¡KOENI! Xa tíjnajinle Daniel. ¡Tonga likui jotísíkao! A ʼyaní ánni. ʼYáni xi ya kiskanisʼen Daniel ya jña tjío xa xokjoan. Kataʼyala.

Je xi rey tsakʼejna Babilonia nga kʼia je xi Darío tsakʼin. Nʼio nda kisasenle xi tʼatsʼe Daniel kʼianga nda chjota kʼoa chjine koan, kʼoa xángʼa kitsjoale jña tíbatéxoma. Kuinga koanxinkonke kʼasíni chjota je Daniel, kʼoa kui jebi xi kisʼin:

Kinrʼoe Darío kʼoa kitsole: “Menajin ngatsʼijin, ji rey, nga jngo kjoatéxoma chʼasjai jñani kʼoatso nga kante nichxin nga niʼyajin niná kʼoa chjota xi kjaʼai katasʼetsʼoale, toji katasʼetsʼoali, ji rey. Kʼiatsa ʼya xi tsín sitjoson, ya katanikʼatjenjinle xa”. Likui be rey Darío ánni nga kui kjoatéxoma jebi koanmesínile chjota xokjoan. Kisasenle, kʼoa tsʼasje kjoatéxoma jebi. Kʼoa kjoatéxoma jebi likui tikoan tsʼantjaiyani.

Kʼianga je kisʼejinle Daniel xi tʼatsʼe jebi, ki ndʼiale kʼoa tsakʼétsʼoa josʼín ngantsjai. Be chjota tsʼen xokjoan nga tojo kʼoetsʼoale Jeobá je Daniel. Tsjoa koanle, nga tome kʼoakoan jmeni xi tjíofasjai, nga katanikʼien Daniel.

Kʼianga je koanjinle rey Darío jmeni xi kjima, ba koanle. Tonga likui tikoan kisikʼantjaiyani je kjoatéxoma, kʼoa tsakʼéne nga ya kinikʼatjenya Daniel ya nga̱jao̱ jña tjíoʼya xa. Tonga kitsole Daniel: “Koyale kʼianga je Niná xi nixálai katabʼasjentjaili”.

Darío nʼio koankjaojinle saʼnda likui koan kisʼefe nga kui nitjen. Nga koannyaonni kjoan kitoka nga̱jao̱ jña tjíoʼya xa. Josísʼin matsen ibi. Kiskiʼndáxá kʼoa kitso: “¡Daniel, choʼndale Niná xi tíjnakon! A koan tsakʼasjentjaili je Niná xi nixálai xi tʼatsʼe xa”.

Kitso Daniel: “Niná kisikasén ánkjele, kʼoa tsakʼéchjoa tsʼoa je xa nga tsín jotjíosíkaona”.

Nʼio tsjoa koanle je rey. Kʼoakitso nga katachʼasje Daniel ya nga̱jao̱ jña tjíoʼya xa. Xijekoan, je chjota tsʼen xi koanmele nga katanikʼien Daniel, ya kinikʼatsaojinle xa. Tikje tsaoyajinni chjota tsʼen xokjoan ya nga̱jao̱ jña tjíoʼya je xa nga kiskoe kʼoa kisixkoa ngayeje nindale.

Xijekoan, je rey Darío jngo kjoatéxoma tsakʼasjele naxinandále, kitso: “Jchaxkón ngatsʼio je Ninále Daniel. Tokʼoamaná jme xá xi sʼín. Jé tsakʼasjentjai Daniel nga tsín kiskinele xa”.