ÑANDIA kʼianga Jesús kʼoakitso jngole chjota nga tjínnele koa̱ntsjoake xínkjín. Kitso chjota jebi: “ʼYáni xi xíngia”. Je Jesús be jmeni xi tísíkjaʼaitsjen chjota jebi. Kui tísíkjaʼaitsjen nga toje xi xínkjín mani je chjota judío kʼoa kao xi ya tjíojin religiónle. Kuinga, kataʼyala jmeni xi kitsole je Jesús.

Sakʼoa tochoa̱ tsakatío Jesús nga tsakakóya. Kʼoa kui jebi je xi kisʼin. Kui tsakʼéyanajmí xi tʼatsʼe jngo chjota judío kʼoa kao jngo chjota samaritano. Jesa tsaʼya kʼianga me ngatsʼi je chjota judío nga tsín tsjoake koan je chjota samaritano. Kui jebi xi tsakʼéyanajmí Jesús:

Ñandia kʼianga jngo chjota judío kijen ya ndianindo xi fi ya Jericó. Tonga ché kitsoa. Tsakjáʼale je taonle kʼoa tsakʼéle jo saʼnda nga me kisikʼien.

Xijekoanni, jngo naʼmi judío jaʼa ya yandia jña kijna. Tsabe je chjota xi kisatele. A ʼyaní jmeni xi kisʼin. Tojaʼatʼale kʼoa toki. Ijngo chjota xi religión tjínle jaʼa. Jngo chjota levita. A tsakasejna, majain, kʼoati likui tsakasenkao je chjota xi kisatele. A tiʼyaní je naʼmi kʼoa kao levita xi yasí kichó saʼnda ján.

Tonga chótsenlalai je xi tíjnakaosí je chjota xi kisatele. Chjota samaritanoní. Jé tíbasenkao je chjota judío. Xki tíbʼéjtenjon jñani kitsiʼaon. Xijekoan, ya kikao ya jñani koan kisikjáya kʼoa koanndaya.

Kʼianga je tsakʼéyanajmí Jesús jebi, kitsole je chjota xi kiskonangile: “Jósi, ʼyáni xi nga jan xi kʼoasʼin tsakakó nga xínkjín mani je xi kʼoasʼin kisatele. A je naʼmi, a je chjota levita, a xo je chjota samaritano”.

Kitso chjota jebi: “Je chjota samaritano. Jé xi tsakasenkao je chjota xi kisatele”.

Jesús kitso: “Kʼoatjín jokasi. Kuinga, tʼin kʼoati tikoai tsanda ji je chjota josí kisʼin chjota jebi”.

A nda sʼeli josʼin tsakakóya Jesús. Nʼio tse xi nʼio chjíle ʼya jmeni xi tso Biblia xi tʼatsʼe Jesús, a tsí jaon.