1, 2. ʼYáni xi koa̱nle koasenchjoaná nga tsín jme xi katamaná.

TIKJAʼAITSJENLAI tsa jña titomjai kʼoa toxijña xi̱nyá njio njio yojbi ya ngʼá. Kʼoa xijekoa̱n, koa̱nfate, kjoane chʼao̱n kʼoa síxkón koa̱n jtsí. Kjitʼajinnangi kjoásjai jña ngʼián chon. Kʼoa kʼianga jekoa̱nsjaili, ¡nʼiojin tsjoa koa̱nli!

² Je nichxin xi tiyoaa ndʼaibi yaa mangóson kao jngo jtsíxkón nga nʼio chʼao kjimachon, nga̱ je chjotasonʼnde sa chʼao sa chʼao kjimakjoan. Tonga tíjna jngo xi koa̱nle koasenchjoaná, xi tsonile, nga koasenkaoná ninga tojmeni xi kjoaʼaínená. ʼYáni. Je Biblia itso: “I xínle Jeobá: “Jiní xi bisenchjoai nga tsín jme xi mana kʼoa jiní xjáo tajana, Ninána xi ñaki sinʼiotʼa” (Salmo 91:2).

3. Jósʼiaan nga katabasenkaoná Jeobá.

³ ¡Tikjaʼaitsjenlai jebi! Jeobá, je xi kisinda kʼoa xi batéxomale ngayeje xi tjín koaanle koasenkaoná. Je, ngisa nʼio tse nganʼio tjínle  tikʼoajinni tojmeni kʼoa toʼya chjotani xi josikaoná. Kʼoa ninga ʼya xi josikaoná, je Jeobá koaanle koasenkaoná. Jósʼiaan nga katabasenkaoná Jeobá. Tjínnele je si̱nʼiotʼaa. Xi ijngosani, je Biblia itsoná: “Tosi tonda katasʼeno kjoatsjoachale Niná” (Judas 21, TNM). Kʼoatjín, tjínnele nga tosi tonda sʼe̱ná je kjoatsjoachale Niná kʼoa tosi tonda kjuintʼalee je Nʼainá xi tíjna ngʼajmi. Kʼiatsa kʼoasʼiaan, alikui jao tjínná nga je koasenkaoná. Tonga jmé xi sʼiaan nga kʼoasʼin kuijnaa xi kao Niná.

4, 5. Tikʼaxki̱la kʼai josʼin tíbakóná kjoatsjoachale Niná.

⁴ Nkjín koya josʼin tíbakóná kjoatsjoachale Jeobá. Kataʼyala ijngokʼá jñanile nga̱ kui xi koasenkaoná nga tsín si̱kʼéjnaa kjoatsjoachale. Kuila tikjaʼaitsjen kʼai jotso xi jetsaʼyai tʼatsʼe Biblia i̱ xo̱n jebi. Tobʼelañá, nga ndasʼin kuiyoaa, je Niná xi kisindaná kitsjoaná je Sonʼnde jñani tjín tsojmi xi ma chine, nandá, jmeni xi nichjén, cho̱ xi naskánakjoan kʼoa kao ʼnde jñani naskánachon. Kʼoa kʼoati ʼyaa nga tʼatsʼe Niná kinroani je Biblia, kʼoa yaa kʼoatsoná jóʼmi kʼoa jókjoan. Je Énle Niná kʼoatsoná nga kisikasén je ʼNdíle i̱ tʼanangi kʼoa nga kitsjoaʼnde nga jaʼá kjoañʼai kʼoa nga kʼienntjainá (Juan 3:16). Nga kʼoakisʼin jngo kjoatjao kitsjoaná, kʼoa totʼatsʼee kjoatjao jebi nga tjínniná jngo kjoachoya xi naskánatjín nichxin xi nroaján.

⁵ Tonga kʼoati kuinga sʼe̱niná kjoanda jebi nga jngo Chjotaxá tsakasénnda Jeobá ya ngʼajmi. Chjotaxá jebi jeme kjoaʼaxin kjoañʼai xi tjínná kʼoa ʼndenaxó sikao Sonʼnde. ¡Jmé sikji tseni kjoanda! ¡Nʼio tsjoa sʼe̱ tokoán kʼoa nyʼán kuiyoaa tokʼia saʼndani! (Salmo 37:29.) Tonga nga kjesa faʼaijin nichxin jebi, je Niná títsjoáná kjoafaʼaitsjen nga ndasʼin kuiyoaa. Tonga ijngosa kjoatjao títsjoáná je Jeobá. Kuinga ma bʼetsʼoalee kʼoa kʼoaʼmilee tojmeni xi mená. Tojngo jaola koya tiʼyaa jokji tsjoakeli Niná kʼoa jokji tsjoake ngatsʼi chjota.

6. Jósʼin koakolai kjoatsjoacha je Jeobá josʼin tíbakóli je.

 ⁶ Tonga chjónangilalai yaoli ndʼaibi: “Jósʼian an nga kʼoasʼin tsjoakena je Jeobá”. Nkjínjin chjota xi i̱ kuitso: “Kuijin nga kʼoati tsjoake koa̱n”. A kʼoatisʼin nikjaʼaitsjain tsanda ji. Je Jesús kʼoakitso nga je kjoatéxoma xi títjon tíjna kui jebi: “Katamatsjoachai Naili Nináli. Katamatsjoachani ngayije ni̱ma̱li, kao ngayije kjoatsjoali, kʼoa kao ngayije kjoafaʼaitsjenli” (Mateo 22:37). Nʼio nkjín koya tiʼyaa anni nga tsjoacha koa̱nsíni Jeobá. Kʼiatsa jetítsjentʼalai Niná, a jekui xi tsonile nga tsjoachai kao ngayeje ni̱ma̱li, kjoatsjoali kʼoa kao kjoafaʼaitsjenli.

7. Kʼianga tsjoacha maa je Niná, a toyaa tjen tíjna nga tsjéntʼalee.

⁷ Je Biblia kʼoatso nga nʼiosa tse xi tínchja̱ni nga tsjoacha maa je Niná. Ali tsa tokuijin nga tsjentʼalee. Ninga nʼiolani chjíle jebi tokʼiaa fitsʼia nga ñaki tsjoacha maa je Niná. Kʼianga katamajinná jebi kuila si̱ngósonkoaa tsa jngo manzana meli. A tokoaannili tsa tojngo tole kʼoaili. Maijin. Nga̱ je to jebi tjínnele sʼe̱ntje kʼoa xi jekoa̱nntje kʼiaa koale to. Tikʼoasʼinni je kjoatsjoacha xi tjínná xi kao Jeobá, nichxin kitjenkao saʼnda nga nʼio matsjoachaa kʼoa nga nitjosonlee. Je Biblia itso: “Kʼoasʼin tjaochaa Niná, nga nikjitjosoán kjoatéxomale. Je kjoatéxomale ali ñʼaijin tjín” (1 Juan 5:3). Kʼoatjín, kʼiatsa ñaki tsjoachaa Niná kao xáná bakoñá (tʼexkiai Mateo 7:16-20).

8, 9. Jósʼin bakoá nga tsjoachaa je Niná kʼoa nga bʼailee kjoanda jmeni xi sʼín xi tʼatsaan.

⁸ Kʼiaa bakoá nga tsjoachaa je Niná kʼianga nitjosoán kjoatéxomale. Ali tsa ñʼaijin tjín jebi, nga̱ kui xá tsjoániná kjoatéxomale nga tsjoa sa̱tío tokoán kʼoa nga nda kuiyoaa (Isaías 48:17, 18). Kʼianga bʼaiʼndee nga je bándiaaná Jeobá, bakoñá nga chjí ʼyatokoán jmeni xi sʼín xi tʼatsaan. Je xi tokʼoamaná kuinga tochoa mani xi kʼoatisʼin síkjaʼaitsjen.  Alikui mená nga kʼoati sʼiaan jokisʼin kʼa je chjota nichxinle Jesús. Ñandia kʼianga te chjota xi tjíofiʼndojon yaole kisindaya je Cristo, tonga tojngo koanni xi kichotsjoá ngindianile kjoanda (Lucas 17:12-17). Mená nga je chjénngilee chjota jebi, kʼoa likui mená nga kʼoasʼiaan jokisʼin xi ngi ñajan nga tsín jme kjoanda kitsjoa.

⁹ Tonga jñánile kjoatéxomale Jeobá xi si̱tjosoán. Jekitsoya kʼaná xo̱n jebi. Tonga chótʼayajinla jngojoá xi jesa tsaʼyaa. Nga̱ tsa si̱tjosoán kjoatéxomale Jeobá ngisa choa ñʼai koa̱nná nga tosi tonda sʼe̱ná kjoatsjoachale.

10. Ánni nga nʼio machjénsíni nga tosi tonda katamasaná xi tʼatsʼe Jeobá.

¹⁰ Kʼianga koa̱n si̱chriantʼasalee Jeobá nʼio machjén nga nda jchaa. Kʼoa tokʼoala tinʼiantsjé. Tikjaʼaitsjenlai tsa ya jinjñá ján tijnai kʼianga njio kʼoa tsa nʼio nyʼán chon, kʼoa lʼí  tibʼetsai nga tinisolai yaoli. A tochótsenlai tsa jetífejin chikínle. Maijin. Tosi tondajin kuinyajin chikín nga tsín katabitsʼao je lʼíle, nga̱ tsa tsín kʼoasʼiain nyʼánjin kuiyájin. Tojo ma je lʼí nga chikín machjénle kʼoati ma je kjoatsjoacha xi tjínná kao Jeobá, kʼianga tsín kuinjenyʼán tjínnele sʼe̱ná je “kjoankjíntokonle Niná” (Proverbios 2:1-5).

11. Jósʼin tsakasenkao je én xi tsakakóyale Jesús je chjotale.

¹¹ Je Jesús kui xi koanmele nga tsín kuinjenyʼán je kjoatsjoacha xi tjínle chjotale xi kao Jeobá kʼoa kao Énle. Kʼianga jejaʼáyanile Jesús jao chjotale xi kitsoyale jmeni xi tso Énle Niná xi kʼoasʼin kitjoson xi tʼatsʼe. Jósʼin kichomani nga kʼoakitsole. Nga koanskanni i kitso chjotale: “A tsí tsa kjaí tsjoaya koanle ni̱ma̱ná, kʼianga tsakjákaonajmíná ya yandiaa, kʼoa kʼianga kiskoxʼángi xkoaan jotso én xi tjítʼa xo̱n Escrituras” (Lucas 24:32).

12, 13. 1) Jókjima kjoatsjoacha xi tjínle chjotasonʼnde xi kao Niná kʼoa kao Biblia. 2) Jósʼiaan nga tsín kuinjenyʼán je kjoatsjoacha xi tjínná kao Jeobá.

¹² Kʼianga jetsaʼyai jmekjoanni xi bakóya Biblia, kʼoajinti nʼio tsjoa kisʼele ni̱ma̱li. Nʼiojin koantsjoachai Niná kʼoa koanmejinli kinokjoakoai chjota xi tʼatsʼe. Nʼio nkjín xi kʼoati male. Tonga ndʼaibi ali bʼaiʼndejin nga kuinjenyʼán kjoatsjoacha jebi tosa katamatsesa. Je Jesús tongini i̱ kitso xi tʼatsʼe chjota xi sʼe̱ ndʼaibi: “Je kjoatjaochale nkjín chjota sa̱tényʼánjin”, kʼoa ñá likui mená nga kʼoati katamaa (Mateo 24:12). Jósʼiain nga tsín kuinjenyʼán je kjoatsjoacha xi tjínli kao Jeobá kʼoa kao jmeni xi tsoya Biblia.

¹³ Tosi tonda kataʼyasai xi tʼatsʼe Jeobá kao tʼatsʼe Jesucristo (Juan 17:3). Nda tikjaʼaitsjenjin kʼianga bʼexkiai Énle Niná kʼoa chjónangilai yaoli: “Jmé xi tsoyana jebi xi tʼatsʼe Jeobá. A koasenkaosana nga tsjoake̱ koa̱n Jeobá kao ngayeje ni̱ma̱na, kjoafaʼaitsjenna kʼoa kao kjoabijnachonna” (tʼexkiai 1 Timoteo 4:15). Kʼiatsa kʼoasʼin si̱kjaʼaitsjenjin, nikʼiajinla kuinjenyʼán kjoatsjoacha xi tjínli kao Jeobá.

14. Jósʼin koasenkaoná je kjoabʼetsʼoa nga tsín kuinjenyʼán je kjoatsjoacha xi tjínná kao Jeobá.

 ¹⁴ Ijngosa xi sʼiaan nga tsín kuinjenyʼán je kjoatsjoacha xi tjínná kao Jeobá kuinga kʼoétsʼoaa ngantsjai (1 Tesalonicenses 5:17). Jetsaʼyaa ya kjoaʼmiya xjaʼaonjao nga je kjoabʼetsʼoa jngo kjoatjaole Niná xi nʼio chjíle. Kʼianga chjakaontsjé xíngiaa kʼoa kʼoaʼmilee jotjín tokoán ngisa mamiyosaa. Kʼoati ma je kjoamiyoná xi kao Jeobá, alikui kuinjenyʼán tsa ntsjaintsjai kʼoétsʼoalee. Kʼoénelee yaoná nga tsín tikui tima én kuinókjoañá tsa saʼnda tsín si̱kjaʼaitsjeen jokuixoán. Kʼoasʼin chja̱koaa Jeobá josʼin fákao jngo tiʼndí je Nʼaile. Ningalani kʼoakʼuínle Jeobá jotjín ni̱ma̱ná, tonga kao kjoaxkóntokon kʼoasʼianñá (Salmo 62:8). Kʼoatjín, kʼianga jchaxkoán je Niná tjínnele chótʼayá je Biblia nga jngó jngoá kʼoa nga ñaki kao ni̱ma̱ná kʼoétsʼoanilee. Kʼiatsa kʼoasʼiaan alikui kuinjenyʼán je kjoatsjoacha xi tjínná kao Niná.

15, 16. Ánni nga nʼio chjí jchatokonsíñá nga kʼoasʼin ʼmiyasoán je énnda chjotse xi tʼatsʼe Chjotaxále Niná.

¹⁵ Nga chotʼayá Biblia kʼoa nga bʼetsʼoaa kʼoasʼin ʼyaxkoán Niná, kʼoa jebi toñá kʼoanʼia. Tonga kuila kʼoakuixoán ndʼaibi josʼin ʼyaxkoán Niná nga jekjaʼaí chjota tiyokoaa: kuinga ʼmiyalee jmeni xi makjainná. A saje kinokjoakoai tsa ʼyani jmeni xi bakóya Biblia. Kʼiatsa jaon, jngo kjoanda xi naskánatjín jetísʼeli (Efesios 3:8). Kʼianga nokjoakoaa xi kjaʼaí jmeni xi jeʼyaa tʼatsʼe Niná Jeobá, jngo xá xi nʼio chjíle tinitjosoán xi tsakʼaile ngatsʼi xi ñaki chjotale Cristo ma: nga kuitsoyason je énnda chjotse xi tʼatsʼe Chjotaxále Niná (tʼexkiai Mateo 24:14; 28:19, 20).

¹⁶ Je pastro Pablo nʼio chjí tsabekon nga koan kitsoyason (2 Corintios 4:7). Kʼianga nokjoañá xi tʼatsʼe Jeobá kʼoa kao jmeni xi tjínndajinle jngo xá xi nʼio nda tinitjosoán. Ánni. Kuinga je nixálee je Nai xi ngisasa nʼio nda. Kʼoa xi ijngosani, nʼio tse kjoanda tsjoáná. Kʼianga ʼmiyasoán jé binyakoaa  chjota xi kixi tjío ni̱ma̱le nga katasíchriantʼale Nʼainá xi tíjna ngʼajmi kʼoa nga ya katabinyaya je ndiaa xi ya koaikaoná kjoabijnachon xi tsínkʼia fetʼa. ¡Jmésa xáni xi kʼoasikji kjoatsjoa tsjoáná! Kʼianga ʼmiyasoán jotso Énle Jeobá matajasa  kjoamakjainná kʼoa matsesa kjoatsjoachaná xi kao Niná. Kʼoa je Jeobá chjí bekon kʼianga kʼoanʼia (Hebreos 6:10). Tojosʼin tiʼyaa, kʼianga ʼmiyasoán basenkaoná nga tosi tonda sʼená je kjoatsjoachale Niná (tʼexkiai 1 Corintios 15:58).

17. Ánni nga nʼio maxátíyasínile nga kʼoasʼin kʼuínyason.

¹⁷ Nʼio chjíle nga tsín si̱chajiaan nga nʼio maxátíyale nga kʼoasʼin tíʼmiyason. Je Biblia itso: “Tinókjoayai énbi, tixítíyai ngantsjai nichxin” (2 Timoteo 4:2). Ánni nga nʼio maxátíyasínile xá jebi. Kuinga i̱ tso je Énle Niná: “Je nichxin jeyale Jeobá jetíjnachrian. Jetíjnachrian, kʼoa nʼio tísíxátíya” (Sofonías 1:14). Kʼoatjín, jenʼio kjimachrianle je nichxin nga sikjeson Jeobá jmeni xi chon sonʼnde. ¡Machjénní nga katasʼejinle chjota! Tjínnele sʼe̱jinle nga tondʼaisa ndʼaibi nga tíjna nichxin nga koa̱n sitjosonle Jeobá, nga̱ je nichxinle Jeobá “likui sikʼachxin” (Habacuc 2:3).

18. Ánni nga tojngo katamasíñá kʼianga jchaxkoán Jeobá kao je xi ñaki chjotale Cristo ma.

¹⁸ Je Jeobá kui xi mele nga tojngo katamaa kʼianga jchaxkoán kao je xi ñaki chjotale Cristo ma. Kuinga kʼoatsosíni Énle: “Kʼoa si̱kjaʼaitsjenjinnía xíngiaa nga jngó jngoá, nga si̱nʼiojiaan xíngiaa, nga sʼe̱ná kjoatjaocha, kʼoa nga kʼoasʼiaan xá xi nda. Likui si̱kʼéjnaa nga koa̱nñaa, josʼin nga tjínkʼa xi kʼoasʼin mangale tonga kʼoénelee xíngiaa, tongisa kʼoasʼiaon josʼin nga jchao nga je nichxinbe nroachrian” (Hebreos 10:24, 25). Kʼianga mañaa kao je ndsʼee xi ngóson sʼin makjainná, jngo kjoanda tjínná nga ma chʼasjengʼaa kʼoa ʼyaxkoán je Niná. Kʼoati ninʼiojiaan kʼoa bʼainganʼiolee xíngiaa.

19. Jméni xi sʼiaan kʼianga ngisasa nʼio koa̱ntsjoachaa xíngiaa xi ñatjen chotʼayá.

¹⁹ Kʼianga biyojtián kao je xi kʼoati choʼndale Jeobá ma ngisa nʼio matsjoachasaa xíngiaa kʼoa ngisa mamiyosaa. Nʼio ndatjín nga tosa kui chotsenlee jmeni xi nda sʼín xíngiaa, josʼin nga kʼoati kui kotsenle Jeobá xi tʼatsaan. Alikuijin choyalai nga sí tsín jme jée koa̱njngí je xi ñatjen chotʼayá. Saténgiñá ngatsʼiaa kʼoa likui tongóson nʼia, tjínkʼa  xi ngotjo majinnile Énle Niná kʼoa tjínkʼa xi mai (tʼexkiai Colosenses 3:13). Je timiyui xi nʼio tsjoake Jeobá. Tsa kʼoasʼiain koa̱ntajakaoní Énle Niná. Tsa tojngo koai̱n kao je xi ngóson sʼin chotʼayá nga jchaxkuín Jeobá, alikui kuinjenyʼán je kjoatsjoacha xi tjínli kao Niná. Kataʼyala jmé kjoanda xi tsjoále Niná je xi kixi tjíofitʼale kʼoa xi tsjoake.

20, 21. Jméni je “kjoabijnachon xi ngantsjai” tsole Biblia, kʼoa ánni nga nʼio naskánatjínsíni kjoachoya jebi.

²⁰ Je kjoanda xi tsjoále Niná je choʼndale xi kixi tjíofitʼale, kjoabijnachonní, tonga jmé kjoabijnachonni. A tsí ñaki tiyochoán ndʼai. Kʼoajin kuixoán ngatsʼiaa nga tiyochoán, nga̱ chjenjtañá, bichiñá kʼoa ʼyoñá nandá. Kʼianga nʼio tsjoa tjínná sakʼoaa kʼoabixoán nga nʼio ndasʼin tiyoaa. Tonga je Biblia kʼoatso nga tsín ñaki nda kjoabijnachon xi tjínná ndʼaibi.

²¹ Je Biblia kʼoatsoná ngatsʼiaa nga chjoé je “kjoabijnachon xi ngantsjai” (1 Timoteo 6:19). Je én xi “kjoabijnachon xi ngantsjai” tso, kui tínchja̱ni kjoabijnachon xi choyalee nichxin xi nroaján. Kʼianga jetsín tichjotajée koa̱nñá, kʼiaa saʼnda nga ñaki jekuiyochon kjoaixiaa jokjoansʼin koanmele Niná nga títjon. Kʼianga kuiyoaa ya sonʼndenaxó, nga jetsín chʼin, nga jenyʼán chon kʼoa nga nʼio tsjoa tjíoná, kʼiaa saʼnda sʼe̱ná je “kjoabijnachon xi ngantsjai” (1 Timoteo 6:12). A tsí nʼio naskánatjín kjoachoya jebi, jósingái ji.

22. Jósʼin so̱konili je “kjoabijnachon xi ngantsjai”.

²² Jósʼin so̱koniná je “kjoabijnachon xi ngantsjai”. Nga kjesa síkʼaxki̱jin pastro Pablo én jebi, kitsole chjotale Cristo: “Kjoanda katasʼín, nʼio tse kjoanda katasʼele” (1 Timoteo 6:18). Tsa mená nga so̱koná je kjoabijnachon xi ngantsjai tjínnele si̱tjosoán jotso Biblia. Tonga a kui xi kitsonile Pablo nga kʼoasʼin tjoéniná je “kjoabijnachon xi ngantsjai”  kʼianga nda sʼiaan. Majain. Nga̱ kjoabijnachon jebi jngoní “kjoandale Niná” (Romanos 5:15). Tonga je Jeobá tsjoa sʼele nga tsjoále kjoabijnachon jebi je xi kixi tjíosíxále. Je, mele nga katasʼeli “kjoabijnachon xi ngantsjai” kʼoa nga tsjoa katasʼe tokuin kʼoa nga nyʼán kuijnai. Kui jebi je kjoabijnachon xi sʼe̱le ngatsʼi xi tsín sikatío je kjoatsjoachale Niná.

23. Ánni nga nʼio chjísínile nga tosi tonda katasʼená je kjoatsjoachale Niná.

²³ Kuinga ndatjínsíni nga chjónangilee yaoná nga jngó jngoá: “A kʼoasʼin tiʼbexkoán Niná jotso Biblia”. Tsa bʼenelee yaoná nga kʼoanʼia nga nyaon nyaon, ndajin. Koaan kʼoéjngoaa tokoán nga je Jeobá koasenkaoná. Jé sikuinda naxinandále nichxin fikjetʼa xi tiyoaa ndʼaibi. Kʼoa yaa sikʼasʼenná ya sonʼnde chjotse xi jetíjnachrian. ¡Jmé naskánakoa̱nni! ¡Nʼiojin tsjoa sʼe̱ná nga kui kichjoejiaan je xi ndatjín nichxin fetʼa xi tiyoaa ndʼaibi! Kʼia tsakui chjoéjin xi ndatjín ndʼaibi, koaan kuijnai tokʼia saʼndani nga̱ sʼe̱li “kjoabijnachon xi ngantsjai”, xi koanmele Jeobá nga sʼe̱ná saʼnda nga títjon.