CHÓTSENLALAI yá ngʼa xosíkjoan, naxó xosí naskánakjoan kʼoa kao nindo ngʼa xosíkjoan. Naskánasʼin matsen, a tsí jaon. Kʼoa chótsenlalai naxínní xi tíkjenyasí ntsja je tiʼndí. Chótsenlalai je xa kʼoa kao naxín xi tjíosí ya sonliji. A meli tsa ya kuijnai jngo ʼnde jñani i̱ chon kʼoa tsa ya sʼejna ndʼiali.

Niná mele nga jngo ʼndenaxó kuijnajin ngantsjai i̱ Sonʼnde, nga tsín tikui kjoañʼai sʼenili xi tjínle ndʼaibi je chjota. Je Biblia kʼoatso nga kui kjoanda jebi kʼoaile xi ya koatio ya sonʼndenaxó xi sʼa nroa. “Niná kʼoéjnakao. Likui tisʼeni kjoabiya, likui tiʼya xi skíʼndáni, likui tisʼeni kjoaʼaon. Ngayeje jmeni xi kjima to kjoaʼato”.

Jé Jesús xosʼin kʼianga katafaʼai kjoanda jebi. Kʼiáni kʼoakoa̱n. Jaon, kʼianga je kjoaʼaxín ngayeje kjoatsʼen xi tjín Sonʼnde kʼoa kao ngatsʼi chjota tsʼen. A faʼaitsjenli, kʼianga tsakʼejna Jesús i̱ Sonʼnde kisindaya tojme chʼin xi kisʼele chjota, saʼnda kisikjaʼáya kʼale chjota. Kʼoasʼin tsakakó jmeni xi sʼin kʼianga koatexomason ngayeje Sonʼnde.

¡Tikjaʼaitsjenlai jokji tsjoa sʼená nga ya kuijna ya sonʼndenaxó xi sʼa nroa! Je Jesús kʼoa kao chjota xi kiskoejin kʼa, ya tjen ngʼajmi koatexomani. Sisinle ngatsʼi xi koatio i̱ Sonʼnde kʼoa je xosʼin nga tsjoa satío kon ngatsʼi chjota. Kataʼyala jméni xi sʼiaan nga tsjoáná Niná je kjoabijnachon xi tsínkʼia fetʼa ya sonʼndenaxó xi sʼa nroa.