ASAJE kʼoakisi ñandiai jngo én xi ñʼaini koanli nga kinitjosuin. Kʼoakjoan koanle je chjota xi faʼaitʼasí ibi, kuinga kʼoasʼin ba matsensíni. Jefté tsakʼin, juez koan ya Israel kʼoa nʼiojin koan.

Kʼia tsakʼejna Jefté nichxin nga tsínti je Jeobá tsakʼétsʼoanile naxinandá Israel. Kui kʼoati kisʼinngáni xi chʼaotjín. Kuinga kitsjoaʼndesíni Jeobá nga totaon tsabe chjota xi ya tsʼe Amón. Je chjota israelita tsakʼétsʼoale Jeobá, kʼoa kitsole: “Tibijnyijéenijin xi kao ji. ¡Chʼasjentjainaijin!”

Aonni koanle jmeni xi chʼao kisʼin. Kʼoa josʼin tsakakó nga aon koan kjoaixinile kuinga je Jeobá tsakʼétsʼoa ijngokʼanile. Kuinga tsakasenkao ijngokʼasíni je Jeobá.

Je naxinandá jé Jefté kiskoéjin nga skaan kao chjota tsʼen amonita. Je Jefté nʼio koanmele nga je koasenkao Jeobá kʼianga skaan. Kuinga kitsosínile Jeobá: “Kʼiatsa kuisenkaonai nga an kuinjena, je tsjoale je chjota xi títjon kuitjo ndʼiana xi skoéyana nga kjoaʼaiña nga je kanjena je kjoajchán”.

Jeobá kinrʼoé jme én xi kitso Jefté, kʼoa tsakasenkao nga kisikinje je kjoajchán. Nga je jaʼaini ya kjoajchán, a ʼyaní ʼyá chjotani xi títjon kitjo nga kiskoéya. Je tsotile. Kʼoa tojngo mani. Jefté kiskiʼndá kʼoa kitso: ¡Ji ʼndínaa! ¡Jmé sikji tse kjoaba tibʼaininai! Tonga je katsjoale énna je Niná, kʼoa likui koa̱n nga tsín sitjosonle Jeobá jme xi kaxinle”.

Kʼianga je kisʼejinle tsotile Jefté jmeni én xi kitsole Jeobá je nʼaile, kʼoati ba koanle, nga be nga sikʼéjna je nʼaile kao miyole. Tonga ya sixá ya ndʼianajñole Jeobá xi tíjna ya Siló jokji tse kʼoéjnakon. Kuinga kitsosínile nʼaile: “Tsa je kʼoakaʼmilai Jeobá, tjínneli sitjosuin je énli”.

Xijekoan, je tsotile Jefté ki ya Siló, kʼoa jokji tse tsakʼejnakon ya kisixá ya ndʼianajñole Jeobá. Je yánchjín xi ya tsʼe Israel ño nichxin kisíxatʼa nga xki̱nó, kʼoa nda tsakʼétsaojin jokji tse batiokao. Je chjota tjao koanle je tsotile Jefté nga nʼio nda kisixále je Niná Jeobá.