¡NʼIO ba sʼin matsen ti jebi, joxi tsínti jme kjoachoya tjínnile sʼin matsen! Jé José. Je ndsʼe jé tjíobaténatʼale chjota xi ya tjíofi Egipto. Choʼnda kisikao José ya Egipto. Ánni kʼoakisikaosíni ndsʼejon José nga chʼaotjín jebi. Kuinga koanxinkonke je José.

Je Jacob, xi nʼaile koan, nʼio tsjoake koan José. Jngo najño xi naskánakji kisindale. Kʼianga tsabe je xi te ndsʼe xi majchínga nga nʼio tsjoake Jacob je José, koanxinkonke kʼoa koanjtike José. Tonga tjínsa ijngo anni nga koanjtikeni.

Jao nijñá tsakʼaile José. Kʼoa nga jao nijñá xi tsakʼaile je ndsʼe tjíomʼaojenle jko̱. Ngisa ti nʼio koanjtikengáni je ndsʼe José kʼianga tsakʼéyanajmíle nijñá jebi.

Jngo nichxin, kʼianga tjíosíkuinda barréle nʼaile je xtindsʼe José xi majchínga, Jacob kʼoakitsole José nga katafikotsenle jósʼin tjíoni. Kʼianga tsabe je xtindsʼe nga kichochrian José, tjínkʼa xi kitso: “¡Sikʼieen!” Tonga je Rubén xi majchínga, kitso: “¡Mai, likʼoajin nʼiao!” ʼNdele nga sikʼien, tosa ya kisikʼatjenya José ya xjáonandá xi tsín jme nandá nya. Xijekoan, tsakjaoyani josikao José.

Nga kui nichxin jaʼa kʼa chjota xi ya tjenni ntje̱le Ismael. Judá i̱ kitsole xi ndsʼejon koanni: “Je koatenalee chjota xi ya tjenni ntje̱le Ismael”. Kʼoa tsakaténale. ¡Kan taonchxoa tsakaténani José! ¡Nʼio chʼaotjín nga kʼoakisʼin kʼoa lijme kjoanda tsakakó!

Jókitsole je nʼaile. Jngo tindso kisikʼien kʼoa nkjín kʼa kiskanisʼenngindá je najñole José ya jnjínle tindso. Xijekoan, kikaole je nʼaile kʼoa kitsole: “Kui kamasjainajin jebi. Chótsenlalai, a tsí kui najñole José”.

Jacob tsabe nga kui najñole José, kitso: “Jngojin cho̱toan kasíkʼien José”. Kʼoa kui xi koanmele ndsʼe José nga kʼoasʼin katasíkjaʼaitsjen je nʼaile. Nʼio ba koanle Jacob. Nkjín nichxin kiskiʼndá. Tonga likuini kʼien José. Kataʼyala jméni xi koanle jña kichokʼejna.