JE SʼUÍ xi bʼasje chjota jngo tjíjtsa Sonʼnde ali tsa yajin Biblia yʼangini. Tonga jñá jaʼaini. Tsa ji xi kʼuínkjasjaiyai ya jñani tjío libro xi kui tínchja̱ni, jchaní jotso xi tʼatsʼe sʼuí xi satío ya jñani tsi. Kataʼyala kʼaa.

Nichxin Xkón. Ninga kʼoasʼin ʼyale nga je kjoabiyale kʼoa kao kjoafaʼáyale Jesucristo faʼaitsjenya nga kui nichxin, nʼio  nkjín koya jmeni xi sʼín je chjota xi ya kinroani tsʼe relijión ndiso, jolani nga kʼoasʼin síkʼandai. Je libro xi Las Grandes Religiones Ilustradas ʼmi kʼoatso nga kʼianga kjesa faʼaijin Cristo, je chjota babilonio “nʼio kisisinle je xkóson xi tsabexkón [...]. Ñaki najño chjí kisikʼakjá xkósonle, tsakʼéngile tofangi, ki̱chaa tsakʼékjá ntsja kʼoa tsakʼéyale tao̱njngo; ñaki síxkónkjoan jñani kisikáyoson kʼoa kisikʼandaikao”.

Nó Chjotse. Nga jngó jngó naxinandá kjaʼaí kjaʼaí sʼín kʼoa kjaʼaí kjaʼaí nichxin bʼasje Nó Chjotse. Jngo libro xi i̱ tso jñani kinroani: “Kʼianga nó 46 nga kjesa chʼajin nó 1 je Julio César xi tsakatéxoma Roma kʼoasʼin tsakʼéndajin nga 1 sá enero chʼa̱sje Nó Chjotse. Je chjota romano jé Jano tsakʼasjele sʼuí nichxin jebi, je niná xi tsʼe xo̱ntjoa kʼoa jme xi fitsʼiani. Kuinga enero [nga én latín, Januarius] ʼmini sá enero nga yaa kitjoéni jaʼaínle tsʼe niná xi Jano tsakʼinle, xi jao mani nkjaín xi jngo jto̱n jngo yátsʼi̱n tjíokotsenni” (The World Book Encyclopedia). Tojosísʼin tiʼyaa, yaa relijión ndiso kinroani nga Nó Chjotse bʼasje chjota.

Sʼuíkʼen. Jngo libro xi i̱ tso: “Je sʼuíkʼen [...] kui nichxin xi kiskoejin je Iglesia Católica Romana nga síkjaʼaitsjenya kʼienle. [...] Tjínkʼa jmeni xi makjainle chjota kʼianga Sʼuíkʼen xi ya kinroani relijión ndiso kʼoa jenʼio kjoatse tsʼatsen. Kʼoa kuinga kʼoasʼin makjainsínile je xi toxkia ʼndíchjota xi ya tsʼe ya naxinandá jñani katóliko nga kʼia faʼai ʼndíkʼienle jñani tsakatio kʼoa nga kjine tsojmi xi bʼénda je xi tjíokon” (The Encyclopædia Britannica xi kitjo nga nó 1910).

Sʼuí xi kjaʼaísa. Likui kʼoakoa̱nná nga si̱kʼaxkiaa ngayeje sʼuí xi satío jngo tjíjtsa Sonʼnde. Tonga je Jeobá alikui sasénle je sʼuí xi chjota bʼasjengʼa (Jeremías 17:5-7; Hechos 10:25, 26). Ijngosa xi koasenkaoná nga jchaa tsa sasénle kʼoa tsa tsín sasénle Niná jngo sʼuí kuinga kataʼyaa jñá jaʼaini (Isaías 52:11; Apocalipsis 18:4). Je kjoafaʼaitsjen xi tsʼe Biblia xi kitsoya ya kjoaʼmiya xjaʼaonjngo kui xi koasenkaoli nga jchai josʼin be kon Niná nga kui chʼasjee je sʼuí xi tsín ya nroani ya relijión.