ATIʼYANÍ jmé xi tísʼín Abraham. Jngo kicha kitjontsja, kʼoa joxi tile ngó sikʼien sʼin matsen. Ánni, títjon kjoanla kataʼya jókoanni kisʼele ʼndí jebi Abraham kao Sara.

A faʼaitsjenli, Niná kʼoanákitsole nga jngo ʼndí sʼele. Tonga jókoannile, nga je nʼio chjota jchínga Abraham kao Sara. Tonga Abraham koankjainle nga Niná male kʼoasʼín ninga xi ñʼai tjín. Kuinga, jméni xi koan.

Kʼianga je kʼoakitso Niná jme xi sʼin, jngo nó jaʼato. Xijekoan, kʼianga je jngo sientole nó je Abraham kʼoa ñokan kao téle nó Sara, jngo ʼndílee kisʼele xi Isaac tsakʼin. ¡Kisitjoson Niná jme xi kitso!

Kʼianga je nkjín nóle Isaac, je Jeobá kiskotʼayakao kjoamakjainle Abraham. Kitsole: “¡Abraham!”, kʼoa Abraham kitso: “¡I̱ tíjna ibi!” Xijekoan, Niná kitsole: “Chjoai ʼndíli, xi tojngo kjoan ʼndíli, je Isaac, kʼoa tʼin ya nindo jña koakole. Ya tikʼain ʼndíli kʼoa tʼaitʼanai”.

¡Nʼio ba kisʼele Abraham tʼatsʼe jebi, nga nʼio tsjoake koan ʼndíle! Kʼoa tikjaʼaitsjenlai, Niná kʼoanákitso kʼianga je xtile Abraham ya koatio ya ʼnde Canaán. Tonga, jókoa̱nni kuitjoson jebi tsa kuiyálani Isaac. Likui koanjinle Abraham, tonga tojo kisitjosonle Niná.

Nga kichó ya nindo, Abraham tsakánʼio Isaac kʼoa ya kisikájnason je xi tsakʼénda jña nikʼienson cho̱. Xijekoan, tsakʼasje kicha nga sikʼien je ʼndíle. Tonga nga je kʼoatísʼín, je ánkjele Niná kitsole: “¡Abraham, Abraham!” Kʼoa Abraham kitso: “¡I̱ tijna ibi!”

“Lijmejin xi nikoai je tibe”, kitsole Niná. “Ndʼaibi ʼbeña nga tjínli kjoamakjain xi kao an, nga tsín kanikʼéjnanʼiui ʼndíli, xi tojngo kjoan ʼndíli, xi kao an”.

¡Jmé sikji tse kjoamakjain kisʼenile Abraham xi kao Niná! Koankjainle nga tsín jme xi ñʼai male Jeobá, kʼoa nga koa̱nle Jeobá sikjaʼáyale Isaac ninga je kijnakʼien. Tonga Niná likui koanmele nga sikʼien kjoaixi Abraham je Isaac; kui xi kisʼin Jeobá nga tosa jngo barré kisʼejnajinnʼio ya jinjñá kʼoa kʼoakitsole Abraham nga tosakui katasíkʼienle ʼndele nga Isaac sikʼien.