JE TSOTI xosíkji faʼaitʼa ibi sʼa tejao nóle. Je Jesús títsoa ntsja, kʼoa ya tjíochrian je na̱le kao nʼaile. A ʼyaní ánni nga nʼio tsjoa tjíosínile. Kataʼyala.

Je nʼaile tsoti xokji xángʼa kisʼele kʼoa Jairo tsakʼin. Ñandia kʼianga chʼin kiskatʼale tsoti jebi kʼoa ya nachan kinikájnason. Tonga likuiti koanndayani; satao satao koan chʼinle. Je Jairo kʼoa kao chjoónle nʼio koankjaojinle, nga je tsen koanle nga kuiyá ʼndítsotile. Kʼoa tojngo mani tsotile. Je Jairo kikásjai Jesús. Kisʼejinle jmeni choa̱ xi sʼín je Jesús.

Kʼianga je koansjaile je Jesús, tosíxkón chon chjota tjíondaile. Tonga je Jairo jaʼatojinle je chjotankjín kʼoa kiskangi ndsoko Jesús, kitsole: “Je tsotina nʼio tímʼe, tʼiain kjoanda nroai kʼoa tindayai”. Kʼoa Jesús kʼoakitsole nga koai.

Kʼianga tjíofi je Jesús kao Jairo, je chjotankjín ñaki tjíofinele xínkjín nga kuichó jña tíjna Jesús. Kʼoa toxijña tsakasejna Jesús, kʼoa kitso: “ʼYáni xi kasíkaona”. Tsen koanle Jesús nga nganʼio kitjole, kʼoa be nga tjín xi kisikao. Tonga, ʼyáni. Jngo chjoón xi je kjoan tejao nó tímʼe. ¡Ya kichó jñani tíjna Jesús, kisikao najñole, kʼoa koanndaya!

Ngisa ti nda kisʼengáni kon Jairo xi tʼatsʼe jebi, nga tsabe nga likui ñʼai male Jesús nga síndaya chjota. Tonga jngo chjota kichonrʼoe Jairo kʼoa kitsole: “Ali tsati jejin Jesús nisinilai. Je tsotili je kamʼe”. Je Jesús kinrʼoé én jebi kʼoa kitsole Jairo: “Ali kʼoajin tjín xi nikjaojin; koa̱nndayaní”.

Kʼianga je kichó ya ndʼiale Jairo, je chjota nʼio bale kʼoa tjíokjiʼndá. Tonga Jesús kitsole: “Ali chjiʼndájion. Je tsoti, ali kamʼejin. Tokijnafení”. Tonga je chjota xi ya tjío totsakijnoke kʼoa totsabesin Jesús, nga be nga kijnakʼien je tsoti.

Je Jesús jaʼasʼenkao je nʼaile kao na̱le je tsoti ya cuarto jñani kijna, kʼoa kao chjota tjenngile xi jan. Je Jesús kiskoe ntsja je tsoti kʼoa kitsole: “¡Tisótjain!” Kʼoa jaʼáyanile, josísʼin matsen ibi. ¡Tsakisótjen kʼoa tsakʼamje! Kuinga nʼio tsjoa tjíosínile je nʼaile kao na̱le.

A litsa jejin títjon tsoti je xi kisikjaʼáyale je Jesús. Je xi títjon kisikjaʼáyale jéní ʼndíle jngo chjoón xi je kʼien xʼinle xi ya naxinandá Naín tsʼe. Xijekoan, kʼoati kisikjaʼáyale je Lázaro, je ndsʼe María kao Marta. Kʼianga koatéxoma Jesús, je rey xi kiskoejin Niná, nʼio nkjín chjota sikjaʼáyale. A tsí tsjoamaná xi tʼatsʼe jebi.