KJOAʼMIYA XI MAJNGOKAO
Jméni xi Seol kʼoa Hades ʼmi
JE ÉN xi kichji títjonni Biblia tsʼato jankan kao te kʼa kisichjén én xi scheʼóhl tso nga én hebreo kʼoa xi háides tso nga én griego. Nga jao én jebi kjoabiya tínchja̱ni. Me ngayeje én xi nokjoa Sonʼnde nga tsínle én xi kʼoakjoansʼin tínchja̱ni josʼin tsoyanile nga jao én jebi. Kʼoa kuinga je Traducción del Nuevo Mundo nga “Seol” kʼoa “Hades” tsakʼéni ya nota xi faʼaitʼa. Ya Nuevo Testamento en mazateco de Huautla de Jiménez, Oax., isʼin kinikʼatoya: “ʼndekjoañʼai”, “ngi kjoatéxomale kjoabiya”, “ʼnde jña nga tjío xi kʼen” kʼoa “ʼnde jña nga títi”. Tonga, jókjoánsʼin tsoyanile nga jao én jebi. Chótʼajinla kʼaa testo josʼin machjén én jebi.
Ya Eclesiastés 9:10 itso: “Tsín xá, ni kjoafaʼaitsjen, ni kjoankjíntokon, ni kjoachjinejin tjín ya Tsjó (Seol tso ya nota), ya ʼnde jñani tiʼmi”. Je én xi Seol tso, a kui tínchja̱ni jngo tsjó jñani jngo kʼien sʼejnaya. Majain. Kʼianga én hebreo kao griego je Biblia ali tsa scheʼóhl kʼoa háides tsole jngo tsjó (Génesis 23:7-9; Mateo 28:1). Kʼoati li tsakuijin xotsole je tsjó jña tiya sʼeñenenile xínkjín je kʼien, kʼoa tsa jngo nga̱jao̱ jñani nkjín kʼien sʼeyoya (Génesis 49:30, 31).
Kʼoa kʼianga “Seol” kʼoa “Hades” tso je Énle Niná, jmékjoánni xotsole. Jngoo ʼnde xi ngisasa nʼioje tikʼoajinni jngo nga̱jao̱ jñani nʼio nkjín kʼien sʼeñe. Tobʼelañá, ya Isaías 5:14 kʼoatso nga “je Tsjó (axo Seol) nʼio tísíje yaole kʼoa toxkia tixʼa̱jngale tsʼoa”. Je Seol tíkjojen ʼndeʼndee kʼien kʼoa tomentsjaile (Proverbios 30:15, 16). Je nyʼoákʼen tochoa kʼien jchóya, tonga je Seol likuikʼia masinle (Proverbios 27:20). Kʼoatjín, je Seol kao Hades, likuikʼia tse. ʼNde jebi ali tsa ñaki tíjnajin. Yaa jña tjíosíkjáya je kʼien jña kʼoaʼmile.
Kʼianga ʼyaa jme xi bakóya Biblia tʼatsʼe kjoafaʼáya, ngisa nda majinná jmeni xi Seol kʼoa Hades ʼmi. Je Énle Niná kʼoatso nga kjoaʼáyanile je kʼien xi ya tjío ʼnde jebi (Job 14:13; Hechos 2:31; Apocalipsis 20:13). * Kʼoati tso nga ya tjío je xi kisixále Jeobá kʼoa kao xi tsín kisixále (Génesis 37:35; Salmo 55:15). Kuinga kʼoatsosíni je Biblia “nga kjoaʼáyale xi kʼen, nda tsa kao chjota xi tjínle kjoakixi, kao chjotatsʼen” (Hechos 24:15).
^ párr. 4 Tonga je Biblia kʼoatso nga tsín kjoaʼáyale je kʼien xi ya tjío ya ʼnde jña “Gehena” ʼmi, je ʼnde jebi kʼoati li tsa ñaki tíjnajin (Mateo 5:30; 10:28; 23:33, TNM).
