1, 2. 1) Ánni nga tsín mangósonsíni kʼianga ñaki ʼyaxkoaan jngo chjota xi nʼio bʼaxki̱ kʼoa tsa to jaʼaínle xi ʼyaa. 2) Jótso je chjota xi tʼatsʼe Jesucristo.

I̱ SONʼNDE nkjín chjota tjín xi nʼio ʼyale. Tjínkʼa xi nʼio bʼaxki̱ ya ʼndele, ya jña tjíoni, ya naxinandále kʼoa tsa ngakjijnda Sonʼnde. Tonga ninga ʼyalani joʼmi jngo chjota xi nʼio bʼaxki̱ ali tsakuijin xi tsonile nga nda ʼyaxkuin, kʼoajin nga̱ likui ʼyai jme xi kisʼin ngasʼa kʼoa ʼyákjoán chjotani.

² Je Jesucristo nʼio bʼaxki̱ ngakjijnda Sonʼnde ninga jelanime jao jmi nó tjínle nga tsakʼejna. Tonga je chjota alikui be ʼyákjoánni je Jesucristo. Tjínkʼa xi kʼoatso nga jngo chjota xi nda chjota koan. Tjínkʼa xi tso nga tʼatsʼe Niná kinchja̱ya. Kʼoa tjínkʼa xi kʼoasʼin makjainle nga Niná kʼoa nga tjínnele nga je kʼoétsʼoalee. A tikʼoaxótse tjín jebi.

3. Ánni nga nʼio chjísínile nga kataʼyai je Niná Jeobá kao Jesucristo.

³ Nʼio chjíle nga kataʼyai jokjoantjínni xi tʼatsʼe Jesucristo. Ánni. Kuinga i̱ tso je Biblia: “Jé xi kjoabijnachon ngantsjai, nga kʼoasʼin skoe̱li xi tojngo ji Niná xi ñaki kjoakixi, kʼoa skoe̱ Jesucristo je xi kinikasáin” (Juan 17:3). Kʼoatjín, kʼiatsa ñaki jchai je Niná Jeobá kao Jesucristo kui xi koasenkaoli nga koa̱n kuijnai ngantsjai ya sonʼndenaxó (Juan 14:6). Xi ijngosani, jé Jesús xi  ngisasa nda choa̱ tsakʼéjna josʼin si̱jchá yaoná kʼoa josʼin koanngínkoaa xíngiaa (Juan 13:34, 35). Je kjoaʼmiya xi títjon kui kitsoyaná jokjoantjínni xi tʼatsʼe Niná. Kʼoa ndʼai kuila chótʼayá jmeni xi bakóya Biblia xi tʼatsʼe Jesucristo.

4. Jósʼin tsoyanile je én xi Mesías kʼoa Cristo tso.

⁴ Nʼio tongini nga kjesa tsinjin Jesús, je Biblia kʼoakitso nga jngo chjota sikasén Niná, xi Mesías kʼoa Cristo kʼuín. Je én xi Mesías tso én hebreoní kʼoa je én xi Cristo tso én griegoní, kʼoa xi “kitjoejin” sʼin tsoyanile. Kui xi tsonile nga je chjota xi sikasén Niná, jesoa skoéjin nga jngo xá tsjoále. Tsesa xi jchaa jña tʼaxin kjoaʼmiya nga nʼio chjíle je xá xi tjínle Mesías kʼianga katabitjoson jmeni xi kitso Niná. Kʼoati jchaa nga Jesús koaanle sichikontʼainná ninga ndʼaibi. Kʼianga kjesa tsinjin Jesús, nʼiojin nkjín chjota xi kitso: “ʼYá xótseni xi Mesías koa̱n”.

5. Jméni xi tsín jao tsakʼé kon je chjotale Jesús.

⁵ Nichxin kjoan jao jmi nóján, je chjotale Jesús ñaki tjíojngo kon nga je Mesías (Juan 1:41). Je Simón Pedro kitsole: “Jiní Cristo” (Mateo 16:16). Kʼoa ánni nga tsín jao kisatiosíni kon je chjotale Jesús nga ñaki je Mesías xi kitso Niná. Kʼoa ánni nga kʼoati koa̱n kʼoakʼoésíñá tokoán tsanda ñá.

6. Jméni xi koa̱n si̱ngósonkoaa josʼin tíbasenkao Jeobá je chjota xi makjainle nga katabe ʼyani je Mesías.

⁶ Je chjotale Niná xi kʼia tsakatio nga kjesa faʼaijin Jesús, nʼio tse én xi kitsjoa josʼin jchanile je Mesías. Kuila si̱ngósonkoaa jebi: tsa jngola chjota kʼuínkjasjai ya jña bitjo karro, a tsí ngisa ngotjo koa̱nsjainili kʼiatsa kʼoakʼuínli jokji. Tikʼoakjoánsʼinni, je Jeobá nʼio tse xi tongini kʼoakitsole je chjotale xi kiski Biblia tʼatsʼe jmeni xi sʼin kʼoa jmeni xi koa̱ntʼain je Mesías. Kʼoa kuinga kʼoakisʼinsíni nga sasa katabeni je chjota xi koa̱nkjainle ʼyani je Mesías kʼianga kuitjoson ngayeje én jebi.

7. Jaola koya én xi tongini kinokjoa kʼoasi xi kitjoson kao Jesús.

⁷ Jaola koya én xi tongini kinokjoa kataʼyaa. Xi títjon kui jebi, je Miqueas tsʼato ñato siento nó tongini  kʼoakitso nga ya Belén jtsín je chjota xi sikasén Niná, jngo naxinandáʼndí xi ya tíjna Judá (Miqueas 5:2). Kʼoa jñáni kitsin Jesús. Yakjoán Belén kitsin (Mateo 2:1, 3-9). Je én xi majaoni kui xi tjítʼa ya Daniel 9:25, én jebi nʼio nkjín siento nó tongini kʼoakitso josʼin koa̱nxki̱ nó saʼnda nga kjoaʼaí je Mesías, nga nó 29. * Kʼianga kitjoson nga jao koya én jebi kʼoa xi kjaʼaísanile kui xi bakó nga jéní Jesús je Mesías xi kitso Niná.

8, 9. Jósʼin ngisa tinda tsaʼyangánile Jesús nga jéní Mesías kʼianga kichanisʼenngindá.

⁸ Kʼianga jetífikjetʼa nó 29 ngisa tinda tsaʼyangánile Jesús nga je Mesías. Je Jesús kʼiaa kikonle Juan Bautista nga katakanísʼenngindá ya xo̱ngá Jordán. Je Jeobá tongini kʼoakitsole je Juan Bautista nga jngo choa̱ tsjoále kʼianga skoe̱ ʼyani je Mesías, kʼoa kʼiaa kʼoakoan nga jekiskanisʼenngindá Jesús. Je Biblia kʼoatso: “Kʼianga jekichanisʼenngindá Jesús, kitjokajin ndi̱toonni nandá; kʼoa koeni, je ngʼajmi kitjoʼai, kʼoa tsabe je nganʼiole Niná xi kinroajen joni nisechxoa kʼoa yaa kinroajennele Jesús. Koeni, jngo jta̱ kinoʼyale xi kitso: Jébi ʼNdína xi tsjoake̱, jonda sʼe koan xi tʼatsʼe” (Mateo 3:16, 17, TNM). Kʼianga tsabe kʼoa kinrʼoé jebi je Juan Bautista, likui jao kisʼele nga je Jesús xi kisikasén Niná (Juan 1:32-34). Kʼiaa Mesías kʼoa Cristo koan Jesús kʼianga jaʼainele nganʼiotsjele Niná, nga̱ xá kʼoasʼin kiskoejinni Niná nga Ngʼajko̱ kʼoa Rey koa̱n (Isaías 55:4).

⁹ Je én xi jekitjoson xi tjítʼa Biblia kʼoa kao je én xi jesoa Jeobá kitsjoa tʼatsʼe Jesús kui xi bakó nga jéní je Mesías. Tonga ngi jaolasa koya jchaa xi bakóya Biblia tʼatsʼe Jesucristo: jñá jaʼaini kʼoa ʼyá chjotani koan.

10. Jótso je Biblia, jñáni tíjna Jesús nga kjesa faʼaijin i̱ Sonʼnde.

¹⁰ Je Biblia kʼoatso nga ya ngʼajmi tíjna Jesús nga kjesa faʼaijin i̱ Sonʼnde. Tobʼelañá, je Miqueas ali tsa tokuijin xi kitso nga ya Belén jtsín je Mesías, kʼoati kitso nga tokʼoa jetíjna saʼnda nga kje jme xi sʼendajin (Miqueas 5:2). Saʼnda Jesús nkjín kʼa kʼoakitso nga ya tsakʼejna ngʼajmi nga kjesa tsinjin i̱ Sonʼnde (tʼexkiai Juan 3:13; 6:38, 62; 17:4, 5). Kʼianga tsakʼejna ngʼajmi espírituní kʼoa nʼio ndasʼin tsakʼejnakao Jeobá.

11. Jósʼin bakó Biblia nga je Jesús xi ngisa tsjoake Jeobá.

¹¹ Nkjín koya anni nga je Jesús xi ngisa tsjoakesíni Jeobá. Je Biblia kʼoatso nga je “tíjna títjonle ngayije xi kisʼenda”, nga̱ jé títjon kisinda Niná (Colosenses 1:15). * Ijngosa anni nga tsín mangósonsíni kao xi ngikʼa kuinga ʼNdíjngole Niná ma (Juan 3:16). Kui xi tsonile nga jesoa Niná kisinda. Kʼoa kʼoati toje Jesús xi tsakasenkao Jeobá nga kisinda ngayeje tsojmi xi ngikʼa (Colosenses 1:16, TNM). Kʼoati “én” ʼmile (Juan 1:14). Kui kʼoaʼminile nga je kisikʼatoya énle Nʼaile. Kʼoa likui jao tjínná nga je kisikʼatoyale én kʼoa jme xi sʼin je xi ngikʼa xtile Niná jolani tsa ánkje kʼoa kao chjotasonʼnde.

12. Jósʼin ʼyañá nga likui mangóson je Jesús kao je Niná.

¹² A mangóson je Jesús kao je Niná josʼin makjain kʼale chjota. Alikui kʼoasʼin bakóya Biblia. Tojosʼin jekaʼyaa, je ʼNdíle Niná koanndaní kʼoa kitsʼianí kjoabijnachonle, tonga xi tsʼe Jeobá mai kʼoa likuikʼia kjoetʼa (Salmo 90:2). Je ʼNdíjngole Niná nikʼiajinla kui kiya jko̱ tsa ngóson sʼin kʼoéjna kao Nʼaile. Je Biblia kʼoatso  kixi nga Jesús ngisa nangi tíjnale je Nʼaile (tʼexkiai Juan 14:28; 1 Corintios 11:3). Tojékjoán Jeobá je “Niná xi ngisasa tse nganʼio tjínle” (Génesis 17:1). Kuinga tsín ʼya xi mangósonkaosíni. *

13. Jótsonile Biblia kʼianga kʼoatso nga ya “jitjojin Niná xi tsín matsen” je Jesús.

¹³ Je Jeobá kʼoa kao ʼNdítjonle nʼio nkjín miyón nó ñatjen tsakatio ya ngʼajmi kʼianga kjesa síndajin je niño kao Sonʼnde. Nʼiojin tsjoake koan xínkjín (Juan 3:35; 14:31). Je ʼNdí jebi ñaki kʼoakoankjoan jokjoan je Nʼaile. Kuinga kʼoatsosíni Biblia nga ya “jitjojin Niná xi tsín matsen” (Colosenses 1:15). Tojo ma je xti nga ya tjojin jokjoan kʼoa josʼín xijchále, je ʼNdíle Niná kʼoati ñaki kui tsakakó jokjoan je Nʼaile.

14. Jókoannile nga jo chjota sʼin kitsinsíni je ʼNdíjngole Jeobá.

¹⁴ Je ʼNdíjngole Jeobá kao kjoatsjoa kisikʼéjna ngʼajmi nga jaʼai i̱ Sonʼnde kʼoa nga chjota koan. Tonga tsakui nichxin i̱sí: “Jókoannile nga jo chjota sʼin kitsinsíni jngo xi espíritu”. Jé Jeobá xokisʼin. Kiskoé je kjoabijnachonle ʼNdíjngole xi ya tíjna ngʼajmi kʼoa yaa kisikʼéjnaya tsʼoa̱ María, jngo chjoónxongó xi ya tjenni ntje̱le Judá. Makjoanni nga tsín tsa chjota tíbʼejnakao María nga kʼia, ñaki tsje koan je ʼndíle kʼoa Jesús kitsole (Lucas 1:30-35).

15. Ánni nga ngisa nda ʼyasíñá je Jeobá kʼianga ʼyaa je Jesús.

¹⁵ Kʼianga ʼyaa ngayeje jmeni xi kisʼin kʼoa jmeni xi kitso Jesús nga tsakʼejna i̱ Sonʼnde ngisa nda ʼyaa xi tʼatsʼe. Kʼoa nga ʼyaa je Jesús ngisa nda ʼyaa je Jeobá. Ánni. Kuinga je Nʼaile kitjojin. Kʼoa kuinga i̱ kitsosínile jngo chjotale: “Je xi tsabena [...] an, tsabe Nʼainá” (Juan  14:9). Je libro xi Mateo, Marcos, Lucas kʼoa Juan ʼmi xi faʼaitʼa ya Biblia, nʼio tsesa xi bakóyaná xi tʼatsʼe Jesucristo, josʼin tsakʼejna, jmeni xi kisʼin kʼoa jokoankjoan.

16. Jmé énni xi nʼio kitsoyason Jesús kʼoa ʼyá tsʼe én jebi.

¹⁶ Je Jesús “Maestro” tsakʼinle (Juan 1:38; 13:13). Jméni xi kitsoya. Je xi nʼio kitsoyason kui je “énnda xi tʼatsʼe kjoatéxomale ngʼajmi”, xi ijngoni én kui jmeni xi sʼin je Chjotaxále Niná. Kʼianga jekoatexomason i̱ Sonʼnde Chjotaxá jebi nʼio tse kjoanichikontʼain tsjoále je chjota xi kixi koaitʼale Niná (Mateo 4:23). ʼYá tsʼe én xi kitsoyason Jesús. Tije Jesús xokitsoni: “Je én xi tibakoya ali tsʼanjian én, tonga tsʼení je xi kisikasénna”, xi tsonile, tsʼee Jeobá (Juan 7:16). Je Jesús bení kʼianga kui xi mele Nʼaile nga katanrʼoé chjota je énnda chjotse xi tʼatsʼe Chjotaxále. Yaa kjoaʼmiya jin jchasaa xi tʼatsʼe Chjotaxále Niná kʼoa jmeni xi sʼin.

17. Jñáni kitsoya Jesús kʼoa ánni nga kʼoasikji tsakʼénesínile yaole.

¹⁷ Jñáni kitsoya Jesús. Kitsoya tojñani nga tjín chjota: ya naxinandáyʼai kao naxinandáʼndí, ya jinxjóe kao jinndi̱tsi̱n kʼoa ya niʼyale chjota. Je Jesús alikui kui kiskoyale nga katabichónrʼoe chjota, jé kikásjai (Marcos 6:56; Lucas 19:5, 6). Ánni nga kʼoasikji tse nichxin kao nganʼio kisikjesíni Jesús nga tsakakóyason. Kuinga kʼoasʼin koanmele Nʼaile, kʼoa Jesús kisitjosonle ngantsjai (Juan 8:28, 29). Tonga kʼoati kuinga kʼoakisʼinni nga koanmake je chjotankjín xi kichokonle (tʼexkiai Mateo 9:35, 36). Je chjotatítjonle relijión tjínnenile tsakakóyale tsakai je chjota jokjoantjínni xi tʼatsʼe Niná kʼoa jme xi tjínndajinle, tonga tokʼoasʼin kitsjionkon. Tonga Jesús bení jokji machjénle chjota jebi nga kjuinrʼoé je énnda xi tʼatsʼe Chjotaxále Niná.

18. Jñánile xi ngisa tsjoachai jokoankjoan Jesús.

¹⁸ Je Jesús nʼio tsjoake koan chjota kʼoa nʼio kisʼele  ni̱ma̱. Ñaki tondʼé sʼin tsabekon chjota kʼoa toxkia chjota koan, kʼoa saʼnda kitsjentʼale je xtiʼndí (Marcos 10:13-16). Alikui tsakjaʼájin chjota kʼoa jtike koan tojmeni xi tsín kixi tíjna (Mateo 21:12, 13). Nichxin nga tsakʼejna Jesús, alikui chjí ʼyatokon je yánchjín, tonga Jesús chjí tsabekon (Juan 4:9, 27). Nʼio nangitokon koan Jesús. Saʼnda tsakanéjon ñandia ndso̱ko̱ pastrole, ninga je bʼakaole xá jebi je choʼnda xi ngisasa nangi tjío.

19. Jméni choa̱ xi bakó nga koanmake Jesús je chjota xi kjoañʼai tsakjaʼá.

¹⁹ Jesús koanmake je chjota xi kjoañʼai tsakjaʼá, kuinga kisichjénsíni nganʼiole Niná nga kisindaya xi tjíomʼe (Mateo 14:14). Tobʼelañá, jngo chjota xi tífiʼndojon yaole kichokonle kʼoa kitsole: “Tsa meli koa̱n si̱tsjenái”. Ñaki aon koan jinni̱ma̱le Jesús jokji kjoañʼai tífaʼá chjota jebi. Koanmake, tsakjénle ntsja kʼoa kisikao, kitsole: “Mena, katamatsjai”. Kʼoa ndi̱toon  koanndaya chjota jebi (Marcos 1:40-42). A fiya jkui jókji tsjoa koanle chjota jebi.

20, 21. Ánni kʼoabixónsíñá nga jé Jesús xi ngisasa nda choa̱ tsakʼéjna nga nda kisitjosonle Niná kʼoa nga kixi kitʼale.

²⁰ Jé Jesús xi ngisasa nda choa̱ tsakʼéjna nga nda kisitjosonle Niná kʼoa nga kixi kitʼale. Ninga tojme xi kisikao chjota kʼoa tojme kjoañʼai xi kisikjaʼá ñaki kixi kitʼale ngantsjai je Nʼaile xi tíjna ngʼajmi. Tsakʼasjengi jme xi tsakatíobasenle je Na̱i (Mateo 4:1-11). Nga títjon tjínkʼa xínkjín xi likui koankjainle xi tʼatsʼe. Saʼnda kitso: “Alikui nda tjínkon” (Marcos 3:21). Tonga Jesús alikui kisikinroajen kon, tosi tonda kisixále Niná. Kʼianga kinokjoaʼaonle kʼoa kisatele, nijojin kitso kʼoa alikui jokisikao je kontrale (1 Pedro 2:21-23).

²¹ Je Jesús kixi kitʼale Niná saʼnda nga kʼien ninga nʼio  tse kjoañʼai kisikjaʼá chjota kontrale (tʼexkiai Filipenses 2:8, TNM). * Tikjaʼaitsjenlai ngayeje kjoa xi jaʼatojin nichxin nga kinikʼien. Kiskale kʼianga kitsoa je chjota xi xá tjínle, kʼoa nga énndiso tsakáne chjota, kʼoa nga kʼoakitso chjotatsʼen xi jues tjío nga katanikʼien, nga tsabesin chjota kʼoa nga kisikjaʼákon sondado. Kʼianga jekjoan kuiyá nga kjitʼa yá, kitso: “Jejitjoson ngayije” (Juan 19:30). Nga koanjanni nichxin, espíritu sʼin kisikjaʼáyale je Nʼaile xi tíjna ngʼajmi (1 Pedro 3:18). Nga jekicho ñachan nichxin, kini ya ngʼajmi kʼoa yaa “tsakʼejnatʼa ntsja ngakixile Niná” kʼoa kiskoya saʼnda nga kʼoaile xá nga koatexoma (Hebreos 10:12, 13).

22. Jmé kjoanda xi kisoko nga kixi kitʼale Niná je Jesús saʼnda nga kʼien.

²² Jmé kjoanda xi kisoko nga kixi kitʼale Niná je Jesús saʼnda nga kʼien. Je kjoabiyale kiskoʼaiʼndená kʼianga koa̱n kuiyoaa ngantsjai ya sonʼndenaxó, jokjoansʼin koanmele Jeobá saʼnda nga títjon. Yaa kjoaʼmiya xi fini jchaa jósʼin kuitjoson jebi xi totʼatsʼe kjoabiyale Jesús.