KJOAʼMIYA XI MAJNGOKAO
ʼYáni je ánkjetítjon xi Miguel ʼmi
YA Biblia tojngo jao bersíkulo faʼaitʼa jñani Miguel ʼmile jngo ánkje. Tonga tjín xi tísʼín ngantsjai kʼianga bʼaxki̱. Ya libro xi tsʼe Daniel kʼoatso nga kao ánkje tsʼen tjíokján. Je xo̱n xi kiski Judas kʼoatso nga kao Na̱i tjíofáoti, kʼoa ya libro xi tsʼe Apocalipsis kʼoatso nga kjoajchán tjíobʼéjna kao je Na̱i kʼoa kao ánkjele. Kui xi tsonile jebi nga kui sítoánntjai ngantsjai nga toje Jeobá xi tiʼndele koatexoma, kʼoa kján kao je kontrale Niná. Je jaʼaínle Miguel isʼin tsoyanile: “ʼYáni xi mangóson Niná”, kʼoa kʼoasʼin sítjoson josʼin tsoyanile jaʼaínle. Tonga ʼyáni je Miguel.
Kuila títjon si̱kjaʼaitsjeen nga tjínkʼa chjota xi jao jan mani jaʼaínle. Tobʼelañá, je Jacob kʼoati Israel tsakʼin, kʼoa je pastro Pedro kʼoati Simón tsakʼin (Génesis 49:1, 2; Mateo 10:2). Tikʼoasʼinni xi kao Miguel, je Biblia bakóná nga kui jaʼaín bʼaile Jesucristo nga kjesa faʼaijin i̱ Sonʼnde kʼoa nga jekichoni ya ngʼajmi. Chótʼajinla ya Biblia ánni nga kʼoabixónsíñá.
Ánkjetítjon. Je Biblia “ánkjetítjon” tsole je Miguel (Judas 9). Xi tsonile nga tojngo mani ánkje xi kʼoaʼmi. Lijña kʼoatso je Biblia tsa nkjín mani ánkje xi tjíotítjon. Xi ijngosani, ya Biblia kʼoatso nga xále ánkje ngʼajko̱ tjínle Jesús. Kʼoasʼin bakóná ya 1 Tesalonicenses 4:16 jñani kʼoatso jmeni xi sʼin Jesús: “Jesoa Nainá kjoaʼaíjenni ngʼajmi nga skíʼndíaxá, kao jta̱le ánkje ngʼajko̱”. Je testo jebi kʼoatso nga kao jta̱le ánkje ngʼajko̱ kuinchja̱ni Jesús. Kʼoa jebi kui xi bakóná nga tijeni Jesús xi Miguel ʼmi.
Ngʼajko̱. Je Biblia kʼoatso nga “Miguel kao ánkjele kiskankao je cho̱toán. Kʼoa kiskan cho̱toánbi kao ánkjele” (Apocalipsis 12:7). Kʼoatjín, je Miguel ngʼajko séjnale ánkjele Niná. Kʼoa je libro xi tsʼe Apocalipsis kʼoati tso nga je ngʼajko̱ séjnale Jesús je ánkje (Apocalipsis 19:14-16). Kʼoa je pastro Pablo síkʼaxki “Nainá Jesús” kao “ánkje[le] xi bakó nganʼiole” (2 Tesalonicenses 1:7). Tojosísʼin tiʼyaa, je Biblia nchjani tʼatsʼe Miguel kao “ánkjele” kʼoa tʼatsʼe Jesús kao “ánkjele” (Mateo 13:41; 16:27; 24:31; 1 Pedro 3:22). Ya Biblia alijña kʼoatso tsa jaoya mani ánkjele Niná tsa jngo xi je Miguel tíbándiaale kʼoa tsa jngo xi je Jesús tíbándiaale. Kʼoa kuinga kʼoabixónsíñá kʼianga je xi Miguel ʼmi jéní Jesucristo nga tísítjoson xále ya ngʼajmi. *
^ párr. 2 Ya libro Perspicacia para comprender las Escrituras vol. 2, pájina 386, 387 kuitsoyasali nga je ʼNdíle Niná xi Miguel ʼmile. Libro jebi jé testigole Jeobá bʼasje.
