¡JMÉ xi kjima! Jmé xi tjíosʼín chjota. ¡Jngo nrajaʼndí tjíobʼétsʼoale! Ánni nga kʼoatjíosʼínsíni.

Kʼianga nʼio nkjín nichxin koanle Moisés ya nindo, je naxinandá kitso: “Likui ʼya jmeni xi koanle Moisés. Jngo niná sindaa xi kʼaonsjená i̱ ʼnde jebi”.

“Ndatjínni”, kitso Aarón je ndsʼe Moisés. “Chjasjengio tsiñono xi taonsiné kʼoa nroakaonao”. Kʼianga je kʼoakisʼin naxinandá, je Aarón kisinandá tsiño kʼoa jngo nrajaʼndí xi taonsiné kisinda. Kʼoa naxinandá kitso: “¡Jebi Nináná, xi tsakʼaonsjená ya Egipto!” Kʼoa jngo sʼuíje tsakʼasje, kʼoa kui nrajaʼndí xi taonsiné tsakʼétsʼoale.

Nʼio koanjtile Jeobá kʼianga tsabe jebi. Kʼoa i̱ kitsole Moisés: “Ngotjokjoain kʼoa tʼinjain. Nʼio chʼao tjíosʼín je naxinandá. Je  kasíchajin kjoatéxomana kʼoa jngo nrajaʼndí xi taonsiné tjíobʼétsʼoale”.

Kjitʼanangi kitjojen Moisés ya nindo. Kʼianga je kichochrian kui jebi xi tsabe. ¡Jngo nrajaʼndí tjíosendaile kʼoa tjíotendaile je chjota! Je Moisés nʼio koanjtile kʼoa tsakʼaontʼaʼndé nga jao lajaote xi yʼa jñani nroatʼa kjoatéxoma, kʼoa ñaki koanxkoa. Kʼoa kiskoe je nrajaʼndí kʼoa kisinandá, xijekoan kisichao.

Nʼio chʼao kisʼin je naxinandá. Kuinga kʼoakitso kʼasínile chjota Moisés nga katakjoe kicha espadale, kʼoa kitsole: “Je chjota xi chʼaokasʼín xi nrajaʼndí kabʼétsʼoale tjínnele kuiyá”. ¡Kuinga jan jmi chjota kisikʼiensíni! A tsí kui xi bakóyaná jebi nga sikuinda yaoná nga tsín niná ndiso kʼoétsʼoale, nga toje kjoan Jeobá kʼoétsʼoale.