CHÓTSENLALAI je nisechxoa xi tíbitjojennesíle chjota jebi. Jení Jesús. Je kante nóle ibi. Kʼoa jé Juan xosíkji tíjnakao. Jesa tsaʼya choa xi tʼatsʼe Juan. A faʼaitsjenli kʼianga María kichokonnále je Elisabet, kʼoa je ʼndílee xi tjía tsʼoa̱ nga kaoná kjoatsjoa kiskingʼa. Jéní Juan kʼianga kje tsinjin. Tonga, jméni xi tjíosʼin ndʼaibi je Juan kao Jesús.

Je Juan sʼakjoan kakanisʼenngindá je Jesús ya xongá Jordán josísʼin matsen ibi. Kʼoasʼin chanisʼenngindá chjota. Títjon chanisʼenngindá kʼoa kʼia chʼasjengindáni. Kʼoasʼin kisikao chjota je Juan; kʼoa kuinga Juan Bautista tsakʼinsínile. Tonga, ánni nga Jesús kiskanisʼenngindásíni.

Kuinga je Jesús xokitsole kʼoa ya kichonrʼoe jñani tíkanisʼenngindá chjota je Juan. Je Juan kui xá kiskanisʼenngindáni chjota nga aon koannile jmeni xi chʼao tjíosʼín. Tonga, jméni xi chʼaokisʼin Jesús kʼoa xi aon koannile. A lijme xi kisʼin, nga ʼNdíle Niná koan kʼoa ya jaʼaini ngʼajmi. Kuinga tjín anni nga kʼoasʼin kiskanisʼenngindásíni je Juan. Kataʼyala ánni.

Kʼianga kjesa faʼainrʼoejin Juan, je Jesús chjineyá koan. Je xi chjineyá ʼmi, yámixa sínda, yáxile sínda kʼoa kao yábanka. José je xʼinle María, chjineyá koan kʼoa je kitsoyale Jesús nga kʼoati kui koan. Tonga je Niná a likuijin xá kisikasénni je ʼNdíle i̱ Sonʼnde nga chjineyá koa̱n. Kjaʼai xá kisikasénni, kʼoa je kichoka choa̱le nga kui xá jebi kʼoasʼin. Kuinga, kʼianga kataʼyale nga kui kʼoajaʼaisʼín Jesús josʼin mele Nʼaile, kʼoakitsole je Juan nga katakanisʼenngindá. A kisasenle Niná jebi.

Jaon, kisasenle, kʼianga je kitjokangindáni Jesús, jngo jta̱ kinoʼyale ngʼajmi xi kitso: “Jebi ʼndína, jonda sʼe koan xi tʼatsʼe”. Kʼoa kitjoʼaijin ngʼajmi kʼoa je nisechxoa xosíkji jaʼaijennele Jesús. A litsa ñaki nisechxoajin. Toxokʼoasʼin matsen, nganʼiotsjele Ninání.

Nʼio tse jmeni xi kisikjaʼaitsjen Jesús nga kʼia, kuinga ya kisíni jngo ʼndetʼaxíntʼa jñani ñachan nichxin tsakʼejna. Kʼoa nga ya tíjna ya kichó je Satanás. Kʼoa jan kʼa kʼoakitsole Jesús nga katafaʼatone kjoatéxomale Niná. Tonga je Jesús likui kisitjoson.

Xijekoan, je Jesús ki kʼoa tsabexkon kʼa chjota xi chjota tjenngile koanni. Kʼoa jení: Andrés, Pedro (xi kʼoati Simón tsakʼin), Felipe, kʼoa Natanael (xi kʼoati Bartolome tsakʼin). Jesús kao je chjota jebi ya ki ya Galilea. Ya tsakatio ya naxinandále Natanael, ya Caná, jñani nga tjín xi tjíobixan, je Jesús ya títjon tsakʼéjna jngo choa̱. A ʼyaní jmé choa̱ xi tsakʼéjna. Vino kisikʼóya je nandá.