AJOXI tíjnakon sʼin matsen ye̱ xosíkji títsʼójon je yá. Toxokʼoakji. Kichaní koanndani. Je Jeobá kʼoakitsole Moisés nga jngo yá katabaséjna jñani sikʼójon je ye̱, ánni nga koa̱n skótsensínile chjota kʼoa koatiokonsíni. Tonga je xi tjíojinʼndesí, ñaki ye̱ní. Kiskinele chjota kʼoa kitsjoachʼinle. A ʼyaní ánni.

Kuinga je chjota israelita chʼaosʼin kinchjale Niná kʼoa kao Moisés. Kʼoa tsakjayojéetʼale Moisés, kitso: “Ánni nga kichʼasjesíninaijin Egipto nga to i̱ni kuiyáijin i̱ ʼndekixí. Tsín ibi tsojmi xi ma chine, ni nandájinla tjín. Kʼoa je kichobekaonajin nga maná bichijin”.

Tonga je maná nʼio nda. Ya ngʼajmi kitsjoanile Jeobá. Kʼoa kʼoati kao nganʼiole kitsjoanile nandá. Tonga je chjota xokjoan likui kitsjoale kjoanda Niná josʼin kisikuinda. Kuinga ye̱toan kisikasénsíni Jeobá nga kitsjoale kjoañʼai je chjota israelita. Kiskinele je ye̱, kʼoa nʼio nkjín chjota kʼien.

Tochan kichonrʼoe chjota je Moisés kʼoa kitsole: “Kabijnyijéenijin, nga chʼaosʼin tinokjoalaijin Niná kʼoa chʼaosʼin tinokjoalaijin. Tʼetsʼoalai Jeobá nga katafaʼáxín ye̱ xokjoan”.

Je Moisés tsakʼétsʼoantjai je chjota. Kʼoa Jeobá kʼoakitsole Moisés nga katasínda ye̱ xi faʼaitʼa ibi xi kichaní koanndani. Kʼoa kʼoakitsole nga jngo yá katasíkʼójon, kʼoa toʼyani xi skinele ye̱ ya skótsenle. Kʼoakjoan kisʼin Moisés jokitsole Jeobá. Kʼoa je chjota xi kiskinele ye̱ ya kiskotsenle je ye̱ xi kichaní koanndani kʼoa koanndaya.

Nʼio tse jmeni xi bakóyaná jebi. Ngatsʼia mangósonñá je chjota israelita xi ye̱ kiskinele. ʼYaní nga majchínga ngatsʼi chjota, sokóchʼinle kʼoa biya. Kui kʼoamani kʼianga je chjota xi títjon tsakatio ngasʼa, je Adán kao Eva, tsakinyaxínle Jeobá, kʼoa xtile ma ngatsʼia. Tonga Jeobá jngo ndia kiskoʼai nga koa̱n kuiyoa ngantsjai nichxin.

Je Jeobá kisikasén ʼNdíle i̱ Sonʼnde, je Jesucristo. Jngo yá kisʼetʼa Jesús, nga nʼio nkjín chjota xi kʼoasʼin kisikjaʼaitsjen nga chjota tsʼen koan. Tonga Jeobá kui xá kitsjoani Jesús nga kʼoasjentjainá. Tsa je chótsenlee, xi tsonile, tsa je kjuintjenngilee, sʼená kjoabijnachon xi tsínkʼia fetʼa. Tonga kʼia jchasa xi tʼatsʼe jebi.