotale Cristo nga “katasítjosonle chjota xi xá tjínle” (Romanos 13:1). Tonga tsakui kʼoenele je chjotaxá sonʼnde jmeni xi kontra tíjnale kjoatéxomale Niná, je choʼndale Niná kui fitjenngi je choa̱ xi tsakatío pastrole Jesús, xi kitso: “Ngisa machjén nga nikjitjosonlee Niná kaoni tsa chjotasonʼnde” (Hechos 5:29; Marcos 12:17).

13. Jósʼin makjainle je xi ñaki chjotale Cristo tʼatsʼe je Chjotaxále Niná, kʼoa jméni xi sʼín.

 ¹³ Je xi ñaki chjotale Cristo ma kui tsoyason nga tojekjoan je Chjotaxále Niná xi koa̱nle kʼoendajin kjoale chjotasonʼnde. Je Jesús tongini i̱ kitso: “Kʼoa je énnda xi tʼatsʼe je kjoatéxomale ngʼajmi kuinókjoayani ngakijnda sonʼnde, nga si̱kixiyandale ngatsʼi naxinandá. Kʼia kjoaʼaí xi kjoetʼa” (Mateo 24:14). Je xi ñaki chjotale Cristo ma  alikui kʼoatsole chjota nga je chjotaxá sonʼnde sinʼiotʼa nga kʼoendajin kjoale. Tosa kui xi tsoyason nga tojekjoan je Chjotaxále Niná xi ya tíjna ngʼajmi xi koa̱nle kʼoasʼin (Salmo 146:3). Je Jesús saʼnda kʼoakitso nga si̱jé Chjotaxá jebi kʼianga kʼoétsʼoaa, kitso: “Katjinroa kjoatéxomali. Kʼoakatasʼín josʼin nga meli, joni ya ngʼajmi kʼoatisʼin i̱ sonʼnde” (Mateo 6:10). Je Énle Niná tongini kʼoakitso nga Chjotaxá jebi “kjoaʼaxinní ngatsʼi chjotaxá xokjoan [xi tjío ndʼaibi], kʼoa jé kʼoéjna ngantsjai nichxin” (Daniel 2:44; Apocalipsis 16:14; 19:19-21).

14. Jósingái ji, jókji je relijión xi kʼoatísʼín jotso Biblia.

¹⁴ Tikjaʼaitsjenlai jmeni xi jekaʼyaa kʼoa chjónangilalai yaoli: “ʼYáni je relijión xi ya Biblia bʼangini ngayeje jmeni xi tsoya kʼoa xi kʼoatso nga Jeobá ʼmi je Niná. ʼYáni je relijión xi bakóle kjoatsjoacha xínkjín kʼoa xi makjainle tʼatsʼe Jesús, xi tsín ya tsjonjin yaole xi chon sonʼnde kʼoa xi tsoyason nga tojekjoan je Chjotaxále Niná xi koa̱nle kʼoendajin kjoale chjotasonʼnde. Ngatsʼi relijión xi tjín i̱ Sonʼnde ʼyáni xi kʼoatjíosʼín”. Je choa̱ xi kaʼyaa kui xi bakó nga tojekjoan je testigole Jeobá xi kʼoatjíosʼín (tʼexkiai Isaías 43:10). *

15. Jmésa xi síjéná Niná tsa jemakjainná xi tʼatsʼe.

¹⁵ Kʼianga sa̱sénle Niná jonʼia ali tsa tokuijin nga koa̱nkjainná xi tʼatsʼe. Nga̱ saʼnda je ánkjele na̱i makjainle nga tíjna Niná (Santiago 2:19). Tonga je likui kʼoasʼín josʼin mele Jeobá kʼoa ni ndajinla tjío ngixko̱n. Kʼianga sa̱sénle Niná josʼiaan ali tsa tokuijin nga koa̱nkjainná nga tíjna, kʼoati machjén nga kʼoasʼiaan josʼin mele. Xi ijngosani,  tjínnele kuitjojinlee je relijión ndiso kʼoa kui kuijnajiaan je relijión xi kixi.

16. Jméni xi sʼiaan nga tsín ya koa̱njngokoaa je relijión ndiso.

¹⁶ Je pastro Pablo kʼoakitso nga tsín ya kuinójiaan yaoná je relijión ndiso. Kitso: “Titjo̱jin basennilao nga je, kʼoa tinyatʼaxinlao, tso je Nainá. Kʼoa li nikaojion je xi chʼaokjoan, kʼoa an skoetjaono” (2 Corintios 6:17; Isaías 52:11). Kuinga je xi ñaki chjotale Cristo ma bʼasjengisíni tojmeyejeni xi ya nroani tʼatsʼe relijión ndiso.

17, 18. Jméni xi “Babilonia xi nʼio je” ʼmi, kʼoa ánni nga nʼio maxátíyasínile nga kuitjokajinlai.

¹⁷ Je Biblia kʼoatso nga “Babilonia xi nʼio je” ʼmi ngatsʼi je relijión ndiso (Apocalipsis 17:5). * Jaʼaín jebi kui síkjaʼaitsjenjinná naxinandá Babilonia xi tsakʼejna nichxin kjoatse jñani kitsʼiani je relijión ndiso, kʼiaa kʼoakoan nga jejaʼato Jtsínʼio nichxinle Noé. Jmeni xi bakóya kʼoa jmeni xi sʼín ndʼaibi je relijión ndiso nʼio nkjín koya xi ya kinroani ya Babilonia. Tobʼelañá, je chjota xi ya tsakatio kui niná xi jan jan tjíokjao tsakʼétsʼoale. Kʼoa nichxin xi tiyoaa ndʼaibi, nʼio nkjín relijión xi kʼoasʼin bakóya nga Trinidad ʼmi je Niná. Tonga je Biblia kʼoasʼin bakóya nga tojngo mani je Niná xi kixi, je Jeobá, kʼoa nga ʼNdíle mani je Jesucristo (Juan 17:3). Je chjota babilonio kʼoatisʼin koankjainle nga tjínná jngo ni̱ma̱ xi bʼejnakon kʼianga jebiyaa kʼoa nga kjoañʼai faʼá tsa chʼao kasʼín. Nichxin xi tiyoaa ndʼaibi me ngatsʼi je relijión nga kʼoatisʼin bakóya nga tjínná jngo ni̱ma̱ xi bʼejnakon kʼianga jebiyaa kʼoa nga kjoañʼai faʼá ya jña títi lʼí tsa chʼao kasʼín.

¹⁸ Je relijión xi kisʼe ya Babilonia tsangabason jngo tjíjtsa Sonʼnde. Kuinga kʼoabixónsíñá nga je “Babilonia xi nʼio je” ʼmile ndʼaibi jé tsoyanile ngatsʼi relijión ndiso xi tjín jngo tjíjtsa Sonʼnde. Kʼoa je Niná tongini kʼoatso nga  toxijña tjóʼaxin. A jekoanjinli ánni nga nʼio chjísínile nga ñaki jngokʼa kuitjojinlai je relijión ndiso. Je Jeobá kui xi mele nga tsín si̱kʼachxin nga kuitjokajinlai je relijión ndiso tiʼani nga choa̱lesa (tʼexkiai Apocalipsis 18:4, 8).

19. Jmé xi kuinje̱li nga Jeobá si̱xálai.

¹⁹ Kʼianga jekuitjokajinlai je relijión ndiso tsakui nichxin sikjin kʼali je chjota xi ʼyai. Tonga ngisa tse xi kuinje̱li nga Jeobá si̱xálai ya jinnaxinandále. Kʼoati nʼio nkjín xi ndichjai kʼoa xi ndsʼai koa̱n tojo koantʼain je chjotale Jesús ninga kisikatío ngayeje xi tjínle. Yaa koa̱njngotʼalai ngatsʼi je chjotale Cristo xi jemiyón mani jngo tjíjtsa Sonʼnde, xi nʼio tsjoake koa̱nli. Kʼoa kʼoati sʼe̱li kjoachoya nga koa̱n kuijnai tokʼia saʼndani “nichxin xi [sʼa] kjoaʼaí” (tʼexkiai Marcos 10:28-30). Xi ijngosani, tsakui nichxin je chjota xi sikjinli nga Énle Niná tichotʼayai channi skoe̱ jotso Biblia kʼoa kʼoaniti choʼndale Jeobá koa̱n.

20. Jmé kjoachoya xi tjínle je chjota xi kʼoasʼin tjíobexkón Niná josʼin mele.

²⁰ Je Biblia kʼoatso nga jeme kjoaʼaxin Niná jme xi chʼao chon sonʼnde kʼoa nga je sikatío chjota xi kixi xi je koatexomale je Chjotaxále (2 Pedro 3:9, 13). ¡Nʼiojin nda koa̱nchon nga kʼia i̱ Sonʼnde! Tojngo relijión sʼe̱, jokjoansʼin mele Niná. A tsí jechoa̱le ndʼaibi nga ya si̱jngokoai yaoli je xi ñaki choʼndale Niná ma.