NʼIO jti sʼin matsen Jesús ibi, a tsí jaon. A ʼyaní ánni. Kuinga je chjota xosíkjoan tjío i̱ Jerusalén i̱ yo̱ngo̱le Niná, mele nga tse taon sʼele. Nʼio tse taon tjíobʼasjetʼale je chjota xi faʼaikʼétsʼoale Niná.

A tiʼyaní je nrajaʼndí, je tindso kʼoa kao nisechxoa xosíkjoan. Ya yo̱ngo̱ tsakaténa je chjota xosíkjoan. A ʼyaní ánni. Kuinga cho̱ kʼoa nise koanchjénle je chjota israelita xi kitsjoatʼale Niná.

Je kjoatéxomale Niná kʼoatso kʼiatsa jngo chjota israelita xi chʼaosʼin, jngo cho̱ tsjoátʼale Niná. Tonga kʼoati kitsjoatʼale Niná kjoatjao xi kjaʼai. Tonga, jñáni kikʼá je nise kʼoa kao cho̱ xi kitsjoatʼale Niná.

Tjínkʼa xi kisʼele nise kʼoa kao cho̱ xi kitsjoatʼale Niná. Tonga nʼio nkjín xi tsínkui kisʼele. Kʼoa kʼoati tsakatio je chjota israelita xi kjin tsakatiole Jerusalén kʼoa likui koan kikao cho̱ ya yo̱ngo̱ Jerusalén. Kuinga ya tsakatsesíni je cho̱ kʼoa kao nise. Tonga je chjota xi ya tsakaténa cho̱ ya yo̱ngo̱ nʼio chjí tsakʼa. Kisichésonle chjota. Xi ijngosani, likui tjínnele nga ya koatenaʼya cho̱le ya yo̱ngo̱le Niná.

Kui jebi xi kisijtile Jesús. Kuinga kiskanitítsjásíni je yámixa kʼoa tsakʼétsaobasíni je taon xi ya tjíoson. Kʼoati jngo nʼó kisinda kʼoa tsakʼaonsje je cho̱ xi tjío ya yo̱ngo̱. Kʼoa kʼoakitsole je xi nisechxoa tjíobaténa: “¡Tichonsjao! A likʼoajinsʼin jngo ʼnde jñani to taon nʼio nikinjao nikao je ndʼiale Nʼaina”.

Ya tjíokao kʼa chjota tjenngile Jesús ya yo̱ngo̱ Jerusalén. Tokʼoakoanle nga tsabe jmeni xi kisʼin je Jesús. Kʼoa jaʼaitsjenle jmeni xi tso Biblia xi tʼatsʼe ʼNdíle Niná: “Je kjoatsjoacha xi tjínle xi tʼatsʼe ndʼiale Niná ñaki kjoaʼájnga xi kao je joni tsa jngo lʼí”.

Kʼianga yasa tíjna Jesús ya Jerusalén nga tísʼejna sʼuí Paxko, nʼio nkjín choa̱ tsakʼéjna. Xijekoan, nga kitjoni Judea je Jesús ya ki ijngokʼani ya Galilea. Tonga ya jaʼato ya ʼnde xi nchjani Samaria. Kataʼyala jméni xi koan ya.