KʼIANGA je kitjoni ya cuarto jñani tsakʼéjna Paxko, Jesús kao pastrole ya ki ya ʼnde jña Getsemaní ʼmi. Tokʼoa je nkjín kʼa saki ya ʼnde jebi. Jesús kʼoakitsole chjota tjenngile nga katabatiokon kʼoa katabʼétsʼoa, kʼoa kisikjin choale, tsakjéntʼa nangi nkjaín kʼoa tsakʼétsʼoa.

Xijekoan, kinrʼoe ijngokʼangáni jña tjío je pastrole. A ʼyaní jmeni xi tjíosʼín. ¡Tokjiofe! Jan kʼa kʼoakitsole Jesús nga katabatiokon, tonga nga kichonrʼoe nga jan kʼa tokjiofení. Xi jetʼani nga je jan kʼa kichonrʼoe kitsole Jesús: “Ánni nga kʼoasʼin soyofesíño ndʼaibi. Je kichoka choa̱le nga kʼoasʼin koaikaona je xi kontrana”.

Nga je kʼoakitsole nʼio nkjín chjota kinoʼyale xi ya je kichochrian. ¡Chótsenlalai! ¡Kicha yʼa kʼoa yá yʼa chjota xi kichonrʼoe! Kʼoa lʼí tjíojkole yá xi yʼa xi kisiʼisenle. Kʼianga je kichochrian, jngo chjota kitjokajinle chjotankjín kʼoa kinrʼoe Jesús. Tsakʼéndsoʼa, tojosísʼin matsen ibi. ¡Jéní Judas Iscariote! Ánni nga Jesús tsakʼéndsoʼasíni.

Jesús kitsole: “Judas, a kao kjoabʼéndsoʼabi tibatenaninai”. Jaon, nga kʼoasʼin tsakʼéndsoʼa totsakakóní. Kuinga kʼoakisʼinni nga skoe je chjota xi kichokao Judas ʼyáni je Jesús, je xi kʼoasʼin tjíobásjai. Je kontrale Jesús kʼoasʼin tsakinyatʼachrianle nga kitsoa. Tonga Pedro likui kitsjoaʼnde nga tokʼoasʼin koaikao Jesús nga tsín sitoanntjai. Tsakʼasje kicha xi yʼa kʼoa tsakále je chjota xi ya séjnatʼachrianle. Tsakatetʼa xo̱ño ngakixi. Tonga Jesús kisikao xo̱ño chjota jebi kʼoa kisindaya.

Jesús kitsole Pedro: “Tikájnatjoai kichali ya ʼndele. A tsín koa̱nna nga nkjín jmi ánkje sijéle Nʼaina nga kʼoasjentjaina”. ¡Jaon, koa̱nle! Tonga Jesús likui kisijéle Niná nga ánkje sikasén, nga be nga je kichoka choa̱le nga koaikao je chjota kontrale. Kitsjoaʼnde kʼianga kindoa. Kataʼyala jméni xi koantʼain je Jesús.