JE Moisés koanmele nga kjoaʼasʼenkao chjota israelita ya Canaán. Kuinga kitsosíni: “Jeobá tʼaiʼndenai nga kjoaʼatoa ya xongá Jordán, ánni nga skotsensínile ʼnde xi naskánachon tíjna ya”. Tonga Jeobá kitsole: “¡Jyo tijnai! ¡Likʼoajin tisini!” A ʼyaní ánni nga kʼoakitsosínile Jeobá.

Tʼatsʼe jmenáni xi koan kʼianga tsakále naxi je Moisés. A faʼaitsjenli, je Moisés kao Aarón likuiná je Jeobá tsakʼasjengʼa. Likuiná kʼoakitsole naxinandá tsa je Jeobá tsakʼasje nandá ya naxi. Kuinga kʼoakitsosínile Jeobá nga tsín kjoaʼasʼen ya Canaán.

Kʼianga je jaʼato jngo jao sá nga kʼien Aarón, Jeobá kitsole Moisés: “Chjoai Josué, kʼoa ya tikaséjnai ngixko̱n naʼmi Eleazar kʼoa kao ngixko̱n naxinandá. Kʼoa ya ngixko̱n ngatsʼi, kʼoatʼinlai nga je Josué xi chjota títjon koa̱n ndʼai”. Je Moisés kʼoakjoan kisʼin jokitsole Jeobá, tojosísʼin tiʼyai sén xi faʼaitʼa ibi.

Xijekoan, je Jeobá kitsole Josué: “Nʼiojin katamai, kʼoa li nokjonjin. Ji kjoandialai je chjota israelita kʼoa ji kuitjasʼenkoai ya ʼnde Canaán jñani kixinle nga tsjoale, kʼoa an tijnakaole”.

Xijekoan, je Jeobá kʼoakitsole Moisés nga ya katafimi jko̱nindo xi Nebo ʼmi xi séjna ya Moab. Ya saʼnda tjen kiskotsennile Moisés jña tíjna xongá Jordán kʼoa tsabe ya ʼnde Canaán nga naskánachon. Jeobá kitsole: “Kui jebi ʼnde xi kixian nga tsjoale je xtile Abraham, Isaac kʼoa kao Jacob. Titsjoaʼndele nga tichotsenlai, tonga likui tsjoaʼndele nga ya kuitjasʼain”.

Je Moisés ya kʼien ya jko̱nindo Nebo. Jngo siento kao kan nóle nga kʼien. Tojo tjínsale nganʼio kʼoa tojo ndasa matsenle. Je naxinandá nʼio ba koanle kʼoa ngatsʼi nʼio tse kiskiʼndíantjai Moisés. Tonga kʼoati tsjoa koanle nga Josué tsakasentítjonle.