JÓSʼIN fiya jkui nichxin jebi. Nkjín chjota xi kʼoasʼin makjainle nga jngó jngó koa̱njtsoʼa chjota ngixko̱n Niná. Kʼoatisʼin makjainle nga tjínkʼa chjota xi ya ngʼajmi si̱kasén kʼoa nga tjínkʼa xi kjoañʼai kʼoaile tokʼia saʼndani. Tonga je Biblia “nichxin nga sʼe̱ndajin” tsole nichxin jebi. Kʼoatso nga li tsa kjoaxkónjin tjenkao, tosa kjoachoya tjenkao kʼoa kʼiaa chjotatsje koa̱n ijngokʼani chjota.

Ya Apocalipsis 20:11, 12 je pastro Juan isʼin bʼéyanajmí jokoa̱n nichxin jebi: “Tsaʼbejngoa yáxile xi chxoa kji kao je xi tíjnason. Ngixko̱n nga je tsangatʼaxinle sonʼnde kao ngʼajmi. Likui tikoansjainile ʼndele nga je. Tsaʼbe je xi kʼen, xi jchínga kao xi xti, xi tjío ngixko̱n Niná. Je xo̱n kitjoʼai. Kʼoa je xi ngijngo xo̱n kitjoʼai, xi tsʼe kjoabijnachon. Kʼoasʼin je xi kʼen kitsʼaile kjoañʼai [“kisʼendajinle”, TNM] tʼatsʼe je kjoa xi tjíotʼa ya xo̱n, josʼin xále”. ʼYáni je Jues xi tíjnason yáxile.

Jéní Jeobá nga̱ jé xi Jues títjon ma. Tonga kjaʼaí chjota tsakánele nga kʼoendajinle chjota. Ya Hechos 17:31 je pastro Pablo kʼoakitso “nga Niná tsakʼéjna jngo nichxin kʼianga kʼoendajin sonʼnde kao xi kjoakixi, totʼatsʼe je chjotaxʼin xi tsakasén”. Kʼoa “chjotaxʼin” jebi xi Jues tsakasén Niná jé Jesucristo (Juan 5:22). Tonga kʼiáni koaitsʼia nichxin jebi kʼoa jókji tse sʼe̱jna.

 Je libro xi tsʼe Apocalipsis kʼoatso nga kʼia koaitsʼiani nga jekjoaʼato kjoajchánle Niná xi Armagedón ʼmi, xi kjoaʼaxin jmeni xi chonle Na̱i (Apocalipsis 16:14, 16; 19:19–20:3). * Nga jekjoaʼato Armagedón jngo jmi nó si̱kʼéjnaʼyanʼio ndi̱tja̱n je Na̱i kao ngatsʼi ánkjele. Nó xotjín, jé xi jngo siento kao ñachanño jmi mani kʼoendajinle chjota kʼoa “jngo jmi nó [koate]xoma kao Cristo” (Apocalipsis 14:1-3; 20:1-4; Romanos 8:17). Tojosʼin tiʼyaa, nichxin nga kʼoendajinle Niná chjota ali tsa to jngojin nichxin tínchja̱ni, jngo jmi nó tínchja̱ni.

Je xi jngo jmi nó, je Jesucristo “kʼoendajinle xi tjíokon kao xi kʼen” (2 Timoteo 4:1). Je “xi tjíokon” ʼmile jéní chjotankjín xi kjoaʼatojin tjínkon je kjoajchánle Niná xi Armagedón ʼmi (Apocalipsis 7:9-17). Je pastro Juan kʼoati tsabe je “xi kʼen [...] xi tjío ngixko̱n Niná” nga sʼe̱ndajinle. Tojo kitso Jesús, “xi tjío ya nyʼoákʼen kjuinrʼoéle jta̱le [Cristo]. Kʼoa kuitjoni ngatsʼi” nga kjoaʼáyale (Juan 5:28, 29; Hechos 24:15). Jméni xi kuenta koa̱n nga sʼe̱ndajinle chjota jebi.

Je sén xi tsabe pastro Juan “xo̱n kitjoʼai” kʼoa “je xi kʼen kitsʼaile kjoañʼai tʼatsʼe je kjoa xi tjíotʼa ya xo̱n, josʼin xále” (Apocalipsis 20:12). A kui tjítʼa xo̱n jebi jmeni xi kisʼin ngasʼa chjota jebi. Mai. Alikui tikui koa̱nni kuenta jmeni xi kisʼin nga kjesa mʼejin. Jómani ʼyaa. Kuinga i̱ tso je Biblia: “Nga je xi kʼen, jetʼa jéele” (Romanos 6:7). Je xi kjoaʼáyale jekichatʼa jéele. Kʼoa je xo̱n xi tjóʼai kuijin tjítʼa jmeni xi mele Niná nga sʼin je chjota. Nga koa̱n koatio tokʼia saʼndani je xi kjoaʼáyale kao je xi kjoaʼatojin tjínkon je Armagedón tjínnele sitjoson je kjoatéxomale Niná kʼoa kao kjoatéxoma chjotse xi tsjoá Jeobá xi jngo jmi nó. Kʼoa kʼoasʼin sʼe̱ndajinle nga jngó jngó chjota jmeni xi sʼin xi jngo jmi nó.

 Je Nichxin nga sʼe̱ndajin, jmi miyón mani chjota xi tokʼia skoe̱ títjon jmeni xi mele Niná kʼoa xi tjínnele sitjoson. Kuinga kʼuínyasínile Énle Niná ngatsʼi. Kʼoatjín, kjoakixi xi koa̱nle chjota xi koatio Sonʼnde (Isaías 26:9). Tonga likui tongatsʼi nga koa̱nmele sitjoson josʼin mele Niná. Ya Isaías 26:10 kʼoatso: “Ninga sa̱kóle kjoanda je chjotatsʼen, alikui koa̱nle kjoa xi kixi tjín. Ya ʼnde jña tjín kjoakixi kui kʼoasʼin xi chʼaotjín, kʼoa alikui kuenta sʼin kjoajeyale Jeobá”. Kʼiaa ni̱kjeson chjotatsʼen jebi Nichxin nga sʼe̱ndajin, xi tsonile, xi jngo jmi nó (Isaías 65:20).

Kʼianga kjoetʼa je nichxin nga kʼoendajin Niná, je chjota xi tjíokon nga kʼia ñaki tsje koa̱n (Apocalipsis 20:5). Jokji tse sʼe̱jna nichxin jebi ñaki tsje koa̱n ijngokʼani chjota joni tsa Adán nga sʼa koannda (1 Corintios 15:24-28). Xijekoa̱n, kʼiaa chótʼayakao xi tofetʼani. Kuinga ni̱kʼéjnandáini je Na̱i kʼoa tokʼoatjín kʼoaiʼndesale nga kʼoanachale chjota (Apocalipsis 20:3, 7-10). Je chjota xi taja koatiole Na̱i skoe̱ní jósʼin kuitjoson je én xi tjítʼa Biblia xi i̱ tso: “Je xi kixi tsʼee koa̱n sonʼnde, kʼoa i̱ koatioson ngantsjai nichxin” (Salmo 37:29). Alikui jao tjínná nga tse kjoanda sʼe̱le je chjota xi kixi nichxin nga kʼoendajinle Niná.