ME ÑACHANTE jmi chjota kitjo Babilonia nga ki Jerusalén. Kʼianga je kichó, toxkoa̱le nyando Jerusalén nga kʼoasʼin kinikjeson. To kijna kjitia. Je chjota israelita ijngokʼa tsakʼéndaya chjotseni.

Je xi títjon kisʼin kuinga jngo sonxta tsakʼénda. Je xi sonxta ʼmi ya jña kinikʼienson cho̱ xi tsakʼaitʼale Jeobá. Xije jaʼato jngo jao sá kʼia tsakʼétsʼiakao nga tsakʼéndaya yo̱ngo̱ je chjota israelita. Tonga je chjota kontrale xi ya chrian naxinandále tsakatiochjoale nga tsín tosi tonda kui katabʼénda. Xijekoan, je xi rey tíjna Persia nga kʼia, chan tsakʼasje jngo kjoatéxoma josʼin koanmele chjota tsʼen xokjoan jñani tsakʼéchjoa nga tísʼendaya yo̱ngo̱.

Nga je kichoka xjaʼaonjao nó nga kitjoni Babilonia je chjota israelita, je Niná kisikasén Ageo kao Zacarías xi kinchjaya kjoatéxomale kʼianga kʼoakitsole chjota nga katabʼéndaya ijngokʼani je yo̱ngo̱. Kʼoa je chjota kisinʼiotʼa nganʼiole Niná kʼoa kisitjoson. Tsakʼéndaya ijngokʼani, ninga jngo kjoatéxoma kitjomitjen jñani nga kisʼechjoale.

Kuinga jngo chjota títjon xi ya tsʼe Persia xi Tatenai ʼmi kichonrʼoesíni xi kʼoakitsole ʼyá xi kitsjoaʼndele nga kʼoasʼin kui yo̱ngo̱ tjíobʼéndayani. Je chjota israelita kʼoakitsole nga je rey Ciro xi i̱ kitso ya Babilonia: “Tangion ya Jerusalén, kʼoa tʼendao je yo̱ngo̱le Jeobá Nináno”.

Je Tatenai jngo xo̱n kisikasén ya Babilonia kʼoa kui kiskonangi tsa kʼoakitso kjoaixi Ciro kʼianga kje mʼejin. Kjitʼanangi kichó jngole xo̱n xi kisikasén xi rey tíjnale Persia nga kʼia. Kʼoa kʼoakitso nga kʼoatjín. Kuinga i̱ tsosíni xo̱n xi kisikasén je rey: “Tʼaiʼndelao je chjota israelita nga katabʼéndaya je yo̱ngo̱le Ninále. Kʼoa kʼoaxinno nga tinyakao”. Ño nó koanjngonile je yo̱ngo̱, kʼoa nʼio tsjoa koanle je chjota israelita.

Kʼianga je nkjín nó ti jaʼatongáni. Nga jeme ñachajin nó tjínle nga koanjngole je yo̱ngo̱. Je chjota Jerusalén ma̱ tsakatio, kʼoa je naxinandá kʼoa kao yo̱ngo̱le Niná likuiti ndasʼin koantsenni. Ya Babilonia, jngo chjota israelita xi Esdras tsakʼin, kisʼejinle kʼianga nʼio machjén nga sʼendaya ijngokʼani je yo̱ngo̱le Niná. Kuinga, a ʼyaní jméni xi kisʼin.

Je Esdras kinrʼoe Artajerjes, xi rey tsakʼejna Persia, kʼoa rey jebi nʼio nkjín tsojmi kitsjoa kjoatjaole Esdras xi kikao ya Jerusalén. Je Esdras kʼoakitsole je chjota israelita xi ya tjío Babilonia nga katafikao ya Jerusalén kʼoa jaonla jmi mani xi jaon kitso. Nʼio nkjín taonchxoa, taonsiné kʼoa tsojmichjí tsakʼa kʼianga ki.

Tonga koankjaojinle Esdras, nga chjota tsʼen kisʼe ya yandia. Tsa mai ya kjoaʼale chjota xokjoan je taonchxoa kʼoa kao taonsiné xi tsakʼa, kʼoa saʼnda sikʼien. Kuinga kisikatíoxkósíni chjota je Esdras, tojosísʼin matsen sén xi faʼaitʼa ibi. Kʼoa tsakʼétsʼoale Jeobá nga katasíkuinda ya yandia saʼnda nga kuichó Jerusalén.

Je Jeobá kisikuinda kjoaixi. Ño sá kichoni Jerusalén, kʼoa likui jme xi koanle, nda kichó. A tsínkui xi bakóyaná jebi kʼianga Jeobá síkuinda ʼyani xi je sínʼiotʼa.