JOSÉ likuiti koanjenile kon. Kʼoakitsole ngatsʼi choʼndale nga katabitjo ya ndʼia jña tjíoʼya. Kʼianga je toje tsakatiokao je ndsʼe, José kiskiʼndá. Tokʼoajinkoanle je ndsʼe, nga tsín be ánni nga kiskiʼndásíni José. Xijekoan, tochan kʼoakitsole: “Anña José. A tojo tíjnakon je nʼaina”.

Tokʼoakoanle je ndsʼe saʼnda likui tikoan kinchjani. Kitsokjon. Tonga José kitsole: “Tinyachriaon, tʼiaon kjoanda”. Kʼianga je tsakinyatʼachrianle kitsole: “Anña José, je ndsʼao, xi tsakatenao i̱ Egipto”.

Je José tosi tonda kao kjoandʼé tsakjákao je ndsʼe: “Lijonjin fanao jée yaono nga i̱ tsakatenanao ibi. Jéní Niná xi kʼoasʼin kisikasénna Egipto nga kʼoasjentje kjoabijnachonle chjota. Je Faraón chjotaxá kisikʼéjnana i̱ Egipto. Kuinga tanginrʼoe kjitʼanangisíño je nʼaina kʼoa kʼoatʼinlao jebi. Kʼoatʼinlao nga katanroakʼejna ibi”.

Xijekoan, José kitsoakjá je ndsʼe kʼoa tsakʼéndsoʼa ngatsʼi. Kʼianga kisʼejinle Faraón nga ya kichó ndsʼe José, kitsole José: “Katafikao carreta kʼoa katafikjaʼá nʼaino kao yaniʼyale kʼoa katanroa ibi. Kui tsjoale nangi xi ngisasa ndachon xi tjín i̱ Egipto”.

Kʼoa kʼoakisʼin. Ibi matsen José nga tísítiʼnda je nʼaile kʼianga kichó ya Egipto kao ngatsʼi yaniʼyale.

Je yaniʼyale Jacob nʼio nkjín je mani nga kʼia. Jankan kao te mani nga kichó ya Egipto, Jacob kao xtile kʼoa kao xtindaile. Kʼoa xínnile yánchjínle, kʼoa tsakui nichxin kʼoati nʼio nkjín choʼndale xi kʼoati ki. Ngatsʼi ya tsakatio ya Egipto. Chjota israelita tsakʼinle, nga Niná kisikʼantjaiya jaʼainle Jacob kʼoa Israel kitsole. Jngo naxinandá xi toxá kiskoejinni Niná koan, josʼin jchaa xi koa̱nskanni.