AʼYANÍ jmeni ndʼia xokji. Jngo ndʼianajño xi toxá koanndani jña kisʼetsʼoale Jeobá. Tabernáculo tsakʼin. Tojngo nó koanjngonile je naxinandá kʼianga je kitjoni ya Egipto. A ʼyaní ʼyani xokitso nga kui kisʼenda.

Jé Jeobá xokitso. Kʼianga ya tíjna Moisés ya jko̱nindo Sinaí, kʼoakitsole Jeobá josika je ndʼianajño. Kʼoakitsole nga tochoa ñʼai katabʼé josʼin nga sasa kʼoasjekjaoni. Ánni nga koa̱n koaikaosíni jña xín ʼnde, kʼoa ya kʼoekjao ijngokʼasíni. Kʼianga xín xín ʼnde ki je chjota israelita ya ʼndekixí, kikao je ndʼianajño.

Tsa chótsenlai je cuartoʼndí xi tíjnasí jña fetʼani, jngo kaxa matsen. Kui kaxa jña kixinya je kjoa xi kisʼendajin. Nga jngó jngó ngoa, jngó jngó ánkje xi querubín ʼmi kisatioson xi taonsiné koanndani. Jao lajaote ijngokʼa kiskitʼa chjotseni Niná xi Te Kjoatéxoma nga je xi títjon je Moisés kisixkoa. Kʼoa lajao jebi ya kisatíotjao ya kaxa jña kixinya je kjoa xi kisʼendajin. Kʼoati ya kisʼejnatjao jngo tií xi maná kixinya. A faʼaitsjenli jmélanáni xi maná ʼmi.

Jé Aarón je ndsʼe Moisés kiskoejin Jeobá nga naʼmi títjon koan. Jé tsakandiale naxinandá nga tsakʼétsʼoale Jeobá. Kʼoati naʼmi koan xtile.

Kʼoa kuila chótsenlai ndʼai je cuarto xi ngisasíje kji. Jaoya kʼoakjije josíkji je cuarto xi ʼndí síkji. A tiʼyaní kaxaʼndí jñasíni niʼndi̱ tíbitjo. Yaa jña tsakakáson xongó je naʼmi, xongó xi nda nje. Chótsenlalai je xi tiya lʼí xi ñatosí lʼí tjínle. Kʼoa xi majansíni jngo yámixa xi tejao nioxtila kisatioson.

Ya nitsinle ndʼianajño kʼoati jngo xjoa xi nʼioje kji kisʼejna xi nandá kixinyakitse. Kui nandá xi kisichjén naʼmi. Kʼoati ya kisʼejna jña kisakason cho̱ xi tsakʼaitʼale Jeobá. Je ndʼianajño ya kisʼejna ngabasenle jña tsakatio chjota israelita.